Read ebira 1Ipita 1 Bible Online

1Ipita 1 - ebira bible

1Ipita 1

¹Ẹma vị Ipita ana vị odeyi Ijeesu Ikirisiti nị. Maa chẹrẹ iwe ọnọnịị tụ́ụ hi wu nịnị aza oni Ohomorihi nyị mẹ aza anị, ana gara hi avaba aha, dị ẹ vị ọzọga hi ịnị ẹkụra Ịpọntụsị, Ịgaratịya, Ikapadosiya ọnịrị Esiya beri Ibitiniya.

²Ohomorihi Ada ayị ô vịdị si o ro tịtẹ, dị ọ va nyị wụ nịnị nị. Ộ sị Ụhwẹ Ọnịnị anị nyị wụ nịnị tịtẹ yị ẹngụ anị, ka wa wụ́ ịrẹyị Ijeesu Ikirisiti nịnị, dị e che anya anị sẹ́ wụ nịnị. Ohomorihi ọ̀ mẹ ọyịza ọnịrị ẹngwọọrọ anị yị wụ nịnị hu avọọ hu avọọ!

³À vẹ ya sị ụga yị Ohomorihi ana vị Ada Ijeesu Ikirisiti Ananyị yị! Ohomorihi ộ vayị ayị ẹtẹẹtẹrẹ, di o tenyi yị ma nị. Agụvị avọọ yáa nyị ọyịtureyi ka ị vaa yara ịdị anị pooro zịna-zịna, agụvị ka Ijeesu Ikirisiti ộ ha kwẹẹtẹ hụụnị isu.

⁴Ị rẹ vaa dọ ẹyịza oni Ohomorihi sị tẹ tụ́ ịnị ihinẹba yị aza anị. Ẹ yị nyị ịsị e zụ du ẹyịza ẹnẹẹ vụrụ-vụrụ, ẹ yị ma rẹ sa.

⁵Ohomorihi raà sị ụkata anị sere wu nịnị, ana sị ayị tụra a, agụvị dị avaba aza e zụ ree gedebee ịnị ụmẹ ọdịrẹma, ka Ohomorihi ọ raà dọ wụ nịnị há.

⁶Agụvị avọọ waa jẹ nịnị, wàa daka aa rị ụya nịnị ọyaanị agụvị ẹzamare irenyi-irenyi. Ụmẹ chee ụ́yọrị ọnọọ vị nị.

⁷Iruvo ẹzamare ẹnẹẹ ọ vị ka è zu ré ka ẹdọwụ obooro ụ nyị nịnị nị. Wâ yẹ igooru nịnị, ana ahịka oō du; ịra aā sịị zama a re ka à yẹ, àa vị obooro ọ vị nị. Avọọ ọ mẹ rẹ vị yị ẹdọwụ awụ nịnị nị, ana ahịka óo huna igooru ẹtẹẹtẹrẹ. Àa zama ẹdọwụ awụ nịnị re, dị ọdịrẹma anị vị ụga ọnịrị ụbanyị ne beri igirima, ịhị Ijeesu ọ̀ọ sị ẹngụ zụ̀.

⁸Wẹẹ̀ yị daka sị eyi awụ nịnị re Ijeesu Ikirisiti da, ama we yi sì ịrẹyị anị nịnị. We yi si eyi ree nịnị booro aanị, ama wáa sị ayị tụra a nịnị, ana ahịka ayị awụ nịnị ee hine ẹtẹẹtẹrẹ oni irenu ọ̀ yị zụ kà.

⁹Agụvị ka waa sị ayị tụra a nịnị, ọ vaa dọ wụ nịnịị há nee tù ẹtẹ.

¹⁰Ịnị ụmẹ ịyẹẹyẹ, ọnịsẹ nịnị ệ kà ịrẹyị ini oze ayamva oni Ohomorihi vaa vayị awụ nịnị. Ê sì iruvo hwịnị-hwịnị ka ẹnị ẹ̀ yẹ, Ohomorihi mẹmẹ vaa dọ wụ nịnịị há.

¹¹Ụhwẹ Ọnịnị Ikirisiti ana yà ịnị ayị ẹnịnị aa kà a yị wa, Ikirisiti mẹmẹ vaa rị ụya dị à va sị igirimaa yọ. Eyee sì ka ẹnị ẹ̀ yẹ ụmẹ ọnị ịsa ẹnẹnị vaa sị mẹ ọnịrị ọ mẹmẹ vaa yà.

¹²Ohomorihi ộ sị zụ wa ka ẹwụ nịnị ẹyaa mẹ ụkọrọọ yị nị, ẹ́ yị vị ẹngụ ẹnịnị. Aza anaā kà enube ọyịza ệ kà a wụ nịnị, anka Ụhwẹ Ọnịnị ana a tụ́ hụrị ẹbẹẹba vẹ mẹ̀ sị ụkata yị wa. Anggẹẹrị nịnị nyẹmba bẹẹ ee sì ka eni è re ịsa ẹnẹnị.

¹³Agụvị avọọ, tenyi ayị awụ nịnị, dị ụ wa ẹ sị ụvọ za ẹngụ awụ nịnị! Sị avaba ayị awụ tụ́ ịnị ẹyịza oni Ohomorihi vaa sị yị wụ nịnị, ịhị Ijeesu Ikirisiti ọ̀ọ sị ẹngụ zụ̀.

¹⁴Waa wụ́ ịrẹyị chire Ohomorihi nịnị, asị ụ kụkụ sị ẹngụ yị ịsa edivi ọnị ụ vịdịị mẹ nịnị, ịjị ụ wẹ̀ yị yẹ Ijeesu Ikirisiti nịnị.

¹⁵Ohomorihi ana hị́ wụ nịnị, vị ọnịnị; agụvị avọọ, ẹwụ nịnị ọ̀ rẹ vị ọnịnị ịnị avaba ebira awụ nịnị!

¹⁶Â chẹrẹ ẹ tụ́ ini iwe Ohomorihi ka Ohomorihi ka: Vị ọnịnị nịnị, agụvị ka ẹmị vị ọnịnị.

¹⁷Wàa mẹ̀ aduwa nịnị, ụụ̄ hị́ Ohomorihi: Nda, nịnị. Ohomorihi àaa mẹ̀ ọkarẹyị aza anka ịsị ẹ mẹ, ọ mā mẹ irikichi; agụvị avọọ, nyị angwahi Ohomorihi ịnị avaba ịsa ọnị ụ waa mẹ nịnị, ụ mẹ̀ vị ọzọga hi ẹhẹ nịnị booro aanị.

¹⁸Wâ yẹ nịnị ka Ijeesu Ikirisiti ọ sị wụ nịnị hị́ varẹma hụụnị oze osusu oni ohiku awụ nịnị vịdị aa zị. Ẹ́ yị vị igooru ọnịrị ọmọ eneē du, ọ sị hị́ wụ nịnị varẹma,

¹⁹ama anya Ikirisiti ụvọta ana vị ịsa ọkụmị-ọkụmị yọ nị. Anya ọnọọ vị ana sị mẹẹ anka anya ozi atẹmẹ ana a sịị̄ mẹ̀ ịsọvọ ẹnẹ ẹ̀ yị mā nyị ịdọtị, àa vị ụkụ vụrụ-vụrụ.

²⁰Hụrị ụmọrụmọ dị a va yẹ ka aa mẹ ẹhẹ, Ohomorihi hụrẹ mẹ eto tịtẹ ka Ikirisiti vavọọ vaa mẹ nị. Dị ọ sị Ijeesu zụ̀ gedebee agụvị awụ nịnị ịnị ụmẹ ọdịrẹma ọnọnị, ẹnẹ ẹhẹ aa vaa ta aanị nị.

²¹Ọnị ọ mẹ ka wa sị ayị tụra Ohomorihi nịnị nị, ana ha Ijeesu Ikirisiti kwẹẹtẹ hụụnị isu, dị ọ rẹ sị ụbanyị yọ nị. Agụvị avaba ịsa ẹnẹnị ẹ́dọwụ awụ nịnị ọnịrị ọyịtureyi awụ nịnị vị ana yà ịdị Ohomorihi.

²²Wa sị ẹngụ awụ nịnị vara aza ọnịnị, agụvị ka waa saasa ịzẹyịza Ohomorihi nịnị; agụvị avọọ di u kuku ee sì ịrẹyị ọdọwụ anda ayị nịnị ẹtẹẹtẹrẹ nị. Agụvị avọọ, wa yịị sị avaba ayị awụ nịnịị sì ịrẹyị ẹngụ nịnị ẹtẹẹtẹrẹ.

²³Ohomorihi ọ sị wụ nịnị tenyi ma ini oze ịrẹyị anị ana yára, dị ọ rẹ jẹẹ pooro. Ẹ́ yị vị ọza ana ahịka oō sú, o tenyi wụ nịnị ma, ama Ohomorihi ana yára zịna-zịna pooro yọ nị.

²⁴Avaba aza vị ana sị mẹẹ anka avị avọọ Uzoza ọza vị ana sị mẹẹ anka ododo avị Ịjị avị ọ̀ọ sị wụ̀, dị ododo anị wọ̀rọ̀ va ha.

²⁵Ama ịrẹyị Ohomorihi Ananyị vị ana yịị yọ pooro zịna-zịna. Ịrẹyị ọnọnị ọ vị enube ọyịza ana aa kà a wụ nịnị nị.