Read efik 2 SAMUEL 12 Bible Online

2 SAMUEL 12 - efik bible

2 SAMUEL 12

¹EKEM Jehovah ɔdɔŋ Nathan utom ke ɔtɔ David. Ndien enye aka ke ɔtɔ esie ɔkɔdɔhɔ enye, ete, Owo iba edu ke obio kiet; kiet edi ɔbɔŋ, kiet edi ubuene.

²Ɔbɔŋ oro enyene ata ediwak ŋkpri ufene ye enaŋ:

³edi ubuene oro inyeneke baba kiet, ke mibɔhɔke ekpri uman eyen-erɔŋ kierakiet, emi enye ekedepde onyuŋ ɔbɔkde; enye onyuŋ ɔkɔri enye ke ubɔk, ɔtɔ kiet ye nditɔ esie; adia ekpri udia esie; onyuŋ ɔŋwɔŋ ke cup esie, onyuŋ ana enye ke ikpanesit, ndien etie ye enye nte eyen aŋwan.

⁴Ekem owo isaŋ edi ke ebiet ɔbɔŋ oro, ndien enye afam ŋkpri ufene esiemɔ, ye enaŋ esiemɔ onim, inyimeke ndida ntem nnɔ owo isaŋ oro ekedide ke ebiet esie; edi ada eyen-erɔŋ ubuene oro etem ɔnɔ owo-isaŋ oro ekedide ke ebiet esie.

⁵Ndien David ayat esit eti-eti ye owo oro, enye onyuŋ ɔdɔhɔ Nathan, ete, Ma uwem Jehovah, owo oro akanamde ntre enyene ndikpa:

⁶enye onyuŋ enyene ndinɔ nditɔ-erɔŋ inaŋ; koro akanamde ŋkpɔ emi, koro minyuŋ inyeneke mbɔm.

⁷Ndien Nathan ɔdɔhɔ David, ete, Edi afo edi owo oro. Ntem ke Jehovah Abasi Israel ɔdɔhɔ, ete, Ami ŋkeyet fi aran nnim ke edidem Israel, ami ŋkonyuŋ nsio fi ke ubɔk Saul;

⁸nnyuŋ nnɔ fi ufɔk ubɔŋ fo, nnyuŋ mmen iban ɔbɔŋ fo nsin fi ke ikpanesit, nnyuŋ nnɔ fi ufɔk Israel ye eke Judah; ndien oro ekpekpri, ŋkpadian ŋkpɔ eŋwen nnɔ fi.

⁹Nsinam afo ekesinde uyo Jehovah ke ndek, onyuŋ anamde enye idiɔk ke iso? Afo omowot Uriah Hittite ke ofut, onyuŋ ada ŋwan esie ɔdɔ, onyuŋ ada ofut nditɔ Ammon owot enye.

¹⁰Mmɔdo ofut midikpɔŋke ufɔk fo tutu amama; koro afo emesin mi ke ndek, omonyuŋ ada ŋwan Uriah Hittite ke idemfo ɔdɔ.

¹¹Ntem ke Jehovah ɔdɔhɔ, ete, Sese, ami nyenam idiɔk-ŋkpɔ etibe ke ufɔk fo anam fi, nnyuŋ nda iban fo ke iso fo nnɔ mbɔhiduŋ fo, ndien enye eyekot iban fo ke iso utin emi.

¹²Ŋkɔm afo akanam ke ndibe: edi ami nyenam ŋkpɔ emi ke iso ofuri Israel, ye ke iso utin.

¹³Ndien David ɔdɔhɔ Nathan, ete, Mmanam idiɔk ido ye Jehovah. Ndien Nathan ɔdɔhɔ David, ete, Jehovah ɔmɔnyuŋ adahado ke idiɔk ido oro ɔnɔ fi; afo udukpaha.

¹⁴Edi koro afo amada ŋkpɔ emi esin mme asua Jehovah etiŋ idiɔk ikɔ, eyen emi amanade ɔnɔ fi ŋko iditreke ndikpa.

¹⁵Ekem Nathan ɔnyɔŋ ke ufɔk esie. Ndien Jehovah ɔtɔ eyen oro ŋwan Uriah akamande ɔnɔ David, ndien enye ɔdɔŋɔ.

¹⁶Ndien David ekpe Abasi ubɔk ɔnɔ eyen oro; David onyuŋ etre udia ŋko, onyuŋ oduk, ɔsuhɔre ana ke isɔŋ ke ofuri okoneyo.

¹⁷Ndien mbiowo ufɔk esie edaha ke enyɔŋ eka ke ɔtɔ esie, ete inam enye adaha ke isɔŋ; edi enye inyimeke, inyuŋ idiaha ŋkpɔ ye mmɔ.

¹⁸Edikem ke ɔyɔhɔ usen itiaba, eyen oro akpa. Ndien ndik iyakke ikɔt David eka ekesian enye, ete ke eyen akpa: koro mmɔ edɔhɔde ete, Sese, adaŋemi eyen okodude uwem, nnyin idɔhɔ ye enye, edi enye ikopke uyo nnyin: nnyin idinam didie, ndien, idɔhɔ enye, ite ke eyen amakpa, man anam idemesie idiɔk-ŋkpɔ.

¹⁹Ndien adaŋemi David okutde nte ikɔt esie edɔŋde odu, David ɔfiɔk ete ke eyen amakpa: ndien David obup ikɔt esie, ete, Nte eyen amakpa? Ndien mmɔ ebɔrɔ, ete, Amakpa.

²⁰Ndien David adaha ke isɔŋ, eyere mmɔŋ, ada aran eyet ke idem, onyuŋ ɔkpuhɔ edisine-ŋkpɔ esie, ndien oduk ke ufɔk Jehovah, akatuak ibuot: ndien aka ke ufɔk esie, ɔkɔdɔhɔ ete enim udia enɔ imɔ; ndien enye adia.

²¹Ndien ikɔt esie ebup enye, ete, Nso ŋkpɔ edi emi afo anamde? Afo eketre udia, onyuŋ atua eyet abaŋa eyenɔwɔŋ, adaŋemi enye odude uwem; ndien ke eyenɔwɔŋ akpade, afo adaha ke enyɔŋ adia ŋkpɔ.

²²Ndien enye ɔbɔrɔ, ete, Ŋketre udia, nnyuŋ ntua mbaŋa eyen-ɔwɔŋ oro, ke adaŋa enye odude uwem: koro ŋkerede nte, Anie ɔfiɔk mme Jehovah eyetua mi mbɔm, onyuŋ onim eyen oro ke uwem?

²³Edi ke emi enye ama akakpa, ndinam didie ntre udia? Nte mmekeme nditɔŋɔ ntak nnam enye afiak edi? Ami nyeka ntiene enye, edi enye idifiakke itiene mi.

²⁴Ndien David ɔdɔŋ Bathsheba ŋwan esie esit, onyuŋ etiene enye, aka ɔkɔfiɔk enye: ndien enye aman eyen-eren, onyuŋ osio enye enyiŋ Solomon.

²⁵Jehovah onyuŋ ama enye; onyuŋ ɔdɔŋ Nathan prophet utom, ete osio enye enyiŋ Jedidiah, abaŋa Jehovah.

²⁶Ekem Joab aŋwana ekɔŋ ye Rabbah nditɔ Ammon, onyuŋ ada obio edidem.

²⁷Joab onyuŋ ɔdɔŋ mme isuŋutom ekedɔhɔ David, ete, Mma ŋŋwana ekɔŋ ye Rabbah, mma nnyuŋ nda obio mmɔ.

²⁸Tim ndien bon mbon-ekɔŋ emi esuhɔde, nyuŋ di nam nna-ekɔŋ ŋwana ye obio, nyuŋ da enye, mbak ami ndida obio, ndien edida enyiŋ mi esio enye.

²⁹Ndien David obon kpukpru mbon-ekɔŋ, aka Rabbah, akaŋwana ye enye, onyuŋ ada enye.

³⁰Enye onyuŋ ayarare edidem mmɔ anyanya, emi odobide a talent gold, ye itiat nsɔŋurua, ke ibuot efep: mmɔ enyuŋ eda enye eyara David ke ibuot. Enye onyuŋ obume mbume obio ata ediwak:

³¹onyuŋ osio kpukpru owo eke edude ke esit, esin mmɔ ke idak uyɔkŋkpɔ ye harrow ukwak, ye ke ekudi ukwak, onyuŋ anam mmɔ ebe eduk ke ufɔp e brick: ntre ke enye onyuŋ anam ŋkpɔ ye kpukpru obio nditɔ Ammon. Ekem David ye kpukpru owo enyɔŋɔ eka ke Jerusalem.