Read ebira Ijemiisi 3 Bible Online

Ijemiisi 3 - ebira bible

Ijemiisi 3

¹Ẹwụ nịnị ẹyịnyara amị, ẹ́ yị vọrọ ka avaba awụ nịnị òo sì ka wa vị ọzwọzịsa nịnị oo! Wáa yẹ nịnị ka ẹyị ọzwọzịsa ọkarẹyị anị vee divii hu nị.

²Avaba ayị oō nyeeyi ini oze irenyi-irenyi nị. Àa nyị ọza ene è yi mē nyeeyi kà ịrẹyị, ọza ọnọọ ọ́ọ gụ; ọ nyẹngụ rẹ sị ụvọ za ẹngụ anị bẹẹ.

³Umaata ọ́ọ banyị; yèe sì ka ọ̀ zụ wụ́ ịrẹyị ayị, dị ị sị enyusẹ oweyi ọnya chee aanị chiree irenu, dị yaa sịị zụ̀ ọọ oze.

⁴Wéé re re ẹpa, ịzị ọ mẹ̀ hi banyị na za, dị ahịka ahị ọbanyị aa mẹ ka ọ̀ zị ụsẹ nị? Ọchị kiiki aanị ọ́za ana aa họ̀ ọ, aa sịị zụ̀ ọọ oze, ịzị òo sì ka ọ̀ zị nị.

⁵Avọọ ị́rarẹ mè weyi ẹtẹẹtẹrẹ ịnị ịsa ịnị ọchẹngụ ọza nị, ama ọ zụ kà ịrẹyị ẹbanyị-ẹbanyị. Wáa yẹ nịnị ka ịra kiiki aanị ọ zụ rị ụnọmị ọyịvụrụ ịra.

⁶Ịrarẹ vị ana sị mẹẹ anka ịra avọọ. Avaba ịsa edivi ene hi ịnị ẹhẹ ọnọnị hi ịnị ịrarẹ ọza, dị ẹ na ngụ ịnị ẹngụ ọza, dị e du ọ. Ọ nyẹngụ jị ịra tụ́ ịnị avaba ẹhẹ ọza saka-saka. Ini eku ịra gẹdẹ-gẹdẹ ụ́kata ịra ọnọọ yà nị.

⁷Ọza ọ zụ pá avaba uye ọnịrị inomi nịnị ne beri ẹwụ nịnị ọnịrị uye ene hi ini enyi; ọza ọ raà pá wa da.

⁸Ama ẹ́ yị nyị ọza ana nyẹngụ sị ụvọ za ịrarẹ tịtẹ hẹẹ. Ọ mā tịtẹ hẹẹ, ịsa odivi ọ vị nị, ẹchịpa anị ọ zụ wụ̀ ọza.

⁹Ịrarẹ ị sịị̄ ga Ohomorihi Ananyị yị ana vị Ada ayị nị. Ọnị ị rẹ sịị̄ tụ́ ozirenuu hi aza ọnị Ohomorihi mẹ véné ẹngụ anị nị.

¹⁰Irenu ana aa sị ga Ohomorihi, ọnị a rẹẹ̄ sị tụ́ ozirenuu hi ọza nị. Ẹwụ nịnị ẹyịnyara amị, áá vọrọ ka ọ̀ vavọọ yà?

¹¹Ụsị enyi ọnya ọ́ọ́ nyẹngụ aa tụ́ enyi ohine ọnịrị enyi ọnyịrẹyịị jịnẹẹ vẹ?

¹²Ẹwụ nịnị ẹyịnyara amị, wéé re ọchị ezu ana aa tụ́ osinkara nịnị da, à vị ka dị ọ̀ọ tụ́ oromi? Avọọ gẹdẹ-gẹdẹ ụsị enyi ọnyịrẹyị ẹ yị nyẹngụ tụ́ enyi ohine jịnẹ.

¹³Àa nyị ọza ana ka ọnị ọ́ọ yẹ ịrẹyị, ene eyi anị hweyi ịnị ẹngụ awụ nịnị, ọza ọnọọ ọ̀ mẹ̀ ebira ozoza, dị ọ̀ rẹ ká ịrẹsụ hi. Ịrẹsụ ọkahi ọnọọ ọ vaa sị zụ̀ ka ọ́ọ yẹ ịrẹyị nị.

¹⁴Ama wàaa kụ́ ụhị ịnị ayị awụ, dị ụ wáa nyị ẹngụrẹyị, dị ahịka ẹngụ awụ nịnị kẹnẹ u ree sì ọyịzaa yị nị, ẹ́ yị vọrọ ka waa nyị irenu, dị ụ wa navọ ịzẹyịza tịtẹ di u wee cheeche.

¹⁵Ẹngụ ịrẹyọyẹ ẹnẹẹ ẹ́ yị vị ịdị Ohomorihi ẹ hụrẹ vẹ, ama ịnị ẹhẹ ọnọnị ẹ hụrẹ vẹ nị, Ụhwẹ Ọnịnị ẹ́ yị nyị ụvọ tụ́ ọọ, ụkọrọ ụhwẹ echu nịnị ị yọ nị.

¹⁶Ịzị aza ẹ̀ẹ yà aa kụ̀ ụhị, dị ahịka ẹngụ ẹnịnị kẹnẹ e re sì ọyịza yị nị, ezigi ọnịrị ịsa edivi ẹ mā ta hụụ ịzọọ.

¹⁷Ama ịrẹyọyẹ ana hụụ ịdị Ohomorihi vẹ, vị ọnịnị, ọ́ọ mẹ ka ọza ọ̀ nyị ayị ohunẹnẹ; ọọ̄ nyị ebira hẹẹ, oō ree batọ ịrẹyị ọza ẹnẹsa, ọọ̄ rẹẹ vayị ọza ẹtẹẹtẹrẹ. Ebira ozoza ọọ̄ mẹ̀ pooro nị, ọ mā nyị ọza remeyi, oō mee re vene ọza.

¹⁸Ọza eneē sì ẹngwọọrọ gụ aza ẹnẹsa ụvọ ka ẹnị ẹ̀ rẹ nyị ẹngwọọrọ. O vee re ka ịzẹyịza ọ vị ọdịrẹma ịsa ẹnẹ ẹyaa mẹ nị.