Read ebira Ẹtore 5 Bible Online

Ẹtore 5 - ebira bible

Ẹtore 5

¹Mê re iwe ọnya ịnị ụvọ ọza ana yaayịtẹ ịnị aga ohinọyị ọnọọ. Ịnịnẹ iwe ọnọọ ọnịrị ẹhẹẹhẹ anị vị ana a chẹrẹ ịsa hi. Dị a sị ịsa vaa aha ịhịmba nị.

²Dị mị re anggẹẹrị ọnya aanị ana nyị ụkata, dị ee nowu kà a ka: Ẹnẹ ka ọnị ộ hụ ọọ hụ̀ ịsa ana a sị vá iwe ọnọnị, dị ọnị ọ̀ hụ̀ iwe ọnọnị?

³Ẹ yị nyị ọza ịnya ẹbẹẹba, à vị ịnị ẹhẹ ọnọnị, à vị ini eku, ana zụ hụ̀ iwe ọnọnị dị ò re e.

⁴Dị maa jị òrèrè ẹtẹẹtẹrẹ nị, agụvị ka ẹ yị va nyị ọza ịnya ana va hụ ọọ hụ̀ iwe ọnọọ dị ò re e.

⁵Dị ọnya ịnị azọkụ ẹnẹẹ kà a mị ka asị mị rẹ̀ jị òrèrè nị. Ọ kà, Re, Idu ana hụrẹ ovwoovu Ijuda vẹ, ana vị ozi Idevidi, ọ raà nyị ehuna. Ọ zụ hụ̀ ịsa ịhịmba ana a sị vá iwe ọnọọ, dị ọ hụ̀ iwe ọnọọ.

⁶Di mi re Ozi atẹmẹ ọnya ka ọ jẹẹ ọ́vịdị aga ohinọyị ọnọọ nị. Dị ịsa ẹẹna ana nyị ụhwẹ, beri azọkụ ẹnẹẹ jẹẹ jesi kara a nị. Vị ọ sị mẹẹ ka vị a vịdị wụ Ozi atẹmẹ ọnọọ nị. Ộ nyị ọpanyị ịhịmba ọnịrị eyi ịhịmba ana vị Ụhwẹ Ohomorihi ịhịmba ana a raà tụ́ nọ avaba ẹhẹ.

⁷Dị ọ vẹ, dị ọ va sị iwe ọnọọ hụụnị ụvọrị ọza ana yaayịtẹ ịnị aga ohinọyị ọnọọ nị.

⁸Ịjị ọ raà sị iwe ọnọọ, dị ịsa ẹẹna ẹnẹẹ ana nyị ụhwẹ, beri azọkụ ohurẹẹna ẹnẹẹ tana tụra ẹtẹ ọ́vịdị Ozi atẹmẹ ọnọọ nị. Avaba ẹnịnị ệ sị ịsa a sịị̄ jị ahẹ ene véné igita rị ụvọ, dị ẹ rẹ nyị ịchacha ọgana ana a sị igooru mẹ ene eturare ozoza yà ịnị anị nị. Eturare ọnọọ vị aduwa aza Ohomorihi.

⁹Dị ẹ jị ahẹ ọwọọwa dị ẹ ka: Ẹwa hụ ọọ sị iwe ọnọọ nị, dị ụ wa hụ̀ ịsa ana sị vá a, agụvị ka â vịdị wụ wụ. A mẹ̀ wụ wụ, wa raà sị anya awụ hị́ aza varẹma va yị Ohomorihi, avaba anẹkụra, aza ana aa kà ẹkụra irenyi-irenyi avaba ẹhẹ.

¹⁰Wa raà nyị wa ka ẹ̀nyị tụ́ ịnị ịjọva Ohomorihi. Dị ẹ̀ rẹ yà anka ohirẹsụ irehi Ohomorihi, dị ẹ̀ẹ hẹkẹ Ohomorihi ayị, ẹnịnị rẹ vaa rị ohinọyị ịnị ẹhẹ.

¹¹Dị mị rẹ kana eyi, dị mị wụ́ ọngwẹ anggẹẹrị ọrụrụ-ọrụrụ nị. Dị ẹnịrị ịsa ẹẹna ẹnẹẹ ana nyị ụhwẹ, beri azọkụ ẹnẹẹ jẹẹ kara aga ohinọyị ọnọọ nị. Anggẹẹrị ẹnẹẹ ẹ rụrụ ẹtẹẹtẹrẹ, ana ahịka ọza ọ yị zụ za ịrịka.

¹²Di eyee nowuu kà a ka: Ozi atẹmẹ ọnọnị ana a vịdị wụ, ộ hụ ọọ dọ ụkata ẹtẹẹtẹrẹ ọnịrị ụbanyị beri ịrẹyọyẹ. Ộ nyị ụkata. Á vọrọ ka àa sị ụbanyị ọnịrị igirima beri ụgaa yọ!

¹³Dị mị rẹ wụ́ ka avaba ịsa ana yà ẹbẹẹba, ọnịrị ẹhẹ beri ịsị ẹ yà ini eku, ọnịrị avaba ịsị e hi ini òkū, avaba ịsa saka-saka aa kà a ka: Ọza ana yaayịtẹ ịnị aga ohinọyị, ọnịrị Ozi Atẹmẹ ệ nyị ụkata. Â vọrọ ka àa sị ụga ọnịrị ụbanyị beri igirimaa yị wa pooro zịna-zịna!

¹⁴Dị ịsa ẹẹna ana nyị ụhwẹ avọọ ka Aamị nị. Dị azọkụ ohurẹẹna ẹnẹẹ tana tụra ẹtẹ, dị ẹ hẹkẹ ọza ọnọọ ana yára pooro zịna-zịna nị.