Read efik 2 SAMUEL 13 Bible Online

2 SAMUEL 13 - efik bible

2 SAMUEL 13

¹EDIKEM ke ŋkpɔ emi ema ekebe, Absalom eyen David enyene ediye eyeneka aŋwan ekere Tamar; ndien Amnon eyen David ama enye.

²Ndien esit ayat Amnon esin enye ɔdɔŋɔ abaŋa Tamar eyenete esie aŋwan: koro enye edide eyenɔwɔŋ: Amnon inyuŋ ikwe usuŋ nte anamde enye baba ŋkpɔ kiet.

³Amnon onyuŋ enyene ufan kiet, ekere Jonadab, eyen Shimeah, eyenete David: Jonadab onyuŋ edi ata ɔfiɔkŋkpɔ owo.

⁴Ndien enye ɔdɔhɔ Amnon, ete, Afo, eyen edidem, anam didie ɔdiɔk idem ntem kpukpru ini? Utiŋke unɔ mi? Ndien Amnon ɔdɔhɔ enye, ete, Mmama Tamar, eyeneka Absalom eyenete mi.

⁵Ndien Jonadab ɔdɔhɔ enye ete, Suhɔre na ke bed fo, nam nte ɔdɔdɔŋɔ: ndien adaŋemi usɔ edide ndise fi, dɔhɔ enye, ete, Mbɔk yak Tamar eyenete mi edi edinɔ mi udia, onyuŋ etem udia ke iso mi, man nse enye, nnyuŋ mbɔ enye ubɔk ndia.

⁶Ntre ke Amnon ɔsuhɔre ana, onyuŋ anam nte ɔdɔŋɔde: ndien adaŋemi edidem edide ndise enye, Amnon ɔdɔhɔ edidem, ete, Mbɔk yak Tamar eyenete mi edi edisaŋ uyo iba ke iso mi, man mbɔ enye ke ubɔk ndia.

⁷Ekem David ɔdɔŋ ekedɔhɔ Tamar ke ufɔk, ete, Mbɔk, ka ke ufɔk Amnon eyen usɔ, ke tem udia nɔ enye.

⁸Ndien Tamar aka ke ufɔk Amnon eyenete esie; ndien enye anana. Ndien enye (Tamar) ada ndom, abuak ke mmɔŋ, obuen, onyuŋ anam uyo ke iso esie, onyuŋ asaŋ uyo oro.

⁹Ndien enye ada ŋkpɔ usaŋ uyo aŋwaŋa mmɔ ke iso esie; edi enye esin ndidia. Ndien Amnon ɔdɔhɔ ete, Yak kpukpru owo ewɔŋɔ ekpɔŋ mi. Ndien kpukpru owo ewɔŋɔ ekpɔŋ enye.

¹⁰Ndien Amnon ɔdɔhɔ Tamar, ete, Da udia di ke ubet, man mbɔ ke ubɔk fo ndia. Ndien Tamar emen uyo oro enye akanamde, ada ɔsɔk Amnon eyenete esie ke ubet.

¹¹Ndien adaŋemi enye adade uyo ɔsɔk enye, ete, adia, enye omum enye, onyuŋ ɔdɔhɔ enye, ete, Di mfiɔk fi, eyenete mi.

¹²Ndien enye ete, Ih ih, eyenete mi kubiat mi; koro midige se ekam esinamde ke Israel: kunam oburobut ŋkpɔ emi.

¹³Ndien ami ndida but mi ŋka mmɔŋ? Afo eyenyuŋ edi nte oburobut owo kiet ke Israel. Mbɔk, bup edidem; koro enye midisinke fi inɔ mi.

¹⁴Edi enye inyimeke ndikop uyo esie: ndien koro ɔsɔŋde akan enye, asabare enye, onyuŋ ɔfiɔk enye.

¹⁵Ekem Amnon asua enye ata akamba usua eti-eti; usua emi enye asuade eyen oro onyuŋ okpon akan ima oro enye akamade enye. Ndien Amnon ɔdɔhɔ enye, ete, Daha ke enyɔŋ nyɔŋ.

¹⁶Ndien enye ɔbɔrɔ enye, ete, Kusin idiɔk ŋkpɔ odu eke okponde akan enye eken emi afo amanam mi, ke eribin mi mfep.

¹⁷Edi enye inyimeke ndikop uyo esie. Enye onyuŋ okot akparawa esie emi anamde ŋkpɔ ɔnɔ enye, ete, Mbufo enam ŋwan emi adaha ɔkpɔŋ mi, ɔwɔrɔ ke efak, enyuŋ ekɔbi enye usuŋ ke edem.

¹⁸Ndien Tamar esine ediye ɔfɔŋ-idem: koro nditɔ edidem iban eke edide nditɔwɔŋ ekam esinede oruk ewura oro. Ndien asaŋutom esie ada enye (Tamar) ɔwɔrɔ ke efak, onyuŋ ɔkɔbi enye esuŋ ke edem.

¹⁹Ndien Tamar ada ntan ŋko ɔduɔk ke ibuot esie, onyuŋ awai ediye edisine-ŋkpɔ oro enye esinede, onyuŋ odori ubɔk esie ke ibuot, asaŋa atua.

²⁰Ndien Absalom eyeneka esie ɔdɔhɔ enye, ete, Nte Amnon eyenete mi okodu ye afo? Mbɔk, ndien, eyeneka mi, dop uyo: enye edi eyenusɔ: kukere ŋkpɔ emi. Ntre ke Tamar etie ke mfuhɔ ke ufɔk Absalom eyeneka esie.

²¹Ekem ke adaŋemi edidem David okopde kpukpru ikɔ emi, esit ayat enye eti-eti.

²²Edi Absalom idɔhɔke baba ikɔ kiet ye Amnon eyenete esie, edide eti, onyuŋ edide idiɔk: koro Absalom asuade Amnon, koro enye akasabarede Tamar eyeneka esie.

²³Edikem ke isua iba ema ekebe, Absalom enyene mme andifat idet erɔŋ ke Baal-hazor emi ekperede Ephraim: ndien Absalom okot kpukpru nditɔ-iren edidem edi.

²⁴Ndien Absalom aka ɔkɔdɔhɔ edidem, ete, Mbɔk, sese, owo fo enyene mme andifat idet erɔŋ; mbɔk, yak edidem, ye ikɔt esie esaŋa ye owo fo eka.

²⁵Edi edidem ɔdɔhɔ Absalom, ete, Ih ih, eyen mi, kunam nnyin kpukpru ika, mbak nnyin ididobi fi. Ndien enye (Absalom) iyire enye: edi enye inyimeke, ndika, edi ɔdiɔŋ enye.

²⁶Ndien Absalom ɔdɔhɔ ete, Midige ntre, mbɔk, yak Amnon eyenete mi asaŋa ye nnyin aka. Ndien edidem ɔdɔhɔ enye, ete, Enye edinam didie asaŋa ye afo aka?

²⁷Edi Absalom eyire enye; ndien enye ayak Amnon ye kpukpru nditɔ-iren edidem etiene enye eka.

²⁸Ekem Absalom eteme mkparawa esie, ete, Mbufo ese ini eke wine edidukde Amnon idem, ndien adaŋemi ndɔhɔde mbufo, nte, Mbufo etɔ Amnon: ewot enye, ndien, ekufehe ndik: nte idige ami nteme mbufo: mbufo esɔŋ ubɔk, enyuŋ edi mbon uko.

²⁹Ndien mkparawa Absalom enam Amnon, kpa nte Absalom eketemede mmɔ. Ndien kpukpru nditɔ-iren edidem edaha ke enyɔŋ, edoro ke mule mmɔ, enyuŋ efeŋe.

³⁰Edikem, ke ini mmɔ edude ke usuŋ, etop oro osim David, ete, Absalom ama owot kpukpru nditɔ edidem, baba owo mmɔ kiet inyuŋ isuhɔke.

³¹Ndien edidem adaha ke enyɔŋ, awai edisine-ŋkpɔ esie, onyuŋ ɔsuhɔre ana ke isɔŋ; kpukpru ikɔt esie enyuŋ ewai edisine ŋkpɔ mmɔ eda do.

³²Ekem Jonadab, eyen Shimeah eyenete David, ɔbɔrɔ ete, Kuyak ɔbɔŋ mi ekere ete ke kpukpru nditɔ edidem emekpaŋa; koro Amnon ikpɔŋ-ikpɔŋ amakpa: koro ema eduak ŋkpɔ emi ke uyo Absalom, toto ke usen oro enye akasabarede Tamar eyeneka esie aŋwan.

³³Ɔbɔŋ mi edidem okukere, ndien, ŋkpɔ emi, ete ke kpukpru nditɔ edidem emekpaŋa: koro Amnon ikpɔŋ-ikpɔŋ amakpa.

³⁴Ndien Absalom ɔbɔhɔ. Ekem eyen emi adade ekpeme, emenere enyin esie ese, ndien sese, ediwak owo ke esaŋa ke ŋkaŋ obot ke edem esie edi.

³⁵Ndien Jonadab ɔdɔhɔ edidem, ete, Sese, nditɔ edidem ke edi: ke ekem ntre ke uyo owo fo.

³⁶Edikem adaŋemi enye osuk ɔdɔhɔde ntem, sese, nditɔ edidem ediwɔrɔ, ndien mmɔ emenere uyo mmɔ etua eyet: edidem ye kpukpru ikɔt esie enyuŋ etua akamba eyet eti-eti.

³⁷Ndien Absalom efehe aka ke ɔtɔ Talmai eyen Ammihur, edidem Geshur. David onyuŋ atua eyen esie kpukpru usen.

³⁸Ntem ke Absalom efehe aka Geshur, onyuŋ oduŋ do ke ofuri isua ita.

³⁹Ndien oro esin David edidem etre ndiwɔrɔ ŋkoyom Absalom: koro enye ama okokop ndɔŋesit abaŋa Amnon, koro enye ama akakpa.