Read efik GENESIS 13 Bible Online

GENESIS 13 - efik bible

GENESIS 13

¹NDIEN Abram oto ke Egypt ɔdɔk, enye ye ŋwan esie, ye kpukpru se inyenede enye, ye Lot ŋko, aka ke edem usuk.

²Abram onyuŋ odobi ke ufɔk esie, ke ufene, ye ke silver, ye ke gold.

³Ekem, nte enye otode ke edem usuk asaŋa ke usuŋ esie, enye osin Beth-el, ke ebiet oro tent esie okodude do akpa, ke ufɔt Beth-el ye Ai;

⁴Ke ebiet itie uwa oro enye akanamde do akpa ini: ndien Abram okot Jehovah ke enyiŋ do.

⁵Lot emi asaŋade ye Abram, onyuŋ enyene erɔŋ, ye enaŋ, ye tent.

⁶Ndien isɔŋ oro ikemke mmɔ, nte eduŋde ɔtɔ kiet: koro inyene mmɔ ewakde, mmɔ inyuŋ ikwe nte eduŋde ɔtɔ kiet.

⁷Ekem mme ekpeme ufene Abram, ye mme ekpeme ufene Lot etɔhɔ utɔk. Mme Canaanite ye mme Perizzite enyuŋ eduŋ ke isɔŋ ke ini oro.

⁸Ndien Abram ɔdɔhɔ Lot, ete, Mbɔk, kuyak utɔk odu ke ufɔt mi ye afo, ye ke ufɔt mme ekpeme ufene mi ye mme ekpeme ufene fo; koro nnyin idide nditɔ ete kiet.

⁹Nte ofuri isɔŋ inaŋa fi ke iso? Dianare ye ami, mbɔk; afo ama aka ke ubɔk ufien, ndien nyeka ke ubɔk nnasia; edi afo ama aka nnasia, ndien nyeka ufien.

¹⁰Ndien Lot emenere enyin esie, ese ofuri una isɔŋ Jordan, nte mmɔŋ awakde ke esit kpukpru, ke Jehovah mika isoboke kaŋa Sodom ye Gomorrah, nte iŋwaŋ Jehovah, nte isɔŋ Egypt, ke edem Zoar.

¹¹Ndien Lot emek ofuri una isɔŋ Jordan ke idem esie; ndien Lot adaha ke edem usiaha utin: mmɔ enyuŋ edianare kiet ye eken.

¹²Abram etie ke isɔŋ Canaan, Lot onyuŋ etie ke obio una-isɔŋ oro, onyuŋ owuk tent esiemɔ osim Sodom.

¹³Ndien nditɔ Sodom edediɔk, mmɔ edue Jehovah eti eti.

¹⁴Ndien Jehovah ɔdɔhɔ Abram, ke Lot ama akadianare ye enye, ete, Kam menere enyin fo nyuŋ tɔŋɔ ke ebiet emi afo odude nyuŋ se edere, ye usuk, ye ufien,

¹⁵ye nnasia; koro nyeda ofuri isɔŋ emi afo okutde, nnɔ fi ye ubon fo ke nsinsi.

¹⁶Nyenyuŋ nsin ubon fo edi nte ntan isɔŋ: koro ini owo ekeme ndibat ntan isɔŋ, ndien ekeme ndibat ubon fo nde.

¹⁷Daha ke enyɔŋ saŋa ke isɔŋ emi, ke uniɔŋ esie, ye ke ubara esie: koro ndade enye nnɔ fi.

¹⁸Ndien Abram ɔwɔrɔ iduŋ, ndien edi ediduŋ ke ɔtɔwɔk eto Mamre, emi odude ke Hebron, onyuŋ anam itie uwa do ɔnɔ Jehovah.