Read ebira 1 Ịsamụwẹrị 18 Bible Online

1 Ịsamụwẹrị 18 - ebira bible

1 Ịsamụwẹrị 18

¹Idevidi ọnịrị Ịsọọrụ ẹ sị ịrẹyị ẹnịnị kà ta. Ịnị ụmẹ ọnya di Ijonatani ozi Ịsọọrụ nyayịnẹ sì ịrẹyị Idevidi nị. Avaba ayị anị o si sì ịrẹyị Idevidi, dị ẹnị ẹyịva nyayịnẹ sị ayị yị ẹngụ nị.

²Hụrẹ ịhị ọnọọ vị ọnị Ịsọọrụ vana si Idevidi pè ẹngụ tụ́ ịda anị. Ọ yị zẹẹ ka ọ̀ varẹma nọ ịda ada anị.

³Ijonatani ô sì ịrẹyị Idevidi pooro dị ẹ kụkụ hị́ eku yị ẹngụ ka vị ẹnị vaa sị ayịị yị ẹngụ pooro nị.

⁴Di Ijonatani ngwa awuru oni o chire ọnịrị ọtịnịnẹ anị dị ọ sị yi Idevidi nị. Dị ọ rẹ sị ụhwọ anị ne beri ọkịta ọnịrị ịbanụ ọnị ọọ̄ sịị za ọtẹ, dị ọ kụ ọ yị Idevidi nị.

⁵Avaba ịsị Ịsọọrụ ọ̀ọ ka Idevidi ọ̀ mẹ, avọọ ọ màa yịị mẹ̀ ẹ nị. Idevidi ộ yẹ ịrẹyị ẹtẹẹtẹrẹ agụvị avọọ dị Ịsọọrụ sị ọ mẹ ọga isoja anị nị. Avaba aza ệ dọ ka Idevidi a vọrọ ka ọ̀ vị ọga nị. Isoja Ịsọọrụ nyẹmba ệ dọ ka Idevidi avọrọ ka à sị mẹ ọga nị.

⁶Idevidi mẹ̀ si Anihwirisiti ọnọọ wụ dị ọnịrị Isoja nịnị aa vaa vẹ, dị anyẹnẹẹ jịnẹ hi ẹhẹ hụụnị avaba ẹkụra Anisirẹrị dị ẹ yaa jị ahẹ, dị ẹ yaa nyị ẹzẹ ẹ naa na gẹrị Ịsọọrụ ana vị ohinọyị nị. Di eyee hú ọkangga ọnịrị àgidibò, dị ẹ yaa jẹ nị.

⁷Dị anyẹnẹẹ ẹnẹẹ ana aa mẹ aahẹ aa jị ahẹ ka, “Ịsọọrụ ộ wụ̀ aza ẹnị akahị, ama Idevidi ọnị vị ana wụ̀ aza ẹnị atomiroku.”

⁸Ahẹ ọnọọ ộ kụ́ Ịsọọrụ ayị ẹtẹẹtẹrẹ, dị ọ ka, “A ka Idevidi ộ wụ̀ aza otomiroku, dị ahịka aza ẹnị akahị kẹnẹ a ka ẹmaa wụ nị. Ịsị ẹ vọ kẹnẹ ọ vị ka ọza ọ yị hị́ ọ ohinọyị nị.”

⁹Hụrẹ ụmẹ ọnọọ Ịsọọrụ vana hụrẹ nyima di ee pè Idevidii kụ́ ụhị nị.

¹⁰Eyinẹhẹ anị di Ohomorihi tụ́ ka ụhwẹ odivi ò chi kụ́ Ịsọọrụ ịrẹsụ nị. Dị Ịsọọrụ aa mẹ anka onuvu avọọ ngụ ini eehi zị nị. Idevidi oni vi ene ee hú agidibo anka ọ mẹ̀ mịị mẹ eyinị-eyinị. Ịsọọrụ vị ana sị ọha rị ụvọ dị ọ vavọọ aa mẹ ngụ ini eehi zị.

¹¹Di o ne ọha ọnọọ ụpẹ ẹẹva ka ọnị ò gu ọ chire Idevidi na za ugene nị. Di Idevidi hụrẹ oze yọ ịnị ụpẹ ẹyịva ẹnẹẹ nị.

¹²Dị angwa Idevidi kuku ee hi Ịsọọrụ nị; agụvị ka Ẹnẹyịmavara vị ana jẹẹ ịrẹma Idevidi. Di Idevidi si zwe huu ịda Ịsọọrụ nị.

¹³Ịsọọrụ ọ raà dụ Idevidi hụụ ịda anị, dị ọ sị ọ ka ọ̀ na sị eyi pè isoja ẹnị akahị nị. Dị ahịka Idevidi aa kụ́ isoja ẹnẹẹ nọ ịrẹkụ nị.

¹⁴Avaba ịsa ọnị Idevidi ọ̀ọ mẹ vi ene eē zoza ẹtẹẹtẹrẹ agụvị ka Ẹnẹyịmavara vị ana jẹẹ ịrẹma.

¹⁵Ịsọọrụ mẹ̀ vavọọ re ka ee zee yi Idevidi, dị angwa Idevidi kuku ee hi ọ nị.

¹⁶Avaba Anisirẹrị ọnịrị Ijuda vi ene sì ịrẹyị Idevidi agụvị ka ọnịrị wa aa zịị nọ ịrẹkụ nị.

¹⁷Ẹkụhị ọnya dị Ịsọọrụ hị́ Idevidi dị ọ ka ọnị aa sị ozi ẹnẹẹ anị ana vị ọzọkụ ana aā hị́ Imeravu gà Idevidi nị. Ọ kà asị Idevidi hí angwa, ama òo pè ọnị mẹ̀ ụkọrọ dị ọ̀ọ kụ̀ ịrẹkụ yị Ẹnẹyịmavara. Ịsọọrụ ô ro o ka ẹ yị vị ọnị ọ vaa sị ụvọ anịị wụ Idevidi. Ọ kà Anihwirisiti nịnị ọ vaa wụ̀ ọ nị.

¹⁸Di Idevidi ka, “Ẹ̀nẹ rị mị, ịzị ẹmịrị aneehi amị ọnịrị obooro ada amị gụ tụ́ ịnị Anisirẹrị di ahịka ẹmaa vaa vị ọyẹ ohinọyị nị?”

¹⁹Ịzẹyịza Ịjị o si tù ka à si Imeravu ozi Ịsọọrụ gà Idevidi, dị ahịka Adiriyeri Animehora a sị gà nị.

²⁰Ama ozi Ịsọọrụ ọsa ana rẹ vị ọnẹẹ ana aā hị́ Imikari oni ô sì ịrẹyị Idevidi. Ịjị a maanị na kà a yị Ịsọọrụ, ô hine e ẹtẹẹtẹrẹ.

²¹Dị Ịsọọrụ ka ọnị aa sịị gà a agụvị di ozi ọnọọ o zụ vene Idevidi, di Anihwirisiti nịnị ẹ̀ wụ ọ. Dị ịsọọrụ rẹ hị́ Idevidi dị ọ ka oze tị tịtẹ yọ ka ọ̀ vị ọyẹ anị.

²²Dị Ịsọọrụ hị́ ezi ahụ anị dị ọ ka ẹ̀ tangwa na kà a yi Idevidi, dị ẹ̀ kà a ka ohinọyị ọnịrị avaba ezi ahụ anị vi ene sì ịrẹyị anị; avọọ ọ̀ zẹẹ dị ọ̀ vị ọyẹ ohinọyị.

²³Ịzẹyịza dị ẹ vavọọ na kà a yị Idevidi nị. Di Idevidi ka, “U wéé ro o nịnị ka ịrẹyị gemi ọ vị nị ka ọza ọ̀ na vị ọyẹ ohinọyịị Wâ yẹ ka onosiye mị vị nị, ẹ yị nyị ọza ana yẹ mị.”

²⁴Di ezi ahụ Ịsọọrụ na kà a yọ ohi oni Idevidi tụ́ nị.

²⁵Dị Ịsọọrụ ka ẹ̀ na kà a yi Idevidi dị ẹ̀ kà a ka, “Ohinọyị, o yi sì ẹkẹhị ịrẹsụ. Ịsị ee sì kẹnẹ ọ vị ka ọ̀ na wụ̀ Anihwirisiti ẹchẹhị, dị yẹrẹ ụpa ene ku wa aha enyisi, dị ọ̀ kụ ọ va yị ọnị. Ohinọyị ka avọọ oni mee sì ka oni ò si Anihwirisiti ana vị ọnịvị anị atọ nị.” Ịsị Ịsọọrụ ee sì ọ vị ka Anihwirisiti nịnị è re oze wụ Idevidi.

²⁶Ịjị ezi ahụ Ịsọọrụ maanị na kà a yi Idevidi, di Idevidi aa jẹ ka ọnị aa vaa vị ọyẹ ohinọyị nị. Ịjị ẹkụhị oni ohinọyị jị naa gụ,

²⁷Idevidi ọnịrị isoja anị ệ jịnẹ dị ẹ na wụ̀ Anihwirisiti ịrẹka nị. Dị ọ yẹrẹ ụpa ene kú wa aha enyisi, dị ọ kụ́ avaba anị na yị ohinọyị ka oni ò re oze vị ọyẹ ohinọyị nị. Ịzẹyịza dị Ịsọọrụ sị Imikari ozi anị ana vị ọnẹẹ, dị ọ sị gà Idevidi nị.

²⁸Ịsọọrụ o si re ka Ẹnẹyịmavara vị ana jẹẹ ịrẹma Idevidi, di ozi anị Imikari re sì ịrẹyị Idevidi nị.

²⁹Dị angwa Idevidi ee hi hi Ịsọọrụ hu avọọ nị. Dị ọ kụkụ jị ẹngụ anị ọnịvị Idevidi pooro ịnị ẹhẹ anị ana vọ nị.

³⁰Ọga isoja Anihwirisiti nịnị vị ana aa jịnẹẹ tụ́ ẹhẹ pooro ka ẹnị ẹ̀ na kụ̀ ịrẹkụ, ama dị ahịka Idevidi aa kụ̀ ịrẹkụ ẹtẹẹrẹ huna isoja Ịsọọrụ ana vọ nị. Dị ịrẹha Idevidi aa ngụ ịrẹyị nị.