Read ebira Anihiburu 4 Bible Online

Anihiburu 4 - ebira bible

Anihiburu 4

¹Ohomorihi ka ẹ́ yị zụ nyị ka ẹyị ẹ́ yị rẹ vaa ngụ ịzị ọnị yà, dị ya na tụ́ ụhwọ́. Agụvị avọọ à vẹ ya nyị angwahi, agụvị asị a na nyị ọza ịnya ịnị awụ nịnị ana ahịka ọ rẹ va zụ ngụ ịzọọ.

²A ma rẹ kà enube ọyịza ọnọnịị yị aanị, a rẹ kà a yị ẹnị ịnị ụnọmị nị. Ama ịrẹyị ana a kà yị wa ẹ yị mẹ ọgụvọ yị wa vụrụ-vụrụ, agụvị ka ẹ mẹ̀ wụ́ ọ, ẹnịnị ẹ yị dọ ọ wụ́.

³Ẹyị ana sị ayị tụra Ijeesu, ọ ngụ ịzị ọ yà naa tụ́ ụhwọ́ nị. Ama ẹnị vị ọnị ọ́ kà a yị ka: Ayị ọ́ kụ́ ọnị, dị ọnị hị́ eku ka ẹnịnị ẹ yị vaa ngụ ịdị anị vaa tụ́ ụhwọ́ nị. Dị ọ maanị yị kà, ọ sị ụkọrọ anị mẹ ta hụrị ụmọrụmọ, ọ mẹ̀ hụrẹ mẹ ẹhẹ.

⁴Â maanị kà a tụ́ aha ọnya ini Iwe Ohomorihi ini oze ẹkụhị ọhụhịmba ka: Ịnị ẹkụhị ọhụhịmba, Ohomorihi ộ tụ́ ụhwọ́ ịnị avaba ụkọrọ ọnị ọ mẹ.

⁵A rẹ kà a tụ́ aha ọsa ka: Ẹyị vaa ngụ ịdị anị vaa tụ́ ụhwọ́.

⁶Yáa yẹ ka aa yị nyị aza ẹnyị ana vaa ngụ ịzọọ. Ye re ree ka aza ẹnẹẹ ana a vịdị kà enube ọyịza ọnọnịị yị, ẹnịnị ẹ yị dọ ọ wụ́, agụvị avọọ ẹnịnị ẹ yị zụ ngụ ịzọọ.

⁷Ịjị ịrayị ọrụrụ-ọrụrụ rẹ sị mẹ para hu, Ohomorihi ọ rẹ nyị ẹkụhị ọsa tịtẹ ọnị ọ hị́ ajịnị, ọ mẹ̀ zị oze ịnị ụvọ Idevidi tenyi ịrẹyị ọnọọ kà ka: Ajịnị, wàa wụ́ ọngwẹ anị nịnị, asị ụ na mẹ ayọkatẹngụ nịnị.

⁸Ijosuwa ọ̀ọ vịdị yaanị raà kụ́ ohiku ayị nịnị na ngụ ịnị ịzị Ohomorihi yà ka ẹ̀ẹ tụ́ ụhwọ́, Ohomorihi ọ́ yị kụkụ yaanị aa kà ịrẹyị ẹkụhị ọsa.

⁹Ọnọọ ọ́ọ sị zụ̀ ka a nyị nyị ụhwọtụ ana aza Ohomorihi va naa tụ́.

¹⁰Ọza ana àa sị ngụ ịzị Ohomorihi yà dị aa tụ́ ụhwọ́ nị, ọ vaa tụ́ ụhwọ́ ịnị ụkọrọ anị, anka Ohomorihi ọnị mẹ̀ rẹ tụ́ ụhwọ́ ịnị ụkọrọ anị ịnị ẹkụhị ọhụhịmba.

¹¹Agụvị avọọ, à vẹ yaa sịị vụrị, dị ya zụ ngụ ịnị ụhwọtụ ọnọọ. Asị a nyị ọza ana na mẹ akamawụ anka ohiku ayị nịnị.

¹²Yáa yẹ ka ịrẹyị Ohomorihi vị ana yára. Ọ́ọ nyị ụkata, ọ́ọ rẹ́ huna ụhwọ onyeyi ẹẹva. Ọọ̄ yẹrẹ ịsaa hụrị oze, dị ọ na huuu na ịzị ayị ọnịrị ụhwẹ na gẹ. Dị ọ na ngụ ịzị ẹgẹ ẹngụ ọnịrị ụhị nịnị na gẹ. Avaba ịsị ọza èe ro ịnị ayị anị, dị ọ sị ọ tụ́ ẹhẹ.

¹³Ẹ yị nyị ịsị ẹ zụ tẹ̀ yị Ohomorihi. Avaba ịsa vị ana maanị yà ịnị ahwaahụ chapaa ini eyi Ohomorihi ọnị vaa jẹẹ ọvịdị anịị kà enube.

¹⁴Yaa nyị ọza ịnya ana yà anka ohirẹsụ ọbanyị irehi Ohomorihi avọọ. Ọza ọnọọ ọ vị Ijeesu Ozi Ohomorihi ana zị nọ ẹbẹẹba nị. Agụvị avọọ, à vẹ ya sị ụvọ za ịsa ọnị ka yaa dọ wụ́ geri-geri.

¹⁵Ohirẹsụ ọbanyị irehi Ohomorihi ayị o zụ pe yi roo ini oze ahịmị ayị, agụvị ka oze tụra oze a zị zama a re, anka a mẹ̀ raa zama ẹyịị re nị, ama ọnị ẹ yị mẹ ịvị.

¹⁶Agụvị avọọ, à vẹ ya nyị ọtụtụrụma, di ye tere vẹ ọvịdị aga ohinọyị ịzị Ohomorihi yà dị aa mẹ ọyịzaa yị aza. Ịzọọ Ohomorihi vaa vayị ayị, dị ọ rẹ gụ yị ụvọ ịnị ụmẹ oni yèe sì ọgụvọ nị.