Read efik 2 SAMUEL 1 Bible Online

2 SAMUEL 1 - efik bible

2 SAMUEL 1

¹EDIKEM adaŋemi Saul ama akapa, ke David ama okonyuŋ asuan Amalek afiak edi, ke David ama okonyuŋ etie ke Zikglag ke usen iba;

²edikem ke ɔyɔhɔ usen ita sese, owo kiet oto ke na-ekɔŋ emi Saul odude, edi ndien edisine-ŋkpɔ esie ewaha, ntɔŋ onyuŋ odoro enye ke ibuot: edikem ke adaŋemi enye osimde David, enye ɔduɔ ke isɔŋ atuak ibuot.

³Ndien David obup enye, ete, Afo oto mmɔŋ? Ndien enye ɔbɔrɔ enye, ete, Ŋkefeghe ke nna-ekɔŋ Israel mbɔhɔ.

⁴Ndien David obup enye, ete, Ŋkpɔ oro ɔkɔwɔrɔ didie? mbɔk tiŋ nɔ mi. Ndien enye ɔbɔrɔ ete, Kpukpru owo emefeŋe ke ekɔŋ, ediwak owo emenyuŋ eduɔŋɔ ekpa; Saul ye Jonathan eyen esie enyuŋ ekpa nko.

⁵Ndien David ɔdɔhɔ akparawa oro etiŋde ɔnɔ enye ntre, ete, Afo ada nso ɔfiɔk ete ke Saul ye Jonathan eyen esie emekpa?

⁶Ndien akparawa oro etiŋde ɔnɔ enye ntre, ete, ŋkodu ke obot Gilboa, ndien, sese, Saul ke ebere idem ke eduat esie; ndien, sese, mme chariot ye mbon horse ke esɔp ebine enye.

⁷Ndien enye akabare iso ese mi, onyuŋ okot mi, ndien ami ndɔhɔ nte, Se mi mi.

⁸Ndien enye obup mi, ete, Afo edi anie? Ndien mbɔrɔ enye, nte,

⁹Ami ndi eyen Amalek. Ndien enye ɔdɔhɔ mi, ete, Mbɔk, saŋa kpere mi, nyuŋ wot mi, koro isiɔŋ omumde mi: koro nsuk ŋkokop odudu uwem ke idemmi.

¹⁰Ndien nsaŋa ndiana enye, nnyuŋ ŋwot enye, koro ntimde mfiɔk nte ke enye ikpekeme ndidu uwem, adaŋemi enye ama ɔduɔ ntre: ndien mmen anyanya emi ayarade enye ke ibuot, ye okpoho emi esinde enye ke ubɔk, nda mmɔ ndisɔk ɔbɔŋ mi.

¹¹Ndien David, ye kpukpru owo emi edude ye enye, emum edisine-ŋkpɔ mmɔ ewai.

¹²Ntre ke mmɔ eseme, enyuŋ etua eyet, enyuŋ etre udia, tutu osim ke mbubreyo, ebaŋa Saul, ye Jonathan eyen esie, ye ikɔt Jehovah, ye ufɔk Israel; koro mmɔ eduɔŋɔde ke ofut.

¹³Ndien David ɔdɔhɔ akparawa oro ɔkɔbukde mbuk ɔnɔ enye, ete, Afo oto mmɔŋ? Ndien enye ɔbɔrɔ ete, Ami ndi eyen esen owo,eyen Amalek.

¹⁴Ndien David ɔdɔhɔ enye, ete, Nsinam afo mukefeheke ndinyan ubɔk fo ŋwot enye emi Jehovah ekeyetde aran?

¹⁵Ndien David okot akparawa kiet edi, onyuŋ ɔdɔhɔ ete, Saŋa kpere kokim enye. Ndien enye okim enye owot.

¹⁶David onyuŋ ɔdɔhɔ enye, ete, Iyip fo ɔsɔp idemfo: koro edi inua fo eketiŋ adian fi, ete, Ami ŋwot enye emi Jehovah ekeyetde aran.

¹⁷Ekem David ɔkwɔ ikwɔ emi abaŋa Saul ye Jonathan eyen esie:

¹⁸onyuŋ eteme, ete ekpep nditɔ Judah ikwɔ utiga: sese, emewet enye esin ke ŋwed Jasher (nti owo).

¹⁹O Israel, ubɔŋ amakpa afai ke ŋkokoŋo ebiet fo: Oh, mbon uko emeduɔŋɔ!

²⁰Mbufo ekutiŋ ke Gath, ekubuk mbuk ke aŋwa Ashkelon; mbak nditɔ mme Philistine iban edidat esit, mbak nditɔ mbon-edut iban edibre mbre.

²¹Mbufo ikpɔ obot ke Gilboa! ekuyak mbara, ye edim, ye iŋwaŋ edimenere uwa, edu mbufo ke esit: koro do ke ekeduɔk otu-ekɔŋ mbon-uko; otu-ekɔŋ Saul iyereke aran.

²²Utiga Jonathan ifiakke edem, ofut Saul inyuŋ ikabakede ukpɔk, ito ke iyip mme akpaŋa afai, ye ikpɔŋ mbon-uko.

²³Saul ye Jonathan ema, enyuŋ enem, kiet eken ke uwem mmɔ, ndien ibahakede mmɔ ke mkpa mmɔ: mmɔ esɔsɔp ekan ntrukpom, esɔŋ idem ekan lion.

²⁴Mbufo, nditɔ Israel iban, etua Saul eyet, emi ekesinde mbufo ididuot ɔfɔŋ ye ŋkpɔ inemesit ke idem; emi ɔkɔkɔnɔde ɔfɔŋidem mbufo ŋkpɔ mbana o gold.

²⁵Mbɔm! mbon uko emeduɔŋɔ ke ufɔt ekɔŋ. Jonathan amakpa afai ke ŋkokoŋo ebiet fo.

²⁶Esit ayat mi abaŋa fi, eyenete mi Jonathan; afo ama enem mi eti-eti: ima oro afo akamade mi edi utibe, akan ima iban.

²⁷Mbɔm! mbon uko emeduɔŋɔ, ŋkpɔ-ekɔŋ emenyuŋ esobo.