Read ebira 1Ipita 3 Bible Online

1Ipita 3 - ebira bible

1Ipita 3

¹Ẹwụ nịnị ese, ká ịrẹsụ hi yị ọva awụ nịnị, agụvị ẹnyị ẹnẹ ẹ̀ yị dọ ịrẹyị Ohomorihi wụ́, èe re ebira awụ nịnị, ịsavọọ ẹ̀ zụ dọ wụ́. Wẹ̀ yị daka sị irenu kà a yị wa,

²e vee re ka wáa nyị ebira ozoza ọnịrị ka wáa nyị angwahi Ohomorihi nịnị.

³Asị ụ sị ayị tụ́ ịnị ọvị ahaahara ọyịmẹ̀, ẹhụụ ẹyị ọkajuwa oyigu ọnịrị igooru ọ̀yịhara hi ẹngụ beri ịta ẹbanyị-ẹbanyị ọ̀yịza kẹnẹ.

⁴Ama navọ ọvị awụ nịnị ọ̀ vị ọvị ịnị ayị, ẹhụụ ayọnẹtẹ ọnịrị ebira hẹẹ; ẹngụ ọvị ẹnẹẹ e mē du, ịsa obooro ẹ rẹ vị ini eyi Ohomorihi nị.

⁵Ịsị anyẹnẹẹ ọnịnị ịyẹẹyẹ ana tụra Ohomorihi eyi sị mẹ ẹngụ ẹnịnị ọvị, ọ vị ọnọọ nị. Ẹnịnị ệ ka ịrẹsụ hi yị ọva ẹnịnị.

⁶Ọnyara ịnị ẹnịnị vị Isera, ose Abụrahamị. Ộ sị ụbanyị yị Abụrahamị, dị aa hị́ ọ Ịnda nị. Wa sị vara ezi anị nịnị, wàa nyị ebira ozoza, di u wè yi hí angwa ọza nịnị nị.

⁷Ẹwụ nịnị ọva, wa rẹẹ mẹ̀ ebira ẹtẹẹrẹ hi ese wu nịnị bẹẹ, wâ yẹ nịnị ka ọkụmị ẹ vị nị. Sị ụbanyị yị wa, agụvị ka Óhomorihi mẹ̀ sị ụhwẹ ana yára pooro zịna-zịna mẹ wụ ẹyịza, avọọ ọ mẹ̀ rẹ sị yị ese wu nị. Wa vavọọ mẹ nịnị, agụvị asị a nyị ịsị ẹ dọ aduwa awụ nịnị oro.

⁸Dị ma za ịrẹyị amị ẹtẹ, sị ayị yị ẹngụ nịnị, waa ngụ ayị ẹngụ nịnị, di u wee sì ịrẹyị ẹngụ nịnị, agụvị ka ẹwụ nịnị ọdọwụ vị ẹyịnyara. Vayị ẹngụ nịnị, dị ụ wa kà ẹngụ awụ nịnị chí.

⁹Asị ụ sị odivi sí atọ odivi! Ọza ọ̀ọ kụ́ wụ ụhụ, asị ụ vàa yị ọ. Ama waa mẹ̀ aduwaa yị ọ. Wâ yẹ ka Ohomorihi ee sì ka ọnị ọ̀ mẹ wụ nịnị ẹyịza; agụvị avọọ ọ hị́ wụ nịnị nị.

¹⁰Â chẹrẹ ẹ tụ́ ini Iwe Ohomorihi ka, Ọza ene èe sì ka ẹhẹ anị ò zoza, dị ò hine ọnị, ọ hụụnị ịrẹyị odivi ọyịkà, dị asị o re cheeche.

¹¹Na hụụnị ebira odivi ọyịmẹ̀, dị ọ̀ọ mẹ̀ ebira ọyịza, dị ọ̀ rẹẹ sị avaba ayị anịị sì ẹngwọọrọ.

¹²Ananyị yịị̄ sị eyi pe ọnịzẹyịza, ọọ̄ sị ụtọọ pe wa ẹ̀ẹ yaa dá ịpẹ. Ama ọọ̄ và eyi ịrazịị kà aza anaa mẹ̀ ịsa odivi.

¹³Sị ọza nyẹngụ sị mẹ wụ nịnị, wàaa sịị vụrị ka wa mẹ̀ ịsa ana vọrọ nịnị?

¹⁴Àa daka aa sị ụyaa rị wụ agụvị ka wáa vị ọnịzẹyịza, waa jẹ nịnị! Asị ụ hí angwa aza ene ee sì ka ẹnị ẹ̀ sị ụya rị wụ nịnị. Asị ayị awụ nịnị hụ agụvị avọọ vazi.

¹⁵Ama ịnị ayị awụ nịnị, sị Ikirisiti mẹ ọza ana nyị wụ nịnị. Ụmẹ tụra ụmẹ ana àa nyị ọza ana họ̀ wụ nịnị ka: Sị ụ maanị sị eyi tụra? Tenyi ẹngụ di u we tụ́ o ohi.

¹⁶Ama re ka waa và ayị nẹtẹ, dị ụ wa rẹ sị ụbanyị yị wa. Nyị ayị ozoza, agụvị aza ana àa kà ịrẹyị odivi awụ nịnị, ụhị ọ̀ zụ nyị aza ẹnẹẹ ana aa kụ̀ wụ nịnị ụhụ, agụvị ka aza vee re ka ebira awụ nịnị óo zoza anka ọza ana aa saasa Ikirisiti.

¹⁷Ộ vana dahi ka ọza ọ̀ rị ụya, agụvị ka ọ́ọ mẹ̀ ịsa ozoza, àa vị ịsị Ohomorihi sì ọ vị ọnọọ nị, hu ka ọza ọ̀ mẹ̀ ịsa odivi, dị ọ rị ụya anị.

¹⁸Ikirisiti ộ rị ụya o mè sú agụvị ịvị ayị ụpẹ ọnya gene-gene. Ikirisiti ẹnẹ ẹ̀ yị mẹ ịvị, ô sú yị aza ana mẹ ịvị, agụvị dị ọ̀ zụ sị yị vẹ ịdị Ohomorihi. Aza ệ wụ ọ, ama â mẹ ka ụhwẹ anị ọ̀ yara.

¹⁹Dị ọ sị ụkata ụhwẹ anị ọnọọ na kà ịrẹyị Ohomorihi yị ụhwẹ nịnị ene hi ịnị ẹngwa ịzọọ.

²⁰Ụhwẹ ẹnẹnị vị ụhwẹ aza ana mẹ akamawụ hi Ohomorihi ịyẹẹyẹ. Ụmẹ ọnọọ Ohomorihi ộ nyị isuuru, di Inowa aa mẹ ẹpa ọbanyị ọnọọ nị. Aza chee, ẹnị ịhịnta kẹnẹ ẹ ngụ ịnị ẹpa ọnọọ, dị ẹpa ọnọọ ya ịnị enyi, dị ọ dọ wa ha nị.

²¹A zụ sị ịsa ọnọọ juwe ọyịhwenyi, ana dọ yị há ọyaanị, agụvị ka Ijeesu Ikirisiti ộ ha kwẹẹtẹ hụụnị isu. Ọyịhwọzenyi ọ yị vị ọyịhụ ịdọtị ẹngụ ayị và ha. Ama yaa sịị dá ịpẹẹ yị Ohomorihi ka ọ̀ nyịna ayị ayị hụụnị ịvị.

²²Ikirisiti ọ zị nọ ịdị Ohomorihi. Ọ yaayịtẹ éyi ụvọrị Ohomorihi. Ọnị ọ vị Ohinọyị tụ́ ịrẹsụ anggẹẹrị nịnị ọnịrị avaba ịsa ana nyị ụkata ọnịrị ọda tụ́ ịdị Ohomorihi nị.