Read ebira 1 Ịsamụwẹrị 26 Bible Online

1 Ịsamụwẹrị 26 - ebira bible

1 Ịsamụwẹrị 26

¹Ẹkụhị ọnya di Anizihwi nịnị ne tù Ịsọọrụ ọ mẹ̀ yà Igibiya dị ẹ ka ọ́ọ́ yẹ ka Idevidi ọ na sị tẹ ịnị ataba Ihakira ana và eyi kà Ijesimoni.

²Dị Ịsọọrụ tọ̀ọ ọmụha-ọmụha ẹnị akawụ rị akahị hụụnị avaba Isirẹrị, di e si hu aa nọ ịnị ụnọmị Izihwi, di eyee nee sì Idevidi nị.

³Ịsọọrụ nịnị ệ kụ́ udi tụ́ ụtọ oze ịnị ataba Ihakira, dị ẹ và eyi kà Ijesimoni nị. Di Idevidi ọnị yà ịnị ụnọmị nị. Idevidi mẹ̀ wụ́ ka Ịsọọrụ ọ raà dụ ọnị va ngụ ịzọọ,

⁴dị ọ tụ́ aza ka ẹ̀ tangwa na zama ịzị Ịsọọrụ nịnị yà nị. Dị ọ sị yẹ ka ịzẹyịza Ịsọọrụ ọ va sị ngụ ịzị aā hị́ Inakoni nị.

⁵Di Idevidi si hu aa nọ ịzị Ịsọọrụ kụ́ udi tụ́ nị. Ọ mẹ̀ na, di o re ịzị Ịsọọrụ ọnịrị Abịna ozi Ineri ana vị ọga isoja hi nị. Ịsọọrụ vị ana hụtụ ịnị ajẹngụ, di isoja anị kara a nị.

⁶Di Idevidi vẹ, dị ọ va hị́ Ahimẹrẹkị ana vị Anihiti ọnịrị Abisayi ozi Izeruya ana vị ọyịnyara Ijowabi nị. Di Idevidi ka ẹnị aā saasa ọnịị nọ udi Ịsọọrụ. Dị Abisayi ka ọnị aa nọ nị.

⁷Di Idevidi ọnịrị Abisayi ne tù isoja Ịsọọrụ ịrahụ, di e ne tù Ịsọọrụ ka ọ hụtụ ịnị ajẹngụ aa sụ ara nị, di ahịka vị ọ kà ọha anị chire ẹtẹ ọgụrị ịrẹsụ anị nị. Di Abịna ọnịrị isoja ana vọ hụtụ kara Ịsọọrụ nị.

⁸Di Abisayi va hị́ Idevidi dị ọ ka, “Ajịnị Ohomorihi sị ọnịvị awụ chire wụ ụvọ nọ! Navọ ma gụ ọha amị chire e na za eteesu ụpẹ ọnya kẹnẹ. Mẹ yị gụ ọ chire e tù ụpẹ ẹẹva.”

⁹Di Idevidi ka asị ọ wụ̀ ọ. Ọ kà ọza ọ́ọ́ nyayịnẹ sị ụvọ kanyị ọza ọnị Ẹnẹyịmavara sị nyị dị asị ọ rị ịvị?

¹⁰Di Idevidi rẹ ka Ẹnẹyịmavara ọ̀ọ yà ịzọọ, ọnị Ẹnẹyịmavara ụvọta ọ vaa wụ̀ Ịsọọrụ nị. Ọ kà Ịsọọrụ o zụ sú ịhị ẹkụhị anị ọ̀ sị gụ, à yị vị avọọ dị ọ nọ ịrẹkụ, di o ne sú ịzọọ.

¹¹Ọ kà ana asị Ẹnẹyịmavara zẹẹ ka ọnị ọ̀ sị ụvọ kanyị ọza ọnị ọ nyị. Di Idevidi ka à jẹẹ ẹnị ẹ̀ si ọha ọnịrị ịtụmpaha ọnị Ịsọọrụ nịnị sị enyi tụ́ ana yà aha ịrẹsụ Ịsọọrụ, dị ẹnị ẹ̀ẹ na.

¹²Ịzẹyịza di Idevidi sị ọha ọnịrị ịtụmpaha enyi ene pè Ịsọọrụ ịrẹsụ, di e si hu nị. Ẹ yị nyị ọza ene re wa, ẹ yị rẹ nyị ọza ana yẹ. Ẹ yị rẹ nyị ọza ana ha. Avaba ẹnịnị vị ana aa sụ́ ara. Ẹnẹyịmavara ọ raà mẹ ka ara ụtọ ọ̀ dọ wa.

¹³Di Idevidi nọ eyi ataba ọsa, dị ọ na huu, dị ọ na jẹẹ ịrẹsụ ataba ọnọọ nị. Aha ana yà ịnị akakana ọnịrị Ịsọọrụ ộ gọdọ.

¹⁴Di Idevidi hị́ isoja Ịsọọrụ, dị ọ rẹ hị́ Abịna ana vi ozi Ineri dị ọ ka, “Abịna, wéé tụ́ mi ohii?” Di Abịna ka, “Ẹ̀naa hị́ ohinọyị ịzọọ?”

¹⁵Di Idevidi kà yị Abịna ka, “Aanịka ẹ̀ vị ọnọrụ ụ vị? Ene hi wu ụhwẹ ịnị ẹtẹ Isirẹrị? Sị ẹ vẹ di wè yi sere ọga awụ ana vị ohinọyị ẹtẹẹrẹ? Â nyị ọza ana vẹ ka ọnị ọ va wụ ọga awụ ana vị ohinọyị.

¹⁶Ịsị ụ mẹ aanị, o yi zoza. Mâ sị Ẹnẹyịmavara hị́ eku ka vị a vọrọ ka ẹwụrị aza awụ è sú nị. We yi si eyi pè ọga awụ ọnị Ẹnẹyịmavara mẹ ohinọyị ẹtẹẹrẹ. Kana eyi di u we re. Wéé re ọha ohinọyị ọnịrị okoko enyi ene pè e ịrẹsụ?”

¹⁷Ịsọọrụ ọ sị yẹ ka Idevidi aa kà ịrẹyị nị. Dị ọ ka, “Idevidi ozi emi, ẹwáá kà ịrẹyị nị?” Di Idevidi ka, “Taarụ! ohinọyị, ẹmị yọ nọ.”

¹⁸Di Idevidi rẹ ka, “Taarụ, sị ẹ vẹ dị waa dụ mị aanị? Sị mị mẹ̀? Sị ẹ vị ịvị awụ ọnị mị rị?

¹⁹Taarụ ohinọyị, navọ wa wụ́ ịrẹyị amị. Àa vị Ẹnẹyịmavara ọ ka waa dụ mị nị, ọ̀ navọ ọ̀ dọ ịsọvọ ọnị maa sịị da ịpẹ. Àa vị aza ẹ maanị aa tụ́ wụ́ ịrẹyị nị, Ẹnẹyịmavara ọ yị vaa zẹẹ ka ò zoza yị aza ẹnẹẹ. Ẹ sị mị dụ hụụ ịda aza Ẹnẹyịmavara, ẹ ka ma kụkụ naa hẹkẹ ori.

²⁰Navọ asị ụ wụ̀ mị tụ́ ịnị ẹtẹ ọzọga ẹnẹ ẹ̀ yị vị ịda Ẹnẹyịmavara. Taarụ, ẹwụ ohinọyị Isirẹrị ọyịvụrụ ọ sị kwẹẹtẹ aa dụ mị ana ahịka ịsị mị vị nị. Waa dụ mị anka ọza àa dụ irekwose ịnị ataba avọọ.”

²¹Dị Ịsọọrụ ka ọnị ọ sị ebira odivi mẹ. Ọ kà “Idevidi ozi emi, navọ wa vavẹ ịda amị. Ẹwa ka asị mi sú ajịnị nị. Ẹ yị nyị ịsị mị kụkụ aa sịị mẹ wụ. Ma sị ụra mẹ, me reè nyeeyi baaba.”

²²Di Idevidi ka, “Taarụ, ọha awụ yị, tụ́ ozida awụ ọnya ka ọ̀ va sị ọ va wụ.

²³Ọpa ebira ana vọrọ ọnịrị ịzẹyịza ọnị ọzọza ọ̀ọ mẹ, Ẹnẹyịmavara ọ̀ vavọọ si wa ụta. Wê re ka Ẹnẹyịmavara ô si wụ́ chire mị ụvọ ajịnị, ama mẹ yị dọ ka ma sị ụvọ kanyị wụ, agụvị ka Ẹnẹyịmavara ọ sị wụ nyị.

²⁴Anka m mẹ̀ yị mẹ̀ dọ wu ụhwẹ ajịnị aanị, avọọ Ẹnẹyịmavara ọnị ọ̀ yị mẹ̀ rẹ vaa dọ mị ụhwẹ nị. Ọ raa dọ mịị hụụnị avaba akanya.”

²⁵Dị Ịsọọrụ ka, “Idevidi ozi emi, Ohomorihi ọ̀ navọ ò zee wụ. Avaba ịsa ọnị wàa ka waa mẹ, vi ene vee zoza.” Di Idevidi si hu aa na, dị Ịsọọrụ sị varẹma aa nọ eehi nị.