Read efik GENESIS 48 Bible Online

GENESIS 48 - efik bible

GENESIS 48

¹EDIKEM, ke ŋkpɔ oro ebede, edɔhɔ Joseph, ete, Usɔ ke ɔdɔŋɔ: ndien enye ada nditɔ-iren esie iba, Manasseh ye Ephraim aka ye mmɔ.

²Ndien etiŋ enɔ Jacob, ete Sese, eyen fo Joseph ke edi ndise fi: ndien Israel aŋwana, adaha etie ke bed esie.

³Ndien Jacob ɔdɔhɔ Joseph ete, El Shaddai okowut mi idem ke Luz, ke isɔŋ Canaan, onyuŋ

⁴ɔdiɔŋ mi. Onyuŋ ɔdɔhɔ mi ete, Sese, nyenam fi aka iso, nnyuŋ nnam fi awak, nnyuŋ nnam fi edi akamba otu owo; nnyuŋ nda isɔŋ emi nnɔ ubon fo eke editienede fi edem, ke nsinsi udeme.

⁵Mmɔdo nditɔ-iren fo iba emi emanade enɔ fi ke isɔŋ Egypt, ke adaŋemi mmeŋka-ndige kaŋa ntiene fi ke Egypt, mmɔ edi okim; Ephraim ye Manasseh edi okim,

⁶kpa nte Reuben ye Simeon. Edi nditɔ fo emi afo edibonde adian mmɔ, edidi okuo, mmɔ eyekere enyiŋ nditɔ-ete mmɔ ke udeme

⁷mmɔ. Ndien ami, ke ini oro ntode ke Paddan ndi, Rachel akpa mi ke ubɔk ke isɔŋ Canaan ke usuŋ, ɔsuhɔ esesit okposim Ephrath: ndien mbuk enye do ke usuŋ Ephrath; oro edi Bethlehem.

⁸Ekem, Israel okut nditɔ Joseph, ndien ɔdɔhɔ ete, Mme anie edi

⁹emi? Ndien Joseph ɔdɔhɔ ete esie ete, Mmɔ emi edi nditɔ mi emi Abasi ɔnɔde mi mi. Ndien enye ete, Mbɔk da mmɔ sɔk mi,

¹⁰man ndiɔŋ mmɔ. Edi enyin Israel okim ke usɔŋ, enye ikemeke aba ndikut ŋkpɔ. Ndien Joseph ada mmɔ ɔsɔk enye; enye onyuŋ otim mmɔ inua, onyuŋ afat mmɔ.

¹¹Ndien Israel ɔdɔhɔ Joseph ete, Ŋkekereke nte nyekut iso fo, edi, se, Abasi ayak mi ŋkut nditɔ fo nde.

¹²Ndien Joseph osio mmɔ ke ŋkpatian-ukot esie, onyuŋ ɔnuhɔ

¹³otuk iso esie ese isɔŋ. Joseph onyuŋ omum mmɔ mbiba, Ephraim ke ubɔk nnasia esie ese ufien Israel, Manasseh ŋko ke ubɔk ufien esie ese nnasia Israel, ada mmɔ ɔsɔk enye.

¹⁴Ndien Israel edinyan ubɔk nnasia esie odori ke ibuot Ephraim, emi edide ekpere-edem, onyuŋ ada ufien odori Manasseh ke ibuot, okokoi akama ubɔk esie; koro Manasseh edide akpan.

¹⁵Enye onyuŋ ɔdiɔŋ Joseph ete, Abasi emi mme ete mi Abraham ye Isaac esaŋade Enye ke iso, Abasi oro ɔkɔbɔkde mi ke ini ŋkamamana tutu osim mfin emi,

¹⁶angel emi akafakde mi osio ke kpukpru idiɔk-ŋkpɔ osuk ɔdiɔŋ nditɔ emi; yak mmɔ enyuŋ ekere enyiŋ mi, ye enyiŋ mme ete mi Abraham ye Isaac; yak mmɔ enyuŋ etɔt ekabare ediwak ke ufɔt isɔŋ.

¹⁷Ndien ke ini Joseph okutde nte ete esie adade ubɔk nnasia esie odori ke ibuot Ephraim, enye asua oro: onyuŋ omum ete esie ubɔk ete idorode enye ke ibuot Ephraim ifep, idori Manasseh ke ibuot.

¹⁸Ndien Joseph ɔdɔhɔ ete esie ete, Idige ntre, ete mi: koro enye emi edide akpan, da nnasia fo dori

¹⁹enye ke ibuot. Edi ete esie esin, ete, Mmɔfiɔk, eyen mi, mmɔfiɔk enye eyenyuŋ akabare edi idut, eyenyuŋ okpon ŋko: edi ekperedem eyen-ete esie, eyekpon akan enye, ubon esie eyenyuŋ asiaha

²⁰ediwak mme idut. Enye onyuŋ ɔdiɔŋ mmɔ ke usen oro, ete Israel eyeda fi ediɔŋ, ete, Abasi osuk onim fi nte Ephraim, ye nte manasseh: enye onyuŋ onim Ephraim akan Manasseh.

²¹Ndien Israel ɔdɔhɔ Joseph, ete, Sese ami mmɔŋ ŋkpa; edi Abasi eyedu ye mbufo, eyenyuŋ ada mbufo afiak aka ke isɔŋ mme ete

²²mbufo. Ami nnyuŋ nda ubak isɔŋ kiet emi ŋkosiode mme Amo-rite ke ubɔk, ke ofut mi ye utiga mi, nnɔ fi ŋkan nditɔ-usɔ.