Read ebira Anihiburu 6 Bible Online

Anihiburu 6 - ebira bible

Anihiburu 6

¹Agụvị avọọ, à vẹ yaa kà a tụ́ ọvịdị ịnị ịsa ana a vọrọ ka aza ana vịra ẹ̀ẹ kọ! Asị i re kuku ne nyima dị yaa zụ̀ wụ nịnị ịsa ịpaapa ini oze ịrẹyị Ikirisiti! Asị ị rẹ varẹma nyima dị yaa kà a ka we ro ịnẹ varẹma hụụnị ụkọrọ anaā wụ̀ ọza, dị ụ wa sị ayị tụra Ohomorihi nịnị!

²Ẹ́ yị nyị ka ye re ne nyima dị yaa zụ̀ wụ nịnị ịrẹyị ọyịhwọzenyi, ọnịrị a mẹmẹẹ̄ sị ụvọọ tụra ọza ịrẹsụ, beri ịrẹyị oku ọyị ha hụụnị isu, ọnịrị ọkarẹyị anaa vẹ ụmẹ ọdịrẹma.

³Ama yaa kà a tụ́ ọvịdị, Ohomorihi òo sì.

⁴Aza ana àa raà sị ẹtohweyi Ohomorihi zụ̀, dị ẹ rẹ raà dá ẹyịza Ohomorihi ree nị, dị ẹ rẹ sị nyị tụ́ ịnị Ụhwẹ Ọnịnị nị, ẹ̀ẹ kụkụ na varẹma, ọ́ọ tụ́ akanya dị à kụkụ zụ mẹ ka e rọ ịnẹ varẹma.

⁵Ẹ rẹ sị ịrẹyị Ohomorihi ene zoza dá ree ẹ rẹ yẹ ụkata ẹhẹ anaa vẹ.

⁶Ẹngụ aza ẹnẹẹ ẹ̀ ẹ na hụrị oze Ohomorihi, ẹnịnị vị anaa sị ụvọ ẹnịnị tenyi Ozi Ohomorihii kanyịị za apavahị. Dị ẹ rẹẹ yaa mẹ ụhịị nyị ọ eyi avaba aza.

⁷Sị ịrẹyị ọnọnị zama a re nịnị: Orihi ọ̀ọ zụ̀ hi aarẹ, di o hú ọọ, dị ọ mẹ̀ ịsa yị aza ana dàa nị, Ohomorihiī mẹ ọyịzaa yị ẹtẹ ọnọọ.

⁸Ama àa vị ikeyi ọnịrị avị kẹnẹ-kẹnẹ e nyị hi ịnị anị nị, ẹ́ yị nyị ịsị aa sị ẹtẹ ọnọọ mẹ, Ohomorihi ọ́ọ hyakụ nyayịnẹ chì hi ọọ, dị a vana rị ọ ịra ọdịrẹma.

⁹Ẹwụ nịnị ẹyịnyara amị, dị ị daka maanị aà yịị kà a aanị, yâ yẹ kaakara ka ẹwụ nịnị aa mẹ̀ ịsa ene zozaa hu avọọ, dị ụ wa há nịnị.

¹⁰Ohomorihi ọ ma mẹ irikichi. O yi vee hi ayị ụkọrọ awụ nịnị. O yi re vee hi ayị, u meme sì ịrẹyị aza Ohomorihi, dị ụ waa gụ wa ụvọ nịnị agụvị ịrẹha anị, anka ụ màa yịị mẹ nịnị.

¹¹Ịsị yee sìi hu, ọ vị ka, ọzịnya-ọzịnya awụ nịnị ọ̀ yịị sịị vụrị pooro ne tù ọdịrẹma, agụvị dị ụ wa zụ dọ ịsị ụ waa tụra eyi anị nịnị,

¹²dị asị ọ na ngụ wụ nịnị ẹngụ. Ama waa mẹ̀ ebira, aza ana yịị sị ayịị tụra Ohomorihi, dị ẹ rẹ nyị isuuru. Ẹngụ aza ẹnẹẹ ẹ vaa dọ ẹyịza oni Ohomorihi kà a ka ẹyị zụ nyị ka ọnị ọyị vaa sịị yị wa nị.

¹³Óhomorihi me wo oto yị Abụrahamị, ẹ yị nyị ịsị e huna Ohomorihi ọnị ọ zụ sị hị́ eku, agụvị avọọ dị Ohomorihi sị ẹngụ anị hị́ eku nị.

¹⁴Ọ kà, Ịzẹyịza, ọnị vaa mẹ ka ò ze yọ, dị ọnị mẹ ka evere anị ẹ̀ rụrụ.

¹⁵Abụrahamị ộ nyị isuuru ẹtẹẹtẹrẹ, agụvị avọọ dị ọ dọ ịsa oni Ohomorihi kà a ka ẹ́ yị zụ nyị ka ọnị ẹyị vaa sịị yọ nị.

¹⁶Ọza ọ̀ọ wo oto, dị ọ sị ịrẹha ịsa ene hunaa hị́ eku. Ọ̀ọ sị eku hị́, dị ẹ yị kụkụ nyị ịrẹyị.

¹⁷Ohomorihi óo sì ka ọnị ọ̀ kà a gedebee yị ọza ọnị ọnị vaa sị ẹyịza ọnọọ yị, ka ọnị ọ yị vaa vara ịrẹyị anị. Agụvị avọọ ọ hị́ eku tụ́ ịnị oto anị nị.

¹⁸Ịrẹyị ẹẹva ẹnẹẹ ẹ mā vara. Ohomorihi oyi re zụ cheeche ịnị anị. Agụvị avọọ, ẹyị ene zwe na tẹ̀ ịdị anị, yaa nyị ọtụtụrụma ẹtẹẹtẹrẹ ka ya sị ụvọ za oni Ohomorihi raà sị tụ́ ọvịdị ayị geri-geri. Ịsa ọnọọ ị sị eyi tụ́ ịnị anị nị.

¹⁹Ịsa ọnị ị sị eyi tụra, ọ za ayị ayị jẹẹ geri-geri nị. Agụvị avọọ, ọyịtureyi ayị ọ́ọ para ịzị a sị ịsa jị hu na huuu na ngụ aha ọnịnị keekere.

²⁰Ijeesu ọ raà dọ ọvịdị na ngụ ịzọọ agụvị ayị, agụvị ka ọ sị vara ohirẹsụ ọbanyị irehi Ohomorihi pooro zịna-zịna anka Imerikizẹdẹkị.