Read efik GENESIS 44 Bible Online

GENESIS 44 - efik bible

GENESIS 44

¹EKEM, enye ɔdɔhɔ akama ŋkpɔ ufɔk esie, ete, Sin udia ke ekpat mmɔ oro yɔhɔ, adaŋa nte ekemede ndibiom, nyuŋ da silver owo kpukpru nyuŋ sin ke inua ekpat mmɔ.

²Ndien, da cup mi, cup silver, sin ke inua ekpat ekpri eyen, ye urua ibokpot esie. Ndien enye anam ke ikɔ oro Joseph ɔkɔdɔhɔde.

³Eyo esiere, ndien eyak mmɔ enyɔŋɔ, ye mme ass mmɔ.

⁴Mmɔ ewɔŋɔ ke obio, ikaisimke anyan ebiet, ndien Joseph ɔdɔhɔ akama-ŋkpɔ ufɔk esie ete, Daha ke enyɔŋ, bine mmɔ; ndien ke ini afo osimde mmɔ, dɔhɔ mmɔ ete, Ke nso ke mbufo eda idiɔk-ŋkpɔ esio usiene eti?

⁵Nte idige emi ke ete mi ɔŋwɔŋ ke esit; enye onyuŋ ada enye ayarare ŋkpɔ; emi mbufo enamde ntem emediɔk.

⁶Ndien enye osim mmɔ, onyuŋ emen ikɔ emi etiŋ ye mmɔ.

⁷Ndien mmɔ edɔhɔ enye ete, Ke didie ke ɔbɔŋ nnyin ɔdɔhɔ ikɔ emi? nsa nnyin ikɔt fo inamke oruk ŋkpɔ emi.

⁸Sese, silver oro ikokutde ke inua ekpat nnyin, ke nnyin ima ida ke idut Canaan ifiak isɔk fi; nnyin ikpanam didie iyip silver mme gold ke ufɔk usɔ?

⁹Owo ke otu ifin fo emi cup odude ye enye, yak enye akpa, ndien nnyin ŋko iyedi ifin usɔ.

¹⁰Ndien enye ɔdɔhɔ ete, Yak akam edi ntre ŋko ke ikɔ mbufo: owo emi cup odude ye enye, eyedi ofin mi; ndien mbufo eyebɔhɔ.

¹¹Ndien mmɔ ewara ebiomore ekpat mmɔ enim ke isɔŋ, ndien kpukpru owo etat ekpat mmɔ.

¹²Ndien enye oyom, ɔtɔŋɔ ke akpan, onyuŋ etre ke ekpri: ndien ekut cup oro ke ekpat Benjamin.

¹³Ndien mmɔ ewai edisine-ŋkpɔ mmɔ, kpukpru owo enyuŋ emen ekpat edori ke ass mmɔ, ndien efiak eka ke obio.

¹⁴Ekem, Judah ye nditɔ-ete esie edi ke ufɔk Joseph; enye onyuŋ odu do kaŋa, ndien mmɔ eduɔŋɔ enye ke iso ke isɔŋ.

¹⁵Ndien Joseph obup mmɔ ete, Nso ke mbufo enam ntem? nte mbufo ifiɔkke ite owo nte ami ikpuhɔ ndiyarare ŋkpɔ?

¹⁶Ndien Judah ɔdɔhɔ ete, Nnyin ididɔhɔ didie ye ɔbɔŋ mi? nnyin iditiŋ nso? inam didie ikaŋ idem nnyin? Abasi ama okut idiɔk-ŋkpɔ ifin fo: sese, nnyin idi ifin ɔbɔŋ mi, ye nnyin, ye owo emi ekutde enye cup ke ubɔk.

¹⁷Ndien Joseph ete, Nsa mi! nnamke ŋkpɔ emi: owo oro ekekutde enye cup oro ke ubɔk, eyedi ofin mi; edi mbufo esaŋa ke ifure edɔk etiene ete mbufo.

¹⁸Ndien Judah asaŋa ekpere, edidɔhɔ ete, Ɔbɔŋ mi, mbɔk, yak ofin fo etiŋ ikɔ esin ɔbɔŋ mi ke utɔŋ, esit fo okunyuŋ ofiop ye ofin fo: koro afo etiede nte Pharaoh.

¹⁹Ɔbɔŋ mi okobup ifin esie ete, Nte mbufo emenyene ete, mme eyenete?

²⁰Nnyin inyuŋ idɔhɔ ɔbɔŋ mi, ite Nnyin imenyene ete, akani owo, ye eyen usɔŋ esie, emi ekpride; eyen-eka esie omonyuŋ akpa, ndien enye osuk ikpɔŋ-ikpɔŋ ke eke eka esie, ete esie onyuŋ ama enye.

²¹Ndien afo ɔkɔdɔhɔ ifin fo, ete, Mbufo eda enye esuhɔre esɔk mi, man ŋwuk enyin nse enye.

²²Nnyin inyuŋ idɔhɔ ɔbɔŋ mi, ite, Ke eyen oro ikwe nte ɔkpɔŋde ete esie: koro enye ama ɔkpɔŋ ete esie, ete eyekpa.

²³Ndien afo ɔdɔhɔ ifin fo, ete, Ekpri eyen-ete mbufo mitieneke mbufo isuhɔre idi, mbufo iditɔŋɔke aba ntak ikut iso mi.

²⁴Ekem, ke ini nnyin idɔkde ikosim owo fo ete nnyin, nnyin inyuŋ itiŋ ikɔ ɔbɔŋ mi inɔ enye.

²⁵Ekem, ete nnyin ɔdɔhɔ ete, Mbufo efiak ekedep ekpri udia enɔ nnyin.

²⁶Nnyin inyuŋ idɔhɔ ite, Ke nnyin ikwe nte isuhɔrede: ekpri eyen-ete nnyin ama asaŋa ye nnyin iyesuhɔre ndien: koro nnyin midikemeke ndikut iso owo oro, ke ekpri eyen-ete nnyin midige ye nnyin.

²⁷Ndien ete mi, owo fo ɔdɔhɔ nnyin, ete, Ŋkɔm mbufo emɔfiɔk ete ke ŋwan mi akaman nditɔ iba ɔnɔ mi:

²⁸ekem, kiet ɔwɔrɔ ɔkpɔŋ mi, ndien, ndɔhɔ, nte, Ke ewewai enye; ŋka nnyuŋ

²⁹ŋkwe enye tutu osim emi: mbufo ema enyuŋ ebɔ mi emi ŋko, ŋkpɔ ama onyuŋ anam enye, ndien mbufo eyenam iwat mi osuhɔre ke udi ke idiɔk-ŋkpɔ.

³⁰Mmɔdo, ke ndisimde owo fo ete mi, eyen-ɔwɔŋ oro midige ye nnyin; sia ukpɔŋ esie eyirede ye ukpɔŋ eyen-ɔwɔŋ;

³¹ndien edidi, ke enye okutde ete ke eyen oro iduhe, eyekpa: ifin fo eyenyuŋ enam iwat owo fo, ete nnyin, ɔsuhɔre ke udi ke mfuhɔ.

³²Koro ofin fo eketiede ubiɔŋ ke eyen emi ye ete mi, nte, Mmendaha enye nsɔk fi, ndien nyenyene ikɔ ye ete mi ke nsinsi.

³³Mmɔdo, mbɔk, yak ofin fo etie ke ofin ɔbɔŋ mi ke ibuot eyen oro; ndien yak eyen oro etiene nditɔ-ete esie ɔdɔk.

³⁴Koro ndinam didie ndɔk ntiene ete mi, ndien eyen oro midige ye ami, mbak ndikut idiɔk-ŋkpɔ eke edinamde ete mi.