Read ebira 1 Ịsamụwẹrị 22 Bible Online

1 Ịsamụwẹrị 22 - ebira bible

1 Ịsamụwẹrị 22

¹Idevidi ộ hụrẹ Igati, di o zwe na ngụ ịnị ụtẹha ana yà Adurami nị. Ẹnẹbẹnị anị ẹnịrị avaba aneehi ada anị ẹ sị wụ ka o si zwe nọ ịzọọ, dị ẹnịnị wara ẹngụ ne tù ọ ịzọọ nị.

²Â nyị aza ẹnyị ana ayị vịdị aa kụ́ ọnịrị aza ana ayị ẹnịnị si du. Dị ẹngụ aza ẹnẹẹ kụ́ ẹngụ gụ di ẹ kụ́ ẹngụ ẹnịnị na yị Idevidi nị. Ẹnịnị vị akana, dị ahịka Idevidi ẹ kụkụ sị mẹ ọga nị.

³Di Idevidi rẹ hụụ ịzọọ, dị ọ nọ Imizipe ịnị ẹtẹ Imowabi nị. O mè tù ịzọọ dị ọ kà a yị ohinọyị Imowabi dị ọ ka ọ̀ navọ ọnyị anị beri ada anị ẹ̀ na yà ịdị ohinọyị ọnọọ pooro dị ọnị yẹ Ohomorihi ọ̀ọ mẹ vaa mẹ ụsẹ anị nị.

⁴Di Idevidi navọ wa pè ohinọyị Imowabi, pooro ọ́ mẹ̀ yị yà ịzị ọ tẹ tụ́ nị.

⁵Ẹkụhị ọnya â nyị ọnịsẹ ọnya aanị ana aā hị́ Igadi. Di ọ va kà a yị Idevidi ka asị ọ kụkụ yà ịnị ụtẹha ọnọọ nị. Ọ kà ọ̀ hụụ ịzọọ dị ọ̀ọ nọ Ijuda. Di Idevidi ka ooho, dị ọ hụụ ịzọọ dị ọ na yà ini iriku ana yà Ihereti nị.

⁶Ẹkụhị ọnya dị a va sị ọ kà yị Ịsọọrụ ka ê re Idevidi ọnịrị aza anị ịzị ẹ tẹ tụ́ nị. Ịsọọrụ vị ana sị ọha rị ụvọ, dị ọ yaayịtẹ iruvo ọchị ana aā hị́ Irimoni ị́rẹsụ ataba Igibiya. Aza anị vị ana jẹẹ kara a.

⁷Dị Ịsọọrụ hị́ aza anị ẹnẹẹ ana jẹẹ kara a, dị ọ ka, “wụ́ ịrẹyị booro aanị, ẹwụ nịnị Anịbẹnjamịnị! A vi u ro ka ozi Ijeese vaa sị ẹtẹ aarẹ yị ọza ịnya ọza ịnya awụ nịnị, dị ọ rẹ mẹ ka wa vị ọga isoja akahị ọnịrị ọga ẹchẹhị nịnị?

⁸A vị agụvị avọọ avaba awụ nịnị kụkụ kwẹẹtẹ tù mii? Ẹ yị hyakụ va nyị ọza ana jị ọ ahị hi mi ụtọ ka ozi emi ọnịrị ozi Ijeese ẹ raà hị́ eku yị ẹngụ. Ẹ yị nyị ọza awụ ọnị ịrẹyị amị jị areyi ana a vọrọ ka ọ̀ va kà a mị ka ozi emi ọ raà tụ́ ozi ahụ amị ịrẹyị ka ò kukuu bè mi anka ịsị aa mẹ booro aanị.”

⁹Idowegi Anedomi ọnịrị ezi ahụ Ịsọọrụ e dudu jẹẹ ịzọọ nị. Dị ọ ka oni ô re ozi Ijeese màa nọ Inobi ịda Ahimẹrẹkị ana vi ozi Ahitubi.

¹⁰Ọ kà Ahimẹrẹkị ộ họ̀ Ẹnẹyịmavara use ịrẹyị agụvị Idevidi dị ọ kà a yi Idevidi nị. Dị ọ rẹ ka ộ hyakụ sị ịsa yi Idevidi ka ọ̀ rị ọ àa na oze. Dị ọ rẹ ka Ahimẹrẹkị ọ raà sị ụhwọ Igorayati Anihwirisiti yị Idevidi nị.

¹¹Di ohinọyị tụ́ ka à na hị́ Ahimẹrẹkị ohirẹsụ irehi Ohomorihi ana vi ozi Ahitubi va yị ọnị nị. Ọ kà à rẹ kụ́ avaba aneehi ada Ahimẹrẹkị ana vi ohirẹsụ irehi Ohomorihi hi Inobi vẹ. Ịzẹyịza dị ẹ vavọọ wara vẹ ịda ohinọyị nị.

¹²Di ohinọyị kà yị Ahimẹrẹkị ozi Ahitubi ka, “Bato waa wụ́ ịrẹyị ọnị maa vaa kà o!” Di Ahimẹrẹkị ka, “Taarụ, maa wụ́!”

¹³Dị Ịsọọrụ ka, “Sị ẹ vẹ dị ẹwụrị ozi Ijeese sị kwẹẹtẹ tù mị, dị ụ hyakụ sị ịsọyịrị yọ bẹẹ ne beri ụhwọ. Wa rẹ na họ̀ Ohomorihi use ịrẹyị agụvị Idevidi dị wụ va kà a yọ nị. Wâ mẹ ka Idevidi ọ̀ kwẹẹtẹ tù mị, di o kukuu bè mi anka ọ màa mẹ aanị.”

¹⁴Di Ahimẹrẹkị tụ́ ohi dị ọ ka, “Taarụ, wâ yẹ ka ịnị avaba ezi ahụ awụ ẹ yị nyị ọza ana nyị ebira tù Idevidi. Idevidi vị ọyẹ ẹwụ, dị ahịka ọnị ọ vị ọga isoja ene ee sere wu nị. Avaba aneehi awụ vị ana nyayịnẹ sị ụbanyị yọ.

¹⁵Taarụ, wâ yẹ ka ẹ yị vị ịpaapa ọnị maa vaa họ̀ Ohomorihi use ịrẹyị agụvị Idevidi yị. Taarụ, aarịhịnị asị wụ kà a ka vị mị kwẹẹtẹ tù wu nị, à vị ka vị aneehi ada amị kwẹẹtẹ tù wu nị. Ẹ yị nyị ịsị ị yẹ vụrụ-vụrụ ịnị ịrẹyị ẹnẹnị.”

¹⁶Di ohinọyị tụ́ ohi dị ọ ka, “Ahimẹrẹkị, ẹ yị nyị a mẹ̀ẹ kụ́ ọ ka ẹ yị vị maa wụ̀ wụ. Ẹwụ ne beri aneehi ada awụ vị ọnị maa wụ.”

¹⁷Di ohinọyị hị́ isoja ene ee sere ẹtẹ ana jẹẹ pè e, dị ọ ka ẹ̀ vara eyi dị ẹ̀ wụ̀ ohirẹsụ irehi Ẹnẹyịmavara nị. Ọ kà ẹnịrị Idevidi ẹ sị yà tù ọnị. Ọ kà ệ yẹ Ídevidi mèe zwe, ama ẹnịnị ẹ yị va kà a yị ọnị. Ama ezi ahụ ohinọyị ee hí angwa, ẹ yị nyayịnẹ wụ̀ ohirẹsụ irehi Ẹnẹyịmavara.

¹⁸Di ohinọyị kà yị́ Idowegi ana vị Anedomi ka ọ vara eyi, dị ọ̀ va ịsa hi ohirẹsụ irehi Ohomorihi ẹnẹẹ ẹngụ nị. Ịzẹyịza dị ọ va ịsa hi ohirẹsụ irehi Ohomorihi ẹnẹẹ ẹngụ, dị ọ wụ̀ wa nị. Ịhị ọnọọ aza ọnị ọ wụ vị ẹnị ẹbẹẹna tụra ẹẹhị. Avaba ẹnị ẹnẹẹ vi ene eē chire ịharamịra ana a sị ịta ozoza hi.

¹⁹Dị ọ rẹ za avaba anẹkụra Inobi, dị ọ sị ụ̀hwọ̀ wụ̀ wa nị. Anẹẹ, anọrụ, ezweyi ọnịrị ezinụvọ vị ọnị ọ wụ. Avọọ ọ mẹ̀ rẹ wụ imaaru, ịkẹrịkẹtẹ ọnịrị atẹmẹ ẹnịnị nị.

²⁰Ama Abiyata ana vi ozi Ahimẹrẹkị ana ada anị vị Ahitubi ọnị o si zwe, dị o ne tù Idevidi nị.

²¹Dị ọ kà a yi Idevidi ka Ịsọọrụ ọ sị avaba ohirẹsụ irehi Ẹnẹyịmavara wụ̀ ha nị.

²²Di Idevidi ka, “M ne re Idowegi Anedomi ọnọọ ịhị ọnọọ, mâ yẹ ka vị aa naa kà a yị Ịsọọrụ nị. Ẹma mẹ ka avaba aneehi ada awụ è sú aanị nị.

²³Yaayịtẹ pè mị, asị wu hí angwa. Ọza ana àa ka ọnị aa wụ̀ wụ ẹmị o ree sì ka ọnị ọ̀ wụ avọọ nị. Wàa yaayịtẹ pè mi ịzẹnị, ẹ yị nyị ịsị ẹ vaa mẹ wụ.”