Read ebira Ẹtore 14 Bible Online

Ẹtore 14 - ebira bible

Ẹtore 14

¹Dị mị kana eyi nị, re, Ozi Atẹmẹ ọnọọ ọ́ọ jẹẹ ịrẹsụ Ataba Ịzayọnị. Dị aza ẹnị akawụ-akawụ oze ẹtarẹwụ tụra ẹẹva (144,000) jẹẹ pee nị. Áa chẹrẹ ịrẹha Ozi Atẹmẹ ọnọọ ọnịrị ịrẹha Ada anị tụ́ ini ibe ẹnịnị.

²Dị mị wụ́ ọngwẹ ọnya hụrẹ ẹbẹẹba vẹ anka enyi ene ee sì vụụ-vụụ avọọ ọnịrị anka apaana ihinẹba ọbanyị nị. Dị mị rẹ wụ́ ịsa, ọ màa sụ́ ịrẹyịị véné ịsa anaa sịị̄ jị ahẹ ene véné igita avọọ nị.

³Dị ẹ jẹẹ ọvịdị aga ohinọyị ọnọọ ọnịrị ịsa ẹẹna ẹnẹẹ ana nyị ụhwẹ, beri azọkụ ẹnẹẹ, dị ẹyaa jị ahẹ ọwọọwa ọnya nị. Ẹ yị nyị ọza ana zụ kọ ahẹ ọnọọ, ẹ̀ yị vị aza ẹnị akawụ-akawụ oze ẹtarẹwụ tụra ẹẹva ẹnẹẹ (144,000) ana a sị hị́ varẹma hụụnị ẹhẹ kẹnẹ.

⁴Aza ẹnẹnị ẹ yị zẹẹ ka anẹẹ è du ẹnị ẹngụ, ẹnịnị ẹ yị yẹ ọnẹẹ. Ẹnịnị ẹẹ̄ saasa Ozi Atẹmẹ ọnọọ nọ aha tụra aha ana àa nọ nị. A raà hị́ wa varẹma hụụnị akakana aza, vị ẹ yà anka ịsa ịnị aarẹ ịpaapa avọọ ana aā sịị tụ́ irenyi yị Ohomorihi ọnịrị Ozi Atẹmẹ ọnọọ nị.

⁵Ẹnịnị ẹ̀ yị sị irenu ẹnịnị kà ịrẹyị ireche da, ẹnịnị ẹyị nyị ohuvọ vụrụ-vụrụ.

⁶Me re re anggẹẹrị ọsa ene ee hira ẹ́bẹẹba. Ọ́ọ nyị enube ọyịza ana yà pooro zịna-zịna ana aa naa kà a yị aza ene hi ẹhẹ, avaba anẹkụra, aza ana aa kà ẹkụra irenyi-irenyi avaba ẹhẹ.

⁷Di o nowu tụ́ ẹba ka, “Nyị angwahi Ohomorihi, dị waa sị ụgaa yọ, agụvị ka ụmẹ ana aa sịị mẹ̀ ọkarẹyị anẹhẹ o si tù. Waa hẹkẹ ọza ana mẹ ẹbẹẹba ọnịrị ẹhẹ beri oku ọnịrị enyi ẹtẹ!”

⁸Dị anggẹẹrị ọsa aa saasa anggẹẹrị ịpaapa, dị aa hị́: “Ịbabịrọnị ọ sị hyẹdụ, ẹkụra ọbanyị ọnọọ ọ sị hyẹdụ; ọ sị ọyịkụ Ohomorihi yẹ, agụvị ka ọ raà kụ́ anẹhẹ ka ẹ̀ẹ sẹ̀ ịrẹka.”

⁹Dị anggẹẹrị ọhụta saasa wa, dị ọnị ree nowuu kà a ka, “Ọza ana àa hẹkẹ uye ịnị avị ọnọọ ọnịrị ori anị, dị ọ rẹ dọ apọtẹrẹwa tụ́ ini ibe anị, àa vị ịnị ụvọ anị nị,

¹⁰ọ vaa yẹ ọyịkụ Ohomorihi. Ọyịkụ anị ọnọọ vị ana sị mẹẹ anka ẹchịpa ohuru-ohuru avọọ, ọnọọ ká tụ́ ini ako ọyịkụ anị ana aza ẹnẹẹ vee hú. Dị ẹ yaa rị ụya ịnị ịra anaa sị ohuru tụ́ éyi anggẹẹrị ọnịnị nịnị ọnịrị Ozi Atẹmẹ ọnọọ.

¹¹Dị areyi ịra ana aa sị ụyaa rị wa, aa vàa hịrẹ pooro zịna-zịna. Aza ana àa hẹkẹ uye ọnọọ ọnịrị ori anị dị ẹ rẹ dọ apọtẹrẹwa ịrẹha anị nị, ẹ mā vana tụ́ ụhwọ́ pooro ọọdụ ọnịrị ịrahụ.”

¹²Ọsọnị ọ́ọ dọ ka aza Ohomorihi ana sị eyi pe ọda anị, dị ẹ rẹ sị ayị tụra Ijeesu, ẹ̀ẹ sị ẹngụụ dọ ịrẹyị.

¹³Dị mị wụ́ ọngwẹ hụrẹ ẹbẹẹba vẹ, dị ọ kà a mị ka, “Chẹrẹẹ ka aza ene èe sú agụvị Ananyị yị hụrẹ ọyaanị na, vaa daa jẹ! Dị Ụhwẹ Ọnịnị tụ́ ohi ka avọọ yịị yọ nị; ẹnịnị vaa tụ́ ụhwọ́ ịnị ụkọrọ ẹnịnị. Ẹyaa dọ ọgụ ụkọrọ ẹnịnị.”

¹⁴Máa kana eyi, di mi re eguhi ọvwọọvụ ọnya nị. Dị ọza ịnya aanị ana yà anka ozi ọza avọọ, yaayịtẹ ịrẹsụ eguhi ọnọọ nị. Dị ọ sị ọkẹkẹrẹkụ igooru ọnya aanị kú nị. Dị ọ sị ụhwọ ọnya aanị ana rẹ rị ụvọ nị.

¹⁵Dị anggẹẹrị ọsa jịnẹ hụụnị irehi Ohomorihi vẹ, di o nowu tụ́ ẹba, dị ọ kà a yị ọza ana yaayịtẹ ịrẹsụ eguhi ka, “Sị ụhwọ awụ, wa sịị mẹ̀ ịsa ọyịna, agụvị ka o si tù ụmẹ ka wa mẹ̀ ịsa ọyịna, ịsa ene hi ịnị ẹhẹ ẹ sị mẹ!”

¹⁶Dị ọza ana yaayịtẹ ịrẹsụ eguhi sị ụhwọ anị tụ́ ịnị ẹhẹ, di aa mẹ̀ ịsa ọyịna ịnị ẹhẹ nị.

¹⁷Anggẹẹrị ọsa rẹ jịnẹ hụụnị irehi Ohomorihi ana yà ẹbẹẹba vẹ nị. Ọnị ọ rẹ nyị ụhwọ ọnya aanị ana rẹ.

¹⁸Dị anggẹẹrị ọnya aanị ana sị eyi pe ịra ịnị ụta hụụ ịzọọ vẹ nị. Di o nowu tụ́ ẹba kà ịrẹyị yị ana nyị ụhwọ ana rẹ avọọ nị, dị ọ ka, “Sị ụhwọ awụ, dụ wa sị há ẹtụtụ ịvayịnị ene hi ẹhẹ, agụvị ka ẹ́ẹ ta ví.”

¹⁹Dị anggẹẹrị sị ụhwọ anị tụ́ ịnị ẹhẹ, dị ọ há ẹtụtụ ịvayịnị nị. Dị ọ kụ́ ọọ và hi ụkọ ọbanyị ịzị a yàā kwọrọ ẹtụtụ ẹnẹẹ nị. Ọnọọ vị ana jẹẹ yị ọyịkụ Ohomorihi.

²⁰Dị a kwọrọ ẹtụtụ ẹnẹẹ ị́rẹma ẹkụra nị. Dị anya ee sìi hụụnị ụkọ ọnọọ ẹtẹẹtẹrẹ nị. Óo sì gọdọ gụ ahụ akahịnta (1,600). Ọ́ọ nẹba tù irenu umaata.