Read efik 2 SAMUEL 11 Bible Online

2 SAMUEL 11 - efik bible

2 SAMUEL 11

¹EDIKEM ke isua akabarede, ekem ke ini emi ndidem ekam ewɔŋɔde eka ekɔŋ, David ɔdɔŋ Joab ye ikɔt esie ŋko, ye ofuri Israel, ekesobo ye nditɔ Ammon, ndien mmɔ ekan Rabbah ekuk. Edi David etie ke Jerusalem.

²Edikem ke ini mbubreyo kiet, David adaha ke bed esie, asaŋa ke enyɔŋ ufɔk edidem: ndien enye ada ke enyɔŋ ufɔk okut ŋwan kiet nte eyerede mmɔŋ: ŋwan oro onyuŋ eye idem eti-eti.

³Ndien David ɔdɔŋ ekebup ebaŋa ŋwan oro. Ndien owo kiet ɔdɔhɔ ete, Nte enye emi idige Bath-sheba, eyen Eliam, ŋwan Uriah Hittite?

⁴Ndien David ɔdɔŋ mme isuŋutom ekeda enye edi; ndien enye (ŋwan) edi ke ebiet esie; enye onyuŋ okot ŋwan oro: ndien adaŋemi enye ekeyetde ndek esie efep, enye ɔnyɔŋ ke ufɔk esiemɔ.

⁵Ekem ŋwan oro oyomo; ndien edɔŋ eketiŋ enɔ David, ete, Ami mmoyomo.

⁶Ndien Daivid ɔdɔŋ ekedɔhɔ Joab, ete, Dɔŋ Uriah Hittite etiene mi. Ndien Joab ɔdɔŋ Uriah etiene David.

⁷Ekem adaŋemi Uriah osimde enye, David obup, mme ɔfɔn ye Joab, mme onyuŋ ɔfɔn ye mbon-ekɔŋ, mme ekɔŋ onyuŋ aka iso.

⁸Ekem David ɔdɔhɔ Uriah, ete, Suhɔre ka ufɔk fo, keyet ukot fo. Ndien Uriah adaha ke ufɔk edidem, ndien enɔ edidem etiene enye.

⁹Edi Uriah ana ke isɔŋ ke inua-otop edidem, ye kpukpru ikɔt ete esie, inyuŋ isuhɔkede ika ke ufɔk esiemɔ.

¹⁰Ndien adaŋemi mmɔ etiŋde enɔ David, ete, ke Uriah ikɔsuhɔke ika ke ufɔk esiemɔ, David obup Uriah, ete Nte afo utoho ke usuŋ? Nsinam ndien afo musuhɔkede uka ke ufɔk fo?

¹¹Ndien Uriah ɔdɔhɔ David, ete, Ekebe (Jehovah), ye Israel, ye Judah, ke etie ke ataya; etubom mi, Joab, ye ikɔt ɔbɔŋ mi, enyuŋ enena ke ntaŋwaŋ ebiet; nte ami ndiduk ke ufɔk mi, ndien, ndidia ŋkpɔ, nnyuŋ ŋŋwɔŋ, nnyuŋ ndaŋ ye ŋwan mi? Ma uwem fo, ye uwem ukpɔŋ fo, ndinamke ŋkpɔ emi.

¹²Ndien David ɔdɔhɔ Uriah, ete, Tie mi mfin emi ŋko, ndien mkpɔŋ nyeyak fi aka. Ndien Uriah etie ke Jerusalem ke usen oro, ye mkpɔŋ.

¹³Ndien David okot enye edi, ndien enye adia ŋkpɔ onyuŋ ɔŋwɔŋ ke iso esie; enye (David) onyuŋ esin enye ɔŋwɔŋ akpa: ndien ke mbubreyo enye ɔwɔrɔ aka akana ke bed esie ye ikɔt ete esie, edi isuhɔkede ika ke ufɔk esiemɔ.

¹⁴Edikem eyo esiere, ndien David ewet ŋwed ɔnɔ Uriah ke ubɔk, ete ada ɔsɔk Joab.

¹⁵Enye onyuŋ ewet ke ŋwed, ete, Mbufo enim Uriah ke iso ekɔŋ eke ɔsɔŋde sɔŋ, enyuŋ efiak edem ekpɔŋ enye, man enye ada unan akpa.

¹⁶Edikem ke ini Joab ekesede obio, enye onim Uriah ke ɔtɔ emi enye ɔfiɔkde ete ke mbon uko edu do.

¹⁷Ndien mbio-obio ewɔŋɔ ekeŋwana ye Joab: ndusuk ikɔt David enyuŋ eduɔŋɔ; Uriah Hittite onyuŋ akpa ŋko.

¹⁸Ekem Joab ɔdɔŋ owo okobuk ofuri mbuk ekɔŋ ɔnɔ David.

¹⁹Enye onyuŋ eteme isuŋutom, ete, adaŋemi afo edibukde mbuk ekɔŋ ɔnɔ edidem ama,

²⁰ndien ama ekem edidem ama otibi iyaresit, onyuŋ ɔdɔhɔ fi, ete, Nsinam mbufo ekesaŋade ekpere obio ntre ekeŋwana? Nte mbufo ifiɔkke ite ke mmɔ ekpetie ke enyɔŋ ibibene etiga.

²¹Anie owo ɔkɔtɔ Abimelek eyen Jerubbesheth? Nte ikedige ŋwan kiet etie ke ibibene otop itiat-ɔkɔk, ɔtɔ enye owot ke Thebez? Nsinam mbufo ekesaŋade ekpere ibibene? Dɔhɔ, ndien, ete, Owo fo Uriah Hittite ama onyuŋ akpa ŋko.

²²Ndien isuŋutom oro aka ɔkɔdɔhɔ David kpukpru se Joab ɔkɔdɔŋde enye utom.

²³Isuŋutom onyuŋ ɔdɔhɔ David, ete, Ŋkɔm mbio oro ekesɔŋ ekan nnyin, enyuŋ ewɔŋɔ ebine nnyin ke ntaŋwan ebiet, nnyin inyuŋ ibine mmɔ tutu isim ke inua-otop obio.

²⁴Ndien mbon utiga etie ke enyɔŋ ibibene etop ikɔt fo, ewot ndusuk ikɔt edidem, owo fo Uriah Hittite omonyuŋ akpa.

²⁵Ndien David ɔdɔhɔ isuŋutom oro, ete, Dɔhɔ ntem ye Joab, ete, Kuse ŋkpɔ emi ke idiɔk; koro ofut atade edem emi kpa nte edem oko: sɔŋ ubɔk ŋwana ekɔŋ ye obio, nyuŋ wuri enye: ndien afo sɔŋ enye esit.

²⁶Ekem adaŋemi ŋwan Uriah okopde ete ke Uriah ebe imɔ amakpa, enye atua ebe esie.

²⁷Ekem adaŋemi utua-eyet okurede, David ɔdɔŋ ekeda enye edi ke ufɔk esie, ndien enye akabare edi ŋwan esie, onyuŋ aman eyen ɔnɔ enye. Edi ŋkpɔ oro David akanamde ntre ayat Jehovah esit.