Read ebira Anihiburu 7 Bible Online

Anihiburu 7 - ebira bible

Anihiburu 7

¹Imerikizẹdẹkị ọnọọ vị ohinọyị Ịsarẹmị, dị ọ rẹ vị ohirẹsụ irehi Ohomorihi yị Ohomorihi ana nẹba hu keekere nị. Abụrahamị ộ và hụrị ịrẹkụ aa vẹ, ọ mẹ̀ na wụ ohinọyị ẹnyị aanị. Imerikizẹdẹkị ộ va gẹrị ọ, dị ọ mẹ̀ aduwaa yọ nị.

²Dị Abụrahamị sị agẹẹwụ ịsa ọnị ọ dọ yọ nị. Ịpaapa, iruvo ịrẹha Imerikizẹdẹkị ọ vị Ohinọyị Ọnịzẹyịza; ohinọyị Ịsarẹmị ọ vị nị, agụvị avọọ, dị a rẹẹ̄ hị́ ọ ohinọyị ẹngwọọrọ nị.

³Imerikizẹdẹkị ọ yị nyị ada, à vị ọnyị, ọ yị rẹ nyị ịpa ịrẹsụ ọnyọọnyị. Ẹ́ yị nyị ka ẹkụhị aanị-aanị a sị maa nị, ẹ́ yị rẹ nyị ka ịhị aanị-aanị o sú nị. Vị ọ sị mẹẹ anka Ozi Ohomorihi avọọ nị, ọnị ọ vị ohirẹsụ ọbanyị irehi Ohomorihi pooro nị.

⁴Wéé re ịzị ọnọrụ ọnọọ mẹhị nyị ụbanyị ne tu? Abụrahamị ohiku ayị ộ sị agẹẹwụ ịsa ọnị ọ dọ yọ.

⁵Imosiisi ộ mẹ̀ ọda yị anovwoovu Ireevi anaā mẹ ohirẹsụ irehi Ohomorihi ka ẹ̀ẹ dọ Anisirẹrị nịnị agẹẹwụ. Anda ẹnịnị ẹnẹ ẹyaa dọ agẹẹwụ aanị yị vị ezi Abụrahamị.

⁶Ama Imerikizẹdẹkị ọnị ọ yị vị anovwoovu ẹnịnị, ộ dọ Abụrahamị agẹẹwụ, dị ọ rẹ mẹ̀ aduwa yọ nị. Abụrahamị ọnọọ Óhomorihi hị́ eku yị nị.

⁷Ẹ yị nyị ka àa jị ọ ịrẹka ka ọza ana mẹ ka ò zé yị ọza o huna ọza ọnị ọ mẹ ka ò zé yị nị.

⁸Aza anaa dọ agẹẹwụ aanị, eni vee sú. Ama â chẹrẹ ẹ tụ́ ini Iwe Ohomorihi ka Imerikizẹdẹkị oni o yi sú.

⁹Àa ka na kà a, Ábụrahamị mẹ sị agẹẹwụ yị Imerikizẹdẹkị, vị ọ sị mẹẹ ka vị Ireevi anaā dọ agẹẹwụ, ọnị raa tụ́ agẹẹwụ avọọ nị.

¹⁰Ya zụ kà a ka Ireevi yị yà ịnị ẹngụ Abụrahamị ana vị ohiku anị, ụmẹ ọnị Imerikizẹdẹkị sị na gẹrị Abụrahamị.

¹¹Anisirẹrị nịnị ệ dọ Imerikizẹdẹkị ọda, Ánireevi màa mẹ ohirẹsụ irehi Ohomorihi. Ụkọrọ ẹnịnị ọnọọ ọ̀ọ yaanị zụ mẹ ka aza ẹ̀ gụ, ẹ yị yaanị nyị ka à nyị ohirẹsụ ọsa anka Imerikizẹdẹkị; vị a yaanị aa kà a ka anka Eerọnị nị.

¹²Àa sị oze ana a zịị̄ sị ohirẹsụ irehi Ohomorihii vara, áa nyị ka à rẹ vara ọda.

¹³Ananyị yị ọnị yaa kà aanị, ọnị vị ana hụụnị ovwoovu ọsa vẹ. Ẹẹ̀ yị nyị ịpa anị ana vịdị mẹ ohirẹsụ irehi Ohomorihi da.

¹⁴Yâ yẹ ka Ananyị yị vị ana chị hụụnị ovwoovu Ijuda vẹ. Imosiisi ọ yị hị́ ịrẹha anovwoovu ọnọọ, àaa kà ịrẹyị ini oze ohirẹsụ irehi Ohomorihi.

¹⁵Ịsị ẹ mẹ ka ya yẹ ịsa ẹnẹnị hu avọọ, ọ vị ka áa nyị ka ohirẹsụ irehi Ohomorihi ọsa anka Imerikizẹdẹkị ọ̀ vẹ nị.

¹⁶Ẹ yị vị oze ọda Ovwoovu ọ sị vị ohirẹsụ irehi Ohomorihi. Ịsị ọ sị vị ohirẹsụ irehi Ohomorihi vị ana jẹẹ ịrẹsụ ụkata ọyịyara pooro zịna-zịna.

¹⁷Â chẹrẹ ẹ tụ́ ini Iwe Ohomorihi ka: Ẹwa vị ohirẹsụ irehi Ohomorihi pooro zịna-zịna anka Imerikizẹdẹkị nị.

¹⁸Ịrẹyị oni Ohomorihi vịdị mẹ ọda anị, ọ raà kụ́ ọ kwooze agụvị ka ẹ yị nyị ụkata, ẹ yị rẹ nyị ọgụ yị ọza.

¹⁹Ọda Imosiisi ọnọọ ọ yị zụ mẹ ka ọza gụ. Ama ịsị Ohomorihi kụkụ sị vẹ, ọnị sị eyi tụra booro aanị o hu nị, agụvị ka ini oze anị ya zụ gụrị Ohomorihi.

²⁰Ịsa ọsa ọ rẹ vị ka Ohomorihi ộ hị́ eku ka Ijeesu ọ vaa vị ohirẹsụ irehi Ohomorihi nị.

²¹A mẹ̀ sị anovwoovu Ireevi ka ẹ̀ vị ohirẹsụ irehi Ohomorihi, ọza ọ yị hị́ eku yị wa. Dị Ijeesu ọnị va vị ohirẹsụ irehi Ohomorihi, Ohomorihi ộ hị́ eku yọ ka: Ọnị Ohomorihi ọ raà hị́ eku, ọnị ẹ yị vaa vara ayị ka: ẹwa vaa mẹ ohirẹsụ irehi Ohomorihi pooro zịna-zịna nị.

²²Agụvị eku ọnọọ, Ijeesu sị zụ̀ ka oto oni Ohomorihi wo o zoza hu nị.

²³Ohirẹsụ irehi Ohomorihi ana vọ ẹnị ẹ́ẹ rụrụ, agụvị ka eyee sú, ẹ yị zụ yà ịnị ụkọrọ ẹnịnị pooro zịna-zịna.

²⁴Ama Ijeesu ọnị vị ana yára pooro zịna-zịna. Agụvị avọọ, ẹ yị nyị ka ọza ẹnẹsa ọ̀ na dọ ọ ịrẹsụ, dị ọ̀ọ mẹ ohirẹsụ irehi Ohomorihi.

²⁵Ọza ana àa zị oze ịnị ụvọ anị vẹ ịdị Ohomorihi, ọ zụ dọ wa há ịnị ụmẹ tụra ụmẹ, agụvị ka ọ́ọ yàra pooro zịna-zịna ka ọnị ọ̀ọ da ịpẹẹ yị Ohomorihi agụvị ẹnịnị.

²⁶Ijeesu ọ vị ohirẹsụ ọbanyị irehi Ohomorihi ene rere yi nị. Ọnịnị ọ vị nị, ọ yị mẹ̀ ịsa odivi vụrụ-vụrụ. Ohomorihi ọ raà sị ọ hụụnị akakana ọnịvị nịnị, dị ọ sị ọ tụ́ ẹbẹẹba keekere nị.

²⁷Oni e yi véné ohirẹsụ ẹbanyị irehi Ohomorihi ana vọ. Ẹ yị nyị ka ọ̀ọ mẹ̀ ịsọvọ eyinị-eyinị yị ịvị ẹngụ anị da, ọnịrị agụvị ịvị aza ana vọ. Ụpẹ ọnya gene-gene ọnị mẹ̀ ịsọvọ anị nị, ụmẹ ọnị ọ sị ẹngụ anị mẹ̀ ịsọvọ.

²⁸Ọda Imosiisi ộ nyị aza ẹnẹ ẹ̀ yị gụ ka ẹ vị ohirẹsụ ọbanyị irehi Ohomorihi. Ama oto oni Ohomorihi wo, ọ tụra ọda vẹ nị. Ọnị ọ nyị Ozi Ohomorihi ana a mẹ ka ọ gụ pooro zịna-zịna nị.