Read efik GENESIS 41 Bible Online

GENESIS 41 - efik bible

GENESIS 41

¹EKEM ke utit isua iba Pharaoh adaba ndap: ndien, sese, enye ada ke mben akpa.

²Ndien, sese, enaŋ itiaba eke eyede ndise enyuŋ enyenede isek ke idem, eto ke akpa edɔk; ndien mmɔ edita nnyanyaŋa.

³Ndien, sese, enaŋ itiaba eŋwen eke ediɔide ndise, enyuŋ etiede ɔkpɔ-ɔkpɔ, eto ke akpa edɔk; ndien mmɔ edida ke ŋkaŋ enaŋ oro ke mben akpa.

⁴Ndien enaŋ oro ediɔide ndise, enyuŋ etiede ɔkpɔ-ɔkpɔ, edita enaŋ itiaba oro eyede ndise, enyuŋ enyenede isek ke idem. Ndien Pharaoh edemere.

⁵Ndien enye ɔtɔŋɔ ntak ede, onyuŋ adaba ndap: ndien, sese, mbuot ibokpot itiaba, eke edɔŋɔde, enyuŋ efɔnde, esiaha ke eto kiet,

⁶Ndien, sese, mbuot itiaba eke midɔŋɔke, eke ofim ikɔrabak okonyuŋ abiatde, etiene mmɔ edem etibe.

⁷Ndien mbuot itiaba oro midɔŋɔde, emen mbuot itiaba oro edɔŋɔde, enyuŋ eyɔhɔde. Ndien, ke Pharaoh edemerede, sese, edi ndap.

⁸Ekem ke usenubɔk esit etimere enye; ndien enye ɔdɔŋ ekekot kpukpru mbia-idiɔŋ Egypt, ye kpukpru mme ɔfiɔk-ŋkpɔ owo esie edi; ndien Pharaoh etiŋ ndap esie ɔnɔ mmɔ; edi baba owo kiet eke asiakde mmɔ ɔnɔ Pharaoh iduhe.

⁹Ndien etubom mme akama-wine ɔdɔhɔ Pharaoh, ete, Mfin emi nti nte nduede:

¹⁰Pharaoh akayat esit ye ifin esie, ndien enye ada mi ɔnɔ ete ekpeme ke ufɔk etubom mme andikpeme edidem, ami ye etubom mme anam-uyo:

¹¹ndien nnyin idaba ndap ke okoneyo kiet, ami ye enye; nnyin kiet kiet idaba nte esiakde ndap nnyin.

¹²Ndien eyen Hebrew kiet, ofin etubom mbon ukpeme, odu do ye nnyin; nnyin inyuŋ itiŋ inɔ enye, ndien enye asiak ndap nnyin ɔnɔ nnyin; asiak ɔnɔ owo nte ndap owo asaŋade.

¹³Ndien ɔwɔrɔ nte emi enye asiakde ɔnɔ nnyin; afiak esin mi ke itie mi, onyuŋ eyiri enye.

¹⁴Ndien Pharaoh ɔdɔŋ ekekot Joseph edi, ndien mmɔ ewara esio enye ke obube, enye onyuŋ okporo ntaŋ-ebek, onyuŋ ɔkpuhɔ edisine-ŋkpɔ esie, ndien aka ke ebiet Pharaoh.

¹⁵Ndien Pharaoh ɔdɔhɔ Joseph, ete, Mmadaba ndap, owo eke asiakde enye inyuŋ iduhe; mmonyuŋ ŋkop mbaŋa fi, nte ke afo eyefiɔk ndap ndisiak enye.

¹⁶Ndien Joseph ɔbɔrɔ Pharaoh, ete, Idige ami: Abasi eyebɔrɔ Pharaoh ke emem.

¹⁷Ndien Pharaoh ɔdɔhɔ Joseph, ete, Ke ndap mi, sese, ami nda ke mben akpa:

¹⁸ndien, sese, enaŋ itiaba eke enyenede isek ke idem, enyuŋ eyede ndise, eto ke akpa edɔk; ndien mmɔ edita nnyanyaŋa:

¹⁹ndien, sese, enaŋ itiaba eŋwen eke eferede, enyuŋ ediɔide idem eti-eti, enyuŋ etiede ɔkpɔ-ɔkpɔ, etiene mmɔ edɔk, akanam ŋkwe eke ediɔide nte mmɔ oro ke ofuri isɔŋ Egypt.

²⁰Ndien ɔkpɔ-ɔkpɔ ye idiɔk enaŋ eta edisehe enaŋ itiaba oro ekebemde iso.

²¹Edi ke adaŋemi edukde mmɔ ke idibi, owo ifiɔkke ite ke oduk mmɔ ke idibi; edi mmɔ etie mbukpo-mbukpo, kpasuk nte eketiede akpa. Ndien ndemere.

²²Ndien ŋkut ke ndap mi, ndien, sese, mbuot ibokpot itiaba eke edɔŋɔde enyuŋ efɔnde, esiaha ke eto kiet.

²³Ndien, sese, mbuot itiaba eke ekpaŋade, minyuŋ idɔŋɔke, eke ikɔrabak okonyuŋ abiatde, etiene mmɔ edem etibe:

²⁴ndien mbuot oro midɔŋɔde emen edifɔn mbuot itiaba oro: ndien ntiŋ nnɔ mbia-idiɔŋ; edi owo eke asiakde ɔnɔ mi iduhe.

²⁵Ndien Joseph ɔdɔhɔ Pharaoh ete, Ndap Pharaoh edi ubɔk kiet: se Abasi oyomde ndinam ke enye asiak ɔnɔ Pharaoh.

²⁶Edifɔn enaŋ itiaba oro edi isua itiaba; edifɔn mbuot ibokpot itiaba enyuŋ edi isua itiaba: enye edi ndap kiet.

²⁷Enaŋ itiaba oro eferede enyuŋ ediɔide idem, emi etienede mmɔ edɔk, edi isua itiaba; ndien mbuot itiaba oro midɔŋɔke, emi ikɔrabak akabiatde, eyedi isua akaŋ itiaba.

²⁸Ikɔ emi ndɔhɔde Pharaoh edi oro: se Abasi oyomde ndinam ke enye owut Pharaoh.

²⁹Sese, isua eduek itiaba ke edi ke ofuri isɔŋ Egypt:

³⁰ndien isua akaŋ itiaba eyetiene mmɔ edem edi; ndien eyefre kpukpru eduek oro ke isɔŋ Egypt; ndien akaŋ oro eyebiat isɔŋ ama

³¹Ndien akaŋ emi editienede idiyakke efiɔk eduek oro ke isɔŋ: koro enye edidobide eti - eti.

³²Ndien emi Pharaoh ɔtɔŋɔde ntak adaba ndap oro utim ikaba; edi koro Abasi ɔsɔŋɔde aduak ŋkpɔ emi, ndien Abasi idibigike ndinam enye.

³³Mmɔdo yak Pharaoh oyom owo ikike ye ifiɔk, onyuŋ odori enye ete akara isɔŋ Egypt.

³⁴Yak Pharaoh anam ntem, onyuŋ onim ndidaha ke isɔŋ, onyuŋ osio ubak kiet ke itie ition isɔŋ Egypt ke isua eduek itiaba.

³⁵Ndien yak ebon kpukpru udia nti isua emi ededi, yak enyuŋ ebon ibokpot esin Pharaoh ke ubɔk, ete edi udia ke obio, ndien ekpeme enye.

³⁶Ndien yak udia oro edi se edinimde enɔ isɔŋ ke isua itiaba emi ke isɔŋ Egypt: ndien isɔŋ iditakke ke akaŋ.

³⁷Ndien ikɔ oro enem Pharaoh, onyuŋ enem kpukpru ikɔt esie.

³⁸Ndien Pharaoh ɔdɔhɔ ikɔt esie ete, Nte nnyin iyekut owo eke spirit Abasi odude enye ke esit, nte enye emi?

³⁹Ndien Pharaoh ete Joseph, Sia Abasi ama akanam fi ɔfiɔk emi kpukpru, owo ndomo kiet eke enyenede ikike ye ifiɔk nte afo iduhe.

⁴⁰Afo eyekan ufɔk mi, kpukpru ikɔt mi eyenyuŋ enam ke uyo fo; ke ebekpo ikpɔŋ-ikpɔŋ ke ndikpon nkan fi.

⁴¹Ndien Pharaoh ɔdɔhɔ Joseph ete, Sese mmonim fi ke akakan ke ofuri isɔŋ Egypt.

⁴²Pharaoh onyuŋ ɔfɔrɔde mkpanuen esie ke ubɔk esie efep, ada enye ɔfɔri ke ubɔk Joseph, onyuŋ ɔnɔ enye edisine-ŋkpɔ eti linen esine, onyuŋ ɔkɔŋɔ enye ŋkpɔkɔbi gold ke itɔŋ;

⁴³onyuŋ anam enye odoro ke udiana-akpa chariot esie; mmɔ enyuŋ efiori enye ke iso, ete, Etɔŋɔ edɔŋ: onyuŋ onim enye edi akakan ke ofuri isɔŋ Egypt.

⁴⁴Pharaoh onyuŋ ɔdɔhɔ Joseph, ete, Ami ndi Pharaoh, ndien mitoho fi baba owo kiet idimenke ubɔk esie mme ukot esie ke ofuri isɔŋ Egypt.

⁴⁵Ndien Pharaoh osio Joseph enyiŋ Zaphenath-paneah; onyuŋ ɔnɔ enye Asenath eyen Poti-pherah oku On aŋwan ɔdɔ. Ndien Joseph ɔwɔrɔ asaŋa ebe ke ofuri isɔŋ Egypt.

⁴⁶Ndien Joseph osim isua edip ye duop ke ini enye adade ke iso Pharaoh edidem Egypt. Ndien Joseph adaha ke iso Pharaoh, onyuŋ asaŋa ebe ke ofuri isɔŋ Egypt.

⁴⁷Ndien isɔŋ oŋwum eti eti ke isua eduek itiaba.

⁴⁸Ndien enye obon kpukpru udia isua itiaba oro ekedude ke isɔŋ Egypt, onyuŋ onim udia ke obio: enye ada udia iŋwaŋ obio emi akande enye okuk, onim ke esit obio.

⁴⁹Ndien Joseph obon ibokpot nte ntan inyaŋ, ediwak eti-eti, tutu etre ndibat; koro akande ibat.

⁵⁰Ekem nditɔ-iren iba emana enɔ Joseph ke ini akaŋ mika-idige kaŋa, emi Asenath eyen Poti-pherah, oku On, amande ɔnɔ enye.

⁵¹Joseph onyuŋ osio akpan esie enyiŋ Manasseh: Koro Abasi amanam mi mfre kpukpru utom mi, ye ofuri ufɔk ete mi.

⁵²Enye onyuŋ osio udɔ enyiŋ Ephraim: Koro Abasi amanam mi ntɔt ke isɔŋ ukut mi.

⁵³Ekem, isua eduek itiaba oro ekedude ke isɔŋ Egypt ekure.

⁵⁴Ndien isua akaŋ itiaba etɔŋɔ ndidi, nte Joseph ɔkɔdɔhɔde: akaŋ oro onyuŋ odu ke kpukpru mme idut; edi udia odu ke ofuri isɔŋ Egypt.

⁵⁵Ekem, ofuri isɔŋ Egypt akpa biɔŋ, ndien kpukpru owo eseme enɔ Pharaoh eyom udia: ndien Pharaoh ɔdɔhɔ kpukpru Egypt, ete, Mbufo etiene Joseph; enam se enye ɔdɔhɔde mbufo.

⁵⁶Ndien akaŋ odudu ke iso ofuri edem oro: ndien Joseph eberede kpukpru ufɔk oro ibokpot odude ke esit, anyam ɔnɔ Egypt; ndien akaŋ ɔdɔdiɔŋ ɔsɔŋ ubɔk ke isɔŋ Egypt.

⁵⁷Ndien kpukpru mme idut edi ke Egypt, etiene Joseph edidep ibokpot: koro akaŋ ɔsɔŋde ke kpukpru mme idut.