Read efik GENESIS 8 Bible Online

GENESIS 8 - efik bible

GENESIS 8

¹EKEM Abasi eti Noah ye kpukpru unam, ye kpukpru ufene oro edude ye enye ke ubom:

²Abasi oyuŋ anam ofim ebe ke isɔŋ, ndien mmɔn ɔsuhɔre; ndien esiri idim inyaŋ, ye window ikpa enyɔŋ, ŋkpɔsɔŋ edim oro otode ke enyɔŋ onyuŋ ebiere;

³ndien mmɔŋ afafiak ɔkpɔŋ isɔŋ, asaŋa afiak edem: ndien mmɔŋ etek ke utit usen ikie ye aba ye duop.

⁴Ekem ubom oro abak ke obot Ararat, ke ɔyɔhɔ ɔfiɔŋ itiaba, ke

⁵ɔyɔhɔ usen ɔfiɔŋ efureba. Ndien mmɔŋ osuk etetek tutu osim ɔyɔhɔ ɔfiɔn duop: ke ɔyɔhɔ ɔfiɔŋ duop, ke akpa usen ɔfiɔŋ, ekut mbuot obot.

⁶Edikem ke utit usen aba, ndien Noah eberede window

⁷ubom emi enye akanamde: ndien enye ayak raven aka, ndien raven aka afiak, aka afiak, tutu mmɔŋ

⁸asat ɔkpɔŋ isɔŋ. Ndien enye ayak ibiom aka, ete ise mme mmɔŋ emetek ɔkpɔŋ iso isɔŋ:

⁹edi ibiom oro ikwe ɔtɔ eke enye ɔsɔride ikpat ukot esiemɔ, ndien afiak etiene enye ke ubom, koro; mmɔŋ odude ke iso ofuri isɔŋ; ndien enye anyan ubɔk esie omum enye, ada esin ke ubom.

¹⁰Ndien enye osuk etie usen itiaba eŋwen; ndien ɔtɔŋɔ ntak ayak

¹¹ibiom ke ubɔk aka; ndien ibiom oro editiene enye ke ini mbubreyo; ndien sese, nsek ikɔŋ olive odu enye ke inua. Ndien Noah ɔfiɔk ete ke mmɔŋ ama etek ɔkpɔŋ isɔŋ.

¹²Ndien Noah osuk etie usen itiaba enwen, ndien ayak ibiom oro aka; edi enye itɔŋɔke aba ntak ifiak itiene enye.

¹³Edikem ke ɔyɔhɔ isua ikie itiokiet ye kiet; ke akpa ɔfiɔŋ, ke akpa usen ɔfiɔŋ, mmɔŋ ama asat ɔkpɔŋ isɔŋ; ndien Noah osio ɔkɔm ubom efep ese, ndien, sese, iso isɔŋ amasat.

¹⁴Ndien ke udiana akpa ɔfiɔŋ, ke ɔyɔhɔ usen ɔfiɔŋ edip ye itiaba, isɔŋ ama asat ama.

¹⁵Ndien Abasi ɔdɔhɔ Noah, ete,

¹⁶Wɔrɔ ke ubom, afo ye ŋwan fo, ye nditɔ-iren fo, ye iban nditɔ-iren fo ŋko.

¹⁷Sioŋo kpukpru unam emi edude ye afo, ye kpukpru obukidem, ke inuen, ye ke ufene, ye ke mme andinyɔni eke enyɔnide ke isɔŋ; ndien yak mmɔ esiaha ke isɔŋ, enyuŋ etɔt, enyuŋ ewak ke isɔŋ.

¹⁸Ndien Noah ɔwɔrɔ ye nditɔ-iren esie, ye ŋwan esie, ye iban nditɔ-iren esie ŋko.

¹⁹Kpukpru unam ye kpukpru mme andinyɔni ye kpukpkru inuen, kpukpru se inyɔnide ke isɔŋ, ke oruk mmɔ eto ke ubom ewɔŋɔ.

²⁰Ekem, Noah anam itie-uwa ɔnɔ Jehovah, onyuŋ osio ndusuk ke kpukpru oruk edisana unam, ye ke kpukpru oruk edisana inuen, awa uwa ke itie-uwa oro.

²¹Ndien Jehovah okop edinem utebe oro, Jehovah onyun ɔdɔhɔ ke esit esiemɔ, ete, Ami nditɔŋɔke aba ntak nsuŋi isɔŋ mbaŋa owo; koro ekikere esit owo ɔdiɔkde toto ke uyen esie: ndinyuŋ ntɔŋɔke aba ntak nsobo kpukpru se idude uwem, nte ŋkanamde.

²²Adaŋa ofuri ini eke isɔŋ ododu, utɔ, ye ukpeŋe, ye tuep ye eyo, ye ndaeyo ye ukwɔ, ye uwemeyo ye okoneyo iditreke.