Read efik GENESIS 22 Bible Online

GENESIS 22 - efik bible

GENESIS 22

¹EDIKEM ke ŋkpɔ oro ama ekebe, Abasi odomo Abraham; ndien ɔdɔhɔ enye, ete, Abraham. Ndien enye ete,

²Se ami mi, Ndien Enye ete, Da ndien eyen fo, eyen fo kierakiet, Isaac emi afo amade, ka ke isɔŋ Moriah; nyuŋ wa enye do ke uwa ke akamba obot kiet eke ndidɔhɔde fi.

³Ndien Abraham abak ke usenubɔk adaha ke enyɔŋ, ɔdiɔŋ ass esie, onyuŋ ada mkparawa esie iba ŋko, ye Isaac eyen esie, onyuŋ asiak ifia uwa, ndien enye adaha ke enyɔŋ, aka ke ebiet oro Abasi ɔkɔdɔhɔde enye.

⁴Ekem ke ɔyɔhɔ usen ita, Abraham emenere enyin esie okut ebiet oro nsan-nsan.

⁵Ndien Abraham ɔdɔhɔ mkparawa esie, ete, Mbufo etie mi ye ass nnyin; ndien ami ye eyen mi iyeka ko ikɔbɔŋ akam, ndien ifiak itiene mbufo.

⁶Ndien Abraham ada ifia uwa odori Isaac eyen esie ke idem; ada ikaŋ ye ikwa ke ubɔk, ndien mmɔ mbiba esaŋa ɔtɔ kiet.

⁷Ndien Isaac ɔdɔhɔ Abraham ete esie, ete, Ete mi; ndien enye ete, Se ami mi eyen mi. Ndien Isaac ɔdɔhɔ ete, Se ikaŋ ye ifia;

⁸edi enye eyen erɔŋ uwa? Ndien Abraham ɔdɔhɔ ete, Eyen mi, Abasi eyeyom eyen erɔŋ uwa ɔnɔ idem esie; ntem ke mmɔ

⁹mbiba esaŋa ɔtɔ kiet. Ekem mmɔ edisim ebiet oro Abasi ɔkɔdɔhɔde enye; ndien Abraham anam itie-uwa do, onyuŋ otim obon ifia, ndien ɔbɔp Isaac eyen esie emen odori ke itie-uwa ke enyɔŋ ifia.

¹⁰Ndien Abraham anyan ubɔk esie, ada ikwa ete iwot eyen esie.

¹¹Ndien angel Jehovah etie ke enyɔŋ okot enye, ete, Abraham, Abraham. Ndien enye ete, Se ami mi.

¹²Ndien enye ɔdɔhɔ ete, Kuda ubɔk fo utuk eyen oro, kunyuŋ unam enye baba ŋkpɔ kiet: koro ke emi ke mfiɔk nte afo efefehe Abasi, afo unyuŋ usinke mi eyen fo kierakiet.

¹³Ndien Abraham emenere enyin esie ese, ndien, sese okukim ke edem, emi nnuk esie ɔkɔmɔde ke mfuhɔ ikɔt: ndien Abraham aka okomum okukim oro, onyuŋ awa enye ke uwa ke itie eyen esie.

¹⁴Ndien Abraham osio ebiet oro enyiŋ Jehovah-jireh: nte emi edɔhɔde ke eyo mfin emi, Ke obot Jehovah ke eyekut.

¹⁵Ndien angel Jehovah etie ke enyɔŋ ɔtɔŋɔ ntak okot Abraham,

¹⁶onyuŋ ɔdɔhɔ ete, Jehovah ɔdɔhɔ ete, Mmotomo idem mi, nte Koro afo ama akanam ŋkpɔ emi, mukonyuŋ usinke mi eyen fo,

¹⁷eyen fo kierakiet; nte nyediɔŋ fi akamba, nyenyuŋ nnam ubon fo ewak eti-eti nte ntantafiɔŋ enyɔŋ, ye nte ntan emi odude ke mben inyaŋ; ubon fo eyenyuŋ enyene enyin-usuŋ mme asua mmɔ:

¹⁸kpukpru mme idut ke ererimbot eyenyuŋ ekut mfɔn eke otode ke ubon fo, koro afo ama okokop uyo mi.

¹⁹Ekem, Abraham afiak etiene mkparawa esie, ndien mmɔ edaha ke enyɔŋ, esaŋa ɔtɔ kiet eka ke Beer-sheba; ndien Abraham oduŋ ke Beersheba.

²⁰Edikem ke ŋkpɔ oro ama ekebe, etiŋ enɔ Abraham, ete, Sese, Milcah ŋko ama onyuŋ aman

²¹nditɔ ɔnɔ Nahor eyen-uka; Uz akpan esie, ye Buz eyen-eka esie,

²²ye Kemuel ete Aram; ye Chesed, ye Hazo, ye Pildash, ye Jidlaph,

²³ye Bethuel. Bethuel onyuŋ obon Rebekah: owo itiaita emi Milcah aman ɔnɔ Nahor, eyen-eka Abraham.

²⁴Ŋwan esa esie ŋko, emi enyiŋ esie ekerede Reumah onyuŋ aman Tebah, ye Gaham, ye Tahash, ye Maacah.