Read ebira 2 Ịjọọnụ 1 Bible Online

2 Ịjọọnụ 1 - ebira bible

2 Ịjọọnụ 1

¹Ẹmị ana vị ọzọkụ ịragụ Ohomorihi aa chẹrẹ iwe ọnọnịị tụ́ụ hi wu, onyeyiza ayị ọnị Ohomorihi nyị ọnịrị ezi anị. Mée sì ịrẹyị awụ nịnị ẹtẹẹtẹrẹ. Ẹ yị vị ẹmị ịnya kẹnẹ o sì ịrẹyị awụ nịnị, ama avaba aza ana sị ịzẹyịza dọ.

²Agụvị ka ịzẹyịza ọnọọ yà ịnị ayị ayị, vị ọ rẹ vaa yà ịnị ayị ayị pooro nị.

³Ohomorihi Ada ayị ọnịrị Ozi anị Ijeesu Ikirisiti ẹ̀ mẹ ọyịza yị yị, dị ẹ̀ rẹ sị ẹngwọọrọ yị yị. Ọ vaa sịị yị ị màa saasa ịzẹyịza anị, di i ree sì ịrẹyị ẹngụ.

⁴Ịnẹ amị ô hine ẹtẹẹtẹrẹ m mè re ka ezi ewu ẹnyị aa mẹ ịzẹyịza anka Óhomorihi Ada ayị mẹ̀ mẹẹ ọdaa yị.

⁵Onyeyiza amị, aarịhịnị maa dá ịpẹẹ wụ; ẹ́ yị vị ka m maa chẹrẹ ọda ọwọọwa tụ́ụ hi wu nị. Ọda ọnị ị vịdị sị wụ́ hụrị ụmọrụmọ yịị yọ nị, ka ye sì ịrẹyị ẹngụ.

⁶Yèe sì ịrẹyị Ohomorihi, ị rẹ vaa saasa ọda anị. Ọda anị ọnọọ ọnị ụ vịdị sị wụ nịnị hụrị ụmọrụmọ ọ vị ka yee sì ịrẹyị ọza nị.

⁷M maanị aa kà a agụvị ka enevene nịnị ẹ sị gara hi ẹhẹ. Ẹnịnị ẹ yị dọ ka Ijeesu ộ vẹ ẹhẹ anka ọza. Ẹngụ aza ẹnẹẹ vị enevene, ọnịvị Ikirisiti ẹ rẹ vị nị.

⁸Sị eyi pe ẹngụ awụ nịnị agụvị asị ụkọrọ awụ nịnị na vị osusu, ama dị ụ wa zụ rị ọgụ ụkọrọ awụ nịnị gụ.

⁹Ọza ẹnẹ ẹ̀ yị jẹẹ pe ịrẹyị ọnị Ikirisiti sị zụ̀ yị, ama di ee benee hi ọ nị, ọ yị yẹ Ohomorihi. Ama ọza ana àa jẹẹ pe ịrẹyị ọnị Ikirisiti sị zụ̀ yị, ọza ọnọọ ọ́ọ yẹ Ohomorihi Ada ayị ọnịrị Ozi Ohomorihi nị.

¹⁰Àa nyị ọza ana vẹ ini eehi awụ nịnị, dị ẹ̀ yị vị ịrẹyị ọnị Ijeesu sị zụ̀ yị ọ za vẹ nị, asị ụ dọ ọ tụ́ ini eehi awụ nịnị, asị ụ hyakụ kụ́ ọ nịnị vụrụ-vụrụ.

¹¹Mị vavọọ aa kà a agụvị ka ọza ana àa kụ́ ọ, ọ sị bẹ tụ́ ịnị ụkọrọ odivi anị.

¹²Máa nyị ịrẹyị ọrụrụ-ọrụrụ oni mi sì ka ma ka ma kà yị wụ, ama me yi sì ka ma chẹrẹ wa tụ́ hi wu. Mée ro ka mee vee hee wu, di ye dudu kà ịrẹyị eyi gẹrị eyi, dị ayị ayị ò zụ hine ẹtẹẹtẹrẹ.

¹³Ezi onyeyiza awụ ọnị Ohomorihi nyị, ene hi ịzẹnị, ka ẹnị kụ́ wụ.