Read efik GENESIS 40 Bible Online

GENESIS 40 - efik bible

GENESIS 40

¹EDIKEM, ke ŋkpɔ emi ebede, andikama - wine edidem Egypt ye andinam - uyo edue ɔbɔŋ mmɔ edidem Egypt.

²Ndien Pharaoh ayat esit ye ndidaha owo esie iba oro, ye etubom mme andikama-wine, ye etubom mme andinam-uyo.

³Ndien enye ada mmɔ ɔnɔ ete ekpeme mmɔ ke ufɔk etubom mme andikpeme enye, ke ufɔk ukpeme ebiet emi ekɔbide Joseph do.

⁴Ndien etubom mme andikpeme edidem eteme Joseph ete ekpeme mmɔ ndien enye anam ŋkpɔ ɔnɔ mmɔ: ntre ke ekpeme mmɔ ndusuk ini.

⁵Ekem, owo mbiba oro edaba ndap, owo kiet ke ndap esie, owo kiet ke ndap esie, ke okoneyo kiet, owo kiet kiet nte erisiak ndap esie edide, andikama-wine ye andinam-uyo edidem Egypt emi ekekɔbide mmɔ ke ufɔk ukpeme.

⁶Edikem ke usenubɔk kiet Joseph oduk ke ebiet mmɔ, okut mmɔ, ndien, sese, mmɔ etie ke mfuhɔ.

⁷Ndien enye obup ndidaha owo Pharaoh emi edude ye enye ke ufɔk ukpeme ete esie, ete, Anam didie iso ɔdiɔk mbufo mfin emi?

⁸Ndien mmɔ edɔhɔ enye, ete, nnyin ima idaba ndap, ndien owo eke asiakde iduhe. Ndien Joseph ɔdɔhɔ mmɔ ete, Nte idige Abasi asiak ndap? Mbɔk, mbufo ekam etiŋ enɔ mi.

⁹Ndien etubom mme andikama-wine etiŋ ndap esie ɔnɔ Joseph, ete enye, Ke ndap mi, sese vine kiet ada mi ke iso;

¹⁰vine oro onyuŋ asiaha ubɔk ita: enye onyuŋ etie nte esesehe, asiaha mfri; etuek esie enyuŋ eŋwum ndat-ndat mfri;

¹¹cup Pharaoh onyuŋ odu mi ke ubɔk: ndien ami ŋkibi mfri, nnyimi nsin ke cup Pharaoh, ndien nda cup nnɔ Pharaoh ke ubɔk.

¹²Ndien Joseph ete enye, Ntem ke esiak enye: ubɔk ita oro edi usen ita:

¹³ayak usen ita Pharaoh eyemenere ibuot fo, eyenyuŋ ada fi afiak esin ke itie fo: ndien afo eyenɔ Pharaoh cup esie ke ubɔk nte akanamde ke akpa, ke ini afo ekedide andikama - wine esie.

¹⁴Ndien tim ti mi ŋko ke ini edifɔnde fi, nnyuŋ fɔn ido ye ami mbɔk, nnyuŋ tiŋ baŋa mi nɔ Pharaoh, nyuŋ sio mi ke ufɔk emi:

¹⁵koro ekeyipde mi efep ke idut mme Hebrew: ŋkonyuŋ nnamke baba ŋkpɔ kiet mi eke ekpesinde esin mi ke obube emi.

¹⁶Ekem, ke ini etubom mme andinam-uyo okutde ete erisiak ɔfɔn, enye ɔdɔhɔ Joseph, ete, Ami ŋko ndu ke ndap mi, ndien, sese, afia uyo ke akpan ita odoro mi ke ibuot:

¹⁷ndien kpukpru oruk udia Pharaoh eke anam-uyo anamde, edu ke udoro-enyɔŋ akpan; ndien inuen eta mmɔ ke akpan ke ibuot mi.

¹⁸Ndien Joseph ɔbɔrɔ ete, Emi edi se enye ediwɔrɔde: akpan ita oro edi usen ita.

¹⁹Ayak usen ita Pharaoh eyemenere ibuot fo esibe efep, eyenyuŋ eyiri fi ke eto; ndien inuen eyekɔŋ obukidem fo eta.

²⁰Edikem, ke ɔyɔhɔ usen ita, usen emana Pharaoh, ndien enye etem akwa udia ɔnɔ kpukpru ikɔt esie: onyuŋ emenere ibuot etubom mme andikama - wine, ye ibuot etubom mme andinam-uyo ke otu ikɔt esie.

²¹Onyuŋ ada etubom mme andikama - wine afiak esin ke itie ukama-wine esie; ndien enye ɔnɔ Pharaoh cup esie ke ubɔk.

²²Enye onyuŋ eyiri etubom mme andinam-uyo: kpasuk nte emi Joseph akasiakde ɔnɔ mmɔ.

²³Edi etubom mme andikama-wine itihi Joseph, edi efre enye.