Read efik GENESIS 18 Bible Online

GENESIS 18 - efik bible

GENESIS 18

¹EKEM Jehovah owut enye idem esie ke ɔtɔwɔk ofriyo Mamre: enye onyuŋ etie do, ke enyin usuŋ tent esie ke ufɔt uwemeyo;

²ndien enye emenere enyin esie okut, ndien, sese owo ita edade ekpere enye, ndien ke okutde, enye adaha ke enyin usuŋ tent okosobo ye mmɔ, ɔnuhɔ ke isɔŋ.

³Ndien enye ɔdɔhɔ ete, Ɔbɔŋ mi, edieke nnemde fi, mbɔk, kunyuŋ ukpɔŋ owo fo.

⁴Mbɔk yak eda ekpri mmɔŋ ediyet mbufo ukot, mbufo enyuŋ etie ke idak eto eduɔk odudu:

⁵ndien nyeda uyo esisit ndi, mbufo enyuŋ esɔŋ idem; ndien edinyɔŋɔ: koro edide emi esin ewaha etiene owo mbufo. Ndien mmɔ ete, Nam nte ɔdɔhɔde.

⁶Ndien Abraham awara aka ebiet Sarah ke tent, ete, Wara buen ata eti ndom uyo ke udomo ita, nyuŋ nam mfefere uyo.

⁷Abraham onyuŋ efehe aka ke ɔtɔ ufene, akada nsek eyen enaŋ eke ɔfɔnde, ɔnɔ akparawa kiet; ndien enye awara etem enye.

⁸Ndien enye ada mmɔŋeba eke abaride, ye mmɔŋeba eke eniŋede, ye eyen enaŋ oro eketemde, edinim mmɔ ke iso; ndien enye ada do ekpere mmɔ ke idak eto, ndien mmɔ edia.

⁹Ekem, mmɔ ebup enye, ete, Enye Sarah aŋwan fo? Ndien enye ete, Se enye mmɔ ke tent.

¹⁰Ndien enye ɔdɔhɔ, ete, Nditreke ndifiak ntiene fi ke adaŋemi isua akabarede; ndien, sese, Sarah ŋwan fo eyeman eyen-eren. Sarah ɔmɔŋ onyuŋ adada ke enyin usuŋ tent okop, enye onyuŋ odu Enye ke edem.

¹¹Edi Abraham ye Sarah edi ŋkani, eka ke usɔŋ; ido iban ama onyuŋ etre ye Sarah. Ndien

¹²Sarah asak imam ke esit esiemɔ ete, Ke adaŋemi idem ememde mi, nte esit edinem mi, emi ɔbɔŋ

¹³mi ŋko edide akani? Ndien Jehovah ɔdɔhɔ Abraham ete, Nsinam Sarah asakde ntem, ete nte ami ndiman ke akpanikɔ ke

¹⁴ndide akani aŋwan? Nte ŋkpɔ ɔsɔŋ akan Jehovah? Ke ini emi enimde, nyefiak ntiene fi, ke ukabare isua, ndien Sarah eyenyene eyen.

¹⁵Ndien Sarah akaŋ ete, Ke imɔ isakke: koro ndik anamde enye, Ndien Enye ɔdɔhɔ ete, Idige ntre; ŋkɔm amasak.

¹⁶Ekem, mbon oro edaha ke enyɔŋ ewuk enyin ese Sodom: ndien Abraham asaŋa ye mmɔ akayak ke usuŋ.

¹⁷Ndien Jehovah ɔdɔhɔ, ete, Nte ndedip Abraham se ami nyomde ndinam;

¹⁸ndien Abraham iditreke ndidi akamba ye ɔkpɔsɔŋ idut, kpukpru mme idut ererimbot eyenyuŋ ekut mfɔn eke otode

¹⁹enye ke idem? Koro mmemek enye, kpaŋ enye ekpeteme nditɔ esie ye ufɔk esie eke editienede enye, ete ekpeme usuŋ Jehovah, ndinam se ifɔnde inyuŋ inende; kpaŋ Jehovah akpada kpukpru se ɔkɔdɔhɔde abaŋa Abraham ɔsɔk enye.

²⁰Ndien Jehovah ɔdɔhɔ ete, Koro mfiori Sodom ye Gomorrah okponde eti, idiɔk-ŋkpɔ mmɔ onyuŋ

²¹odobide eti-eti, yak ŋkam nsuhɔre ŋkese mme mmɔ enenam kpukpru ŋkpɔ ke uyo mfiori emi osimde mi; ndien midige ntre, nyefiɔk.

²²Ndien mbon oro ekabare ekpɔŋ ɔtɔ oro, eka ke Sodom: edi Abraham ada kaŋa ke iso Jehovah.

²³Ndien Abraham asaŋa ekpere, ete, Nte afo eyenyuŋ osobo edinen owo ye mme idiɔk?

²⁴Ndusuk edinen owo aba ye duop edu ke obio oro: nte afo eyenyuŋ osobo, udunyuŋ udahakedo unɔ ebiet oro, ubaŋa edinen owo aba ye duop eke edude ke esit?

²⁵Nsa fo O! Ndinam ntem, ndiwot mmɔ eke enende ye mmɔ eke minenke: mmɔ eke enende ndinyuŋ ntie nte mmɔ eke minenke, nsa fo O! Nte Ebierikpe ofuri ererimbot idinamke se inende?

²⁶Ndien Jehovah ɔdɔhɔ, ete, Mma ŋkut edinen owo aba ye duop, ke Sodom ke esit obio, nyedahado nnɔ ofuri ebiet mbaŋa mmɔ.

²⁷Ndien Abraham ɔbɔrɔ, ete, Sese, mbɔk, mmodomo ndidɔhɔ ye Ɔboŋ mi, ndien ami ndi ntan ye ntɔŋ:

²⁸mme edisuhɔ ition ke edinen owo aba ye duop oro; nte afo eyebiat ofuri obio abaŋa ition oro? Ndien enye ɔdɔhɔ, ete, Ndibiatke, ke mma ŋkut aba ye ition do.

²⁹Ndien enye ɔtɔŋɔ ntak ɔdɔhɔ Enye, ete, Ndusuk edikut aba do. Ndien enye ete, Ndinamke mbaŋa aba oro.

³⁰Ndien enye ɔdɔhɔ, ete, Mbɔk, esit okuyat Ɔbɔŋ mi, yak ndɔhɔ: mme edikut edip ye duop do. Ndien Enye ete, ndinamke, mma ŋkut edip ye duop do.

³¹Ndien enye ɔdɔhɔ, ete, Mbɔk, sese, ndotke nte ndɔhɔde ye Ɔbɔŋ mi: mme edikut edip do. Ndien enye ete,

³²Ndibiatke mbaŋa edip. Ndien enye ɔdɔhɔ, ete, Mbɔk, esit okuyat Ɔbɔŋ mi, ndien nyedɔhɔ ini kiet emi: mme edikut duop do.

³³Ndien enye ɔdɔhɔ, ete, Ndibiatke mbaŋa duop. Ndien Jehovah ɔnyɔŋ, ke adaŋoro ama ɔkɔdɔhɔ ye Abraham ama: Abraham onyuŋ afiak aka ke ebiet esiemɔ.