Read efik GENESIS 9 Bible Online

GENESIS 9 - efik bible

GENESIS 9

¹NDIEN Abasi ɔdiɔŋ Noah ye nditɔ esie, ete mmɔ, Mbufo etɔt, enyuŋ ewak, enyuŋ eyɔhɔ ke ererimbot.

²Ndien kpukpru unam obot ye kpukpru inuen enyɔŋ, ye kpukpru se inyɔnide ke isɔŋ, ye kpukpru iyak ke mmɔŋ eyebak mbufo, eyenyuŋ eteŋe mbufo: mmɔ esine mbufo ke ubɔk.

³Kpukpru se inyɔnide eke odude uwem eyedi udia mbufo; mmada kpukpru nnɔ mbufo, kpa nte ŋkadade awawa ikɔŋ nnɔ.

⁴Edi mbufo ekuta unam ye uwem esie, iyip esie.

⁵Nditreke ndiyom iyip mbufo eke uwem mbufo; nyeyom enye ke ubɔk kpukpru unam, ye ke ubɔk owo; nyeyom uwem owo ke ubɔk eyen-ete esie.

⁶Ama edi owo eke ɔduɔkde iyip owo, owo eyeduɔk iyip esie: koro ke mbiet Abasi ke enye akanam owo.

⁷Ndien mbufo etɔt enyuŋ ewak; esiaha ke isɔŋ, enyuŋ ewak ke esit.

⁸Ndien Abasi ɔdɔhɔ Noah, ye

⁹nditɔ-iren esie ŋko, ete, Semi ami mmanam ediomi mi ye mbufo ɔsɔŋɔ ada, ye nditɔ mbufo

¹⁰ŋko eke editienede mbufo; ye kpukpru se idude uwem nde emi edude ye mbufo, ke inuen, ye ke ufene, ye ke kpukpru unam obot ye mbufo; ɔtɔŋɔde ke kpukpru se itode ke ubom iwɔŋɔ osim kpukpru unam obot.

¹¹Nyenyuŋ ntim nnim ediomi mi ye mbufo: kpukpru obukidem iditakke aba ke mmɔŋ ukwɔ; ukwɔ eke osobode isɔŋ idinyuŋ iduhe aba.

¹²Ndien Abasi ɔdɔhɔ ete, Emi edi idiɔŋɔ ediomi emi ami nnimde ke ufɔt mi ye mbufo, ye kpukpru mme andidu uwem emi edude ye mbufo ke nsinsi emana:

¹³mmonim akpara mi ke idiɔk enyɔŋ, enye eyenyuŋ edi idiɔŋɔ ediomi ke ufɔt mi ye ererimbot.

¹⁴Ama ekem, ke ini nte nnamde idiɔk enyɔŋ ofuk isɔŋ, eyekut akpara ke idiɔk enyɔŋ:

¹⁵nyenyuŋ nti ediomi mi, emi odude ke ufɔt mi ye mbufo, ye kpukpru se idude uwem, ke kpukpru obukidem; ndien mmɔŋ idikabakede aba ukwɔ ndisobo

¹⁶kpukpru obukidem. Akpara eyenyuŋ odu ke idiɔk enyɔŋ; nyenyuŋ nse enye, nnyuŋ nti nsinsi ediomi ke ufɔt Abasi, ye kpukpru mme andidu uwem, ke kpukpru obukidem emi odude ke ererimbot.

¹⁷Ndien Abasi ɔdɔhɔ Noah ete, Emi edi idiɔŋɔ ediomi, emi nnimde ke ufɔt mi ye kpukpru obukidem emi odude ke ererimbot.

¹⁸Ndien nditɔ-iren Noah, emi etode ke ubom ewɔŋɔ edi Shem, ye Ham, ye Japhet: Ham onyuŋ edi ete Canaan.

¹⁹Mme mmɔ emi mbita edi nditɔ-iren Noah: ndien oto mmɔ emi ofuri ererimbot asiaha.

²⁰Ekem, Noah ɔtɔŋɔ ndidi owo iŋwaŋ, ndien ɔtɔ iŋwaŋ vine:

²¹enye onyuŋ ɔŋwɔŋ wine akpa; ndien ana iferi ke ufɔt ataya esiemɔ.

²²Ndien Ham, ete Canaan, okut ete esie iferi, onyuŋ etiŋ ɔnɔ nditɔ ete esie iba ke esien.

²³Ndien Shem ye Japhet emen ufuhɔ-ŋkpɔ, edori ke afara mmɔ mbiba, esaŋa edem-edem ekefuk ete mmɔ iferi, iso mmɔ onyuŋ ese edem ndien ikwe ete mmɔ iferi.

²⁴Ekem Noah edemere ke wine esie, ndien edifiɔk se ekpri eyen esie akanamde ye enye.

²⁵Ndien enye ɔdɔhɔ ete, Osuk ɔdiɔk ɔnɔ Canaan; enye eyedi ofin ifin nditɔ ete esie.

²⁶Enye onyuŋ ɔdɔhɔ ete, Etoro Jehovah Abasi Shem:

²⁷Canaan eyenyuŋ edi ofin mmɔ. Abasi eyenan Japhet ɔtɔt, enye eyenyuŋ oduŋ ke ataya Shem: Canaan eyenyuŋ edi ofin mmɔ.

²⁸Ndien Noah odu uwem ke ukwo ama okokure, ke isua ikie ita ye aba ye duop.

²⁹Ndien ofuri ini uwem Noah edi isua ikie usukkiet ye aba ye duop: ndien enye akpa.