Read ebira Ẹtore 21 Bible Online

Ẹtore 21 - ebira bible

Ẹtore 21

¹Di mi re ẹbẹẹba ọwọọwa ọnịrị ẹhẹ ọwọọwa nị, agụvị ka ẹbẹẹba ịpaapa ọnịrị ẹhẹ ịpaapa ẹ́ẹ ta. Òkū ọnị ọ rẹ sị wụ.

²Ẹmị Ịjọọnụ, mée re ẹkụra ọnịnị ọnọọ ana vị Ijerusarẹmị ka ee chíi hụrẹ ẹbẹẹba ịda Ohomorihii vẹ. Di e tenyi ọọ ẹngụ anka ọnẹẹ anaa mẹ ọvị yị ọva anị avọọ nị.

³Dị mị wụ́ ọngwẹ ọbanyị ọnya hụrẹ ẹbẹẹba vẹ, dị ọ ka, “Re! Irehi Ohomorihi yàrị aza. Ohomorihi yàrị aza. Ohomorihi vaa raa pe wa, dị ẹ vị aza anị. Dị Ohomorihi ọnị ụvọta yà ịda ẹnịnị, dị ọ vị Ohomorihi ẹnịnị.

⁴Ohomorihi vee nyee avaba ẹgọọ hụụnị eyi ẹnịnị. Ayị kụkụ vaa nyị iswọọza, ẹ yị nyị ayodu, àa vị orere. Ayị rẹ kụkụ nyị ịsị ẹ vaa zị ọza, agụvị ka ịsa ịyẹẹyẹ ẹ́ẹ ta saka-saka.”

⁵Dị ọza ana yaayịtẹ ịrẹsụ aga ohinọyị ọnọọ ka, “Re, maa mẹ̀ ka avaba ịsa ẹ̀ vị ọwọọwa.” Dị ọ rẹ kà a mị ka ma chẹrẹẹ nị, agụvị ka ịrẹyị ẹnẹnị vị ịzẹyịza, ẹ yị nyị ireche ịnị anị.

⁶Dị ọ ka, “A sị ọọ mẹ! Ẹma vị Arịhwa ọnịrị Omega nị, ọnị ọ vị ka ọnịpaapa ọnịrị ọdịrẹma. Ọza ene enyi àa kụ̀, mị vaa sị enyi ene ee sìi hụụnị enyi ẹtẹ anaā mẹ ka ọza ọ̀ yàra pooro zịna-zịna, yọ ọọhẹ.

⁷Ọza ana àa nyị ehuna, ọnị ọ vaa dọ ịsa ẹnẹnịị hụụnị ụvọ amị nị: Mị vaa vị Ohomorihi anị, dị ọnị vị ozi emi.

⁸Ama anangwahi ọnịrị aza ẹnẹ ẹ̀yị vị ọdọwụ, beri aza ana aā mẹ̀ ịsa enyisi, ọnịrị ọwọza nịnị beri ọsẹrẹka nịnị beri ẹnẹbẹ ọnịrị aza anaā hẹkẹ ori, ọnịrị avaba onireche nịnị vaa nyị aha ẹnịnị ini adagu ịra anaa sị ohuru tụ́; ọnọọ ọ vị isu ụpẹ ọhụva nị.”

⁹Ọnya ịnị anggẹẹrị ịhịmba ẹnẹẹ ana nyị ịchacha ịhịmba ana vị ohihi ụyọrị ọdịrẹma ịhịmba, o ve tù mi, dị ọ ka, “Vẹ dị ma sị ọnẹẹ ana vị ose Ozi Atẹmẹ ọnọọ zụ̀ wụ!”

¹⁰Dị Ụhwẹ Ọnịnị dọ avaba ayị amị, dị anggẹẹrị ọnọọ sị mị nọ ịrẹsụ ataba ọnya aanị ana nẹba ẹtẹẹtẹrẹ nị. Dị ọ sị ẹkụra ọnịnị ọnọọ zụ̀ mị, ana vị Ijerusarẹmị nị, o mèe chíi hụrẹ ẹbẹẹba ịda Ohomorihi vẹ.

¹¹Dị igirima Ohomorihi mẹ ka ọ̀ọ zẹtẹ nị. Ọ màa zẹtẹ, vị ọ sị mẹẹ anka ịrẹta nyoo-nyoo ene zoza hu keekere, anka ịrẹta ana aā hị́ ịjasịpa ana nị anka ore avọọ nị.

¹²Ộ nyị ọvọ ana banyị, dị ọ nẹba karaa, dị ọ nyị oze ẹwụrẹva nị. Dị anggẹẹrị ẹwụrẹva sị eyi pe oze ẹnẹẹ nị. Dị a chẹrẹ ịrẹha tụ́ ini oze ẹnẹẹ nị. Ịrẹha ẹnẹẹ vị ịrẹha ovwoovu ẹwụrẹva ezi Anisirẹrị nịnị.

¹³Ọ́ọ nyị oze ẹẹta tụ́ eyi ọnị ọyịị̄ zịị hụrẹẹ vẹ, ọ rẹ nyị oze ẹẹta tụ́ eyi ẹbẹẹba, dị ọ rẹ nyị oze ẹẹta tụ́ eyi ụvẹtẹ, dị ọ rẹ nyị oze ẹẹta tụ́ eyi ọnị ọyịị̄ zịị naa ngụ ẹtẹ nị.

¹⁴Ọvọ ẹkụra ọnọọ vị ana a dà tụ́ ịrẹta ẹwụrẹva. Dị a chẹrẹ ịrẹha ezirẹma Ozi Atẹmẹ ọnọọ tụ́ ọnị.

¹⁵Anggẹẹrị ene ee pe mii kà ịrẹyị aanị, ộ nyị ịkẹ igooru ọnya rị ụvọ ana aa sịị ngọ ẹkụra ọnọọ ọnịrị oze anị beri ọvọ anị.

¹⁶Ẹkụra ọnọọ vị ana nyị akaha ẹẹna ẹbẹẹbẹ; ọ mẹ̀ gana, avọọ ọ mẹ̀ rẹ gọdọ nị. Dị anggẹẹrị ọnọọ sị ịkẹ anị ngọ ẹkụra ọnọọ nị. Ụgọdọ anị vị ịmẹẹrị akahị tụra akava rị ẹchẹhị (1,500). Ọ mẹ̀ gọdọ avọọ gẹdẹ-gẹdẹ ọ mẹ̀ rẹ gana, dị ọ rẹ vavọọ nẹba nị.

¹⁷Dị ọ rẹ ngọ ọvọ anị, dị ọ vị ahụ ịrẹka tụra ẹwụrịhịnọnyị (216) nị, anka ịsa ọnị ọza sịị̄ ngọ ịsa; ịsa ana anggẹẹrị ọnọọ sị ngọ ọ, ọ vị ọnọọ nị.

¹⁸Ịrẹta ozoza ana aā hị́ ịjasịpa a sị jị ọvọ anị nị. Ẹkụra ọnọọ ụvọta vị ana a sị igooru obooro mẹ, ana ahịka ộ nị anka ore.

¹⁹Ịrẹta ana a sị ká ọvọ ẹkụra ọnọọ ẹtẹ vị ana a sị ịrẹta ozoza-ozoza irenyi-irenyi mẹ ọvị. Ịrẹta ịpaapa vị ana aā hị́ ịjasịpa. Ọhụva vị ana aā hị́ ịsahwaya. Ọhụta vị ana aā hị́ agate. Ọhụna aā hị́ emeradi nị.

²⁰Ọhụhị vị ana aā hị́ oniiki. Ọhụhịnọnyị vị ana rẹẹ̄ hị́ ikaneriya. Ọhụhịmba vị ana aā hị́ ikirisorite. Ọhụhịnta vị ana rẹẹ̄ hị́ iberiri. Ọhụhịịna vị ana aa rẹẹ̄ hị́ itopazị. Ana gụ ọ ẹẹwụ vị ana aā hị́ ikakedoni. Ana gụ ọ ẹwụrọnya vị ana aā hị́ ijasiniti. Ana tụ́ ọ ẹwụrẹva vị ana aā rẹẹ hị́ ametisiti.

²¹Oze ẹwụrẹva ana a zịị̄ ngụ ẹkụra ọnọọ vị uweyi ẹwụrẹva, ọnị ọ vị ka oze ọnya-ọnya vị uweyi ọnya. Ụpatẹsị ẹkụra ọnọọ vị ana a sị igooru obooro mẹ, dị ọ nị anka ore avọọ nị.

²²Me yi re irehi Ohomorihi ikonya ịnị ẹkụra ọnọọ, agụvị ka Ohomorihi Ananyị yị Ochẹtẹngụ ọnịrị Ozi Atẹmẹ ọnọọ ẹ vị irehi Ohomorihi ịzọọ nị.

²³Ẹ yị nyị ịsị ẹkụra ọnọọ aa sị ọyịị̄ mẹ, à vị ụhwẹ, ka ọ̀ọ zẹtẹ ịzọọ, agụvị ka igirima Ohomorihi aa sị ẹtohweyi yị ịzọọ nị. Ozi Atẹmẹ ọ rẹ vị ẹtohweyi anị nị.

²⁴Avaba anẹhẹ vaa zị ụsẹ ini ẹtohweyi anị, di ohinọyị anẹhẹ nịnị kụ́ ụbanyị ẹnịnị ne hi ịzọọ.

²⁵Oze ẹkụra ọnọọ vị ana vaa naa hi ẹtẹ pooro ọọdụ, ẹ yị vaa nyị ịrahụ ịzọọ.

²⁶Ụbanyị ọnịrị igirima avaba anẹhẹ vị ana a vaa kụ́ vee hi ịzọọ.

²⁷Ẹ yị nyị ịsa ikonya eneē du ọza ẹngụ, ana vaa ngụ ịnị ẹkụra ọnọọ. Aza ene ee du ẹhẹ ọnịrị aza eneē cheeche, ẹ yị vaa ngụ ịzọọ. Aza ana chẹrẹ tụ́ ini iwe Ozi Atẹmẹ ọnọọ ana vị iwe aza ana yára pooro zịna-zịna kẹnẹ, ẹ vaa ngụ ịzọọ nị.