Read ebira 1Ipita 4 Bible Online

1Ipita 4 - ebira bible

1Ipita 4

¹Wáa yẹ nịnị ka Ikirisiti ọnị nyẹmba ọ́ọ rị ụya ịnị ọchẹngụ anị. Agụvị avọọ ẹwụ nịnị ò re tenyi ẹngụ, dị ụ wa vavọọ nyị ariro nịnị! Ọza ana àa vavọọ rị ụya, ọ sị hụụnị ịvị ọyịmẹ̀.

²Ịnị avaba ẹhẹ awụ nịnị ana vọ, sị ụ kụkụ sị ẹngụ awụ yị ịsa ẹhẹ ọnọnị ọnị ọchẹngụ ọzaā sì! Ama wee sì ịsị Ohomorihi òo sì nịnị.

³Ụmẹ ọnị vịdị sị mẹ̀ ịsa ọnị anarịmadọwụ nịnịị̄ mẹ avọọ, óo ze. Ịsị ụ vịdịị mẹ nịnị yị: Ebira kẹnẹ-kẹnẹ, ịsa edivi ọnị ọchẹngụ ọzaā sì, di u wee hú eche dị aa mẹrị wụ nịnị; dị ụ raa rị ịsa di u wee hú eche chavaa nịnị kẹnẹ. Ụ rẹẹ̄ hẹkẹ ori nịnị ana vị ịsa Ohomorihi ò yi sì vụrụ-vụrụ nịnị.

⁴Ama booro aanị we yi kuku pe wa mẹ̀ ịsa edivi-edivi ẹnẹẹ nịnị. O si hí wa irenu, agụvị avọọ, dị ẹyaa kụ̀ wụ nịnị ụhụ nị.

⁵Ẹnịnị vaa kụ́ irenu ẹnịnị ọ́vịdị Ohomorihi ana sị ẹngụ tenyi ka ọnị vaa mẹ̀ ọkarẹyị aza ana yára ọnịrị aza ne wusu.

⁶Iruvo ana sị kà enube ọyịza yị oku nịnị, ọ vị ka ụhwẹ ẹnịnị ẹ̀ zụ yára, anka Ohomorihi mẹ̀ yára, ọ̀ọ daka vị ka Ohomorihi ộ vị raa mẹ̀ ọkarẹyị yị wa, ẹ mẹ̀ yị yà ịnị ẹhẹ anka aza ana vọ.

⁷Ụmẹ ẹnẹ ẹhẹ ọnọnị vaa sị zẹtẹ, ọ sị gụrị ẹtẹ. Agụvị avọọ sị ụvọ za ẹngụ awụ nịnị, dị ụ wa sị eyi pe ẹtẹ, agụvị dị ụ wa zụụ mẹ̀ aduwa nịnị!

⁸Ịsị e hu keekere yị: Wee sì ịrẹyị ẹngụ nịnị pooro, agụvị ka wèe sì ịrẹyị ẹngụ nịnị, ọ vaa mẹ ka à vagu ịvị ọrụrụ-ọrụrụ.

⁹Wee si ẹngụ ọzọga nịnị, dị asị u ti tụ́ ịnị anị nịnị.

¹⁰Ohomorihi ộ sị ịsa irenyi-irenyi mẹ ọzịnya-ọzịnya awụ nịnị ẹyịza. Wa vavọọ sị ịzẹyịzaa sị ịsa oni Ohomorihi òo si chire wu nịnị ụvọọ mẹ ọgụvọọ yị ẹngụ nịnị.

¹¹Ọza ana àa kà ịrẹyị, ọ̀ọ kà a dị aza ẹ̀ yẹ ka Ohomorihi ọ sị ịrẹyị ọnọọ yọ nị. Ọza ana àaa mẹ ọgụvọọ yị ọza, ọ̀ọ sị avaba ụkata ọnị Ohomorihi sị yọọ mẹẹ. Wa vavọọ mẹ nịnị, agụvị dị aza ẹ̀ẹ sị ụgaa yị Ohomorihi ịnị avaba ịsavị-ịsavị agụvị Ijeesu Ikirisiti. Ohomorihi ọ nyị igirima ọnịrị ụkata nị, avọọ ọ mẹ vaa yà pooro zịna-zịna nị. Aamị.

¹²Ẹwụ nịnị ẹyịnyara amị, asị o hí wu nịnị eyi agụvị ụyọrị ẹbanyị-ẹbanyị ene ee tù wu nịnị, dị aa zama wụ nịnịị re. Asị ụ re e ịrẹyị ọzọga nịnị.

¹³Ama waa jẹ nịnị, agụvị ka waa rị ụya nịnị, anka Ikirisiti mẹ̀ rẹ rị ụya, agụvị ịhị ụbanyị Ikirisiti ọ̀ọ sị ẹngụ zụ, ayị awụ nịnị ò zụ hine hu avọọ.

¹⁴Aza àa kụ̀ wụ nịnị ụhụ agụvị Ikirisiti, ọyịza ọ vaa vịị yị wụ nịnị nị; agụvị ka Ụhwẹ Ọnịnị ana nyị ụbanyị yàa wụ nịnị ịrẹma.

¹⁵Asị ụ na hị́ ụya tù ẹngụ awụ nịnị, agụvị ka waa mẹ̀ ịsa odivi nịnị ẹ̀ hụ ọza ọyịwụ ọnịrị oyi oyiyi beri eyi ọyị jị ngụ ịrẹyị ọnịrẹyị.

¹⁶Ama ọza àaa rị ụya agụvị ka ọ́ọ vị ọdọwụ, asị ụhị nyị ọ. Ama ọ̀ọ sị ụgaa yị Ohomorihi, agụvị ka a vaa yẹ ka evere Ikirisiti ọ vị nị.

¹⁷Ụmẹ ọkarẹyị o si tù, aza Ohomorihi Óhomorihi vaa vịdị aa mẹ̀ ọkarẹyị anị nị. Àa vị ịdị ẹyị aza Ohomorihi, ọkarẹyị nyima hụrẹ nị, si ụ ro ka ọ vaa vị ẹzẹtẹ aza ẹnẹ ẹ̀ yị dọ enube ọyịza Ohomorihi wụ́?

¹⁸Iwe Ohomorihi ộ kà a ka: Akanya-akanya a vaa sị dọ ọnịzẹyịzaa há nị. Àa vavọọ yọ, si u ro ka o vee tù aza ẹnẹ ẹ̀ yị yẹ Ohomorihi, dị ẹ rẹ yaa mẹ̀ ebira odivi?

¹⁹Agụvị avọọ aza ana aa rị ụya agụvị ka Ohomorihi ọ́ọ vavọọ sì ọ, ẹ̀yịị mẹ ọyịza, dị ẹ̀ sị ẹngụ ẹnịnị chire Ohomorihi ụvọ! Ohomorihi ana tụ́ wa vẹ ẹhẹ vị ọnịzẹyịza.