Read efik 2 SAMUEL 18 Bible Online

2 SAMUEL 18 - efik bible

2 SAMUEL 18

¹EKEM David otim mmɔ emi edude ye enye esin ke ŋka, onyuŋ onim mme etubom mme tɔsin, ye mme etubom mme ikie ɔnɔ mmɔ.

²Ndien David ɔdɔŋ ɔyɔhɔ ubak mbɔn-ekɔŋ ita, ete esaŋa ye Joab, onyuŋ ɔdɔhɔ ɔyɔhɔ ubak ita, ete esaŋa ye Abishai eyen Zeruiah, eyeneka Joab, ɔyɔhɔ ubak ita eken enyuŋ esaŋa ye Ittai Gittite. Ndien edidem ɔdɔhɔ kpukpru owo, ete, Ami nde mmɔŋ ŋwɔrɔ ye mbufo.

³Ndien mmɔ edɔhɔ ete, Afo uduwɔrɔke: koro edieke nnyin idifeŋede, mmɔ idikereke nnyin: koro afo etiede nte owo nnyin tɔsin duop:

⁴ndien akam ɔfɔn nte afo etiede ke obio anyaŋa nnyin. Ndien edidem ɔdɔhɔ mmɔ, ete, Nyenam se mbufo emade. Edidem onyuŋ ada ke mben inua-otop, ndien kpukpru owo ewɔŋɔ ke ikie, ke ikie, ye ke tɔsin, ke tɔsin.

⁵David onyuŋ eteme Joab, ye Abishai, ye Ittai, ete, Mbufo enam suŋ ye eyen emi, kpa Absalom, ebaŋa mi. Kpukpru owo enyuŋ ekop nte edidem etemede kpukpru mme etubom abaŋa Absalom.

⁶Ekem kpukpru owo ewɔŋɔ ke ntaŋwaŋ ebiet eka ekebiɔŋɔ Israel: ndien ekɔŋ onyuŋ odu ke akai Ephraim;

⁷ndien nditɔ Israel esuana do ke iso ikɔt David: ediwak owo enyuŋ ekpaŋa do ke usen oro, kpa tɔsin owo edip.

⁸Ekɔŋ oro onyuŋ ofuk ofuri iso isɔŋ: akai onyuŋ adia ediwak owo akan se ofut atade ke usen oro.

⁹Ekem Absalom edisobo ye ikɔt David. Ndien Absalom odoro mule, mule oro onyuŋ oduk ke idak ŋkɔk akamba ofriyo kiet, ndien ŋkɔk oro omum enye ibuot, emen akama ufum-ufum ke ufɔt enyɔŋ ye isɔŋ; ndien mule oro enye odorode ebe.

¹⁰Ndien owo kiet okut, aka eketiŋ ɔnɔ Joab, ete, Sese, mmokut Absalom nte enye ɔkɔŋɔde ke ofriyo kiet.

¹¹Ndien Joab ɔdɔhɔ owo oro eketiŋde ɔnɔ enye, ete, Sese, afo okokut, ndien anam didie ukimke enye do uduɔk ke isɔŋ? Ŋkpe-nyene ndinɔ fi shekel silver duop, ye ubɔp-isin kiet.

¹²Ndien owo oro ɔbɔrɔ Joab, ete, Ami mma ŋkpodomo tɔsin shekel ke eka-ubɔk mi, ŋkpanyanke ubɔk mi ntuk eyen edidem: koro ke utɔŋ nnyin ke edidem okowuk fi, ye Abishai, ye Ittai, ete, Mbufo kpukpru ekpeme eyen oro kpa Absalom.

¹³Mma ŋkpanam abiaŋa ntuk uwem mi, ndien baba ŋkpɔ kiet idibeke edidem, afo okponyuŋ onim idem ke usua mi.

¹⁴Ndien Joab ɔdɔhɔ ete, Ŋkwe nte ndidade ntem ye afo. Ndien enye emen onyim ita ke ubɔk, ada mmɔ okim Absalom ke esit, ke enye odude uwem kaŋa ke ufɔt ofriyo.

¹⁵Ndien mkparawa duop emi ekamade ŋkpɔ-ekɔŋ Joab ekan ekuk, enyuŋ etɔ Absalom ewot.

¹⁶Ekem Joab ofuri ukorowo, ndien kpukpru owo etre ndibine Israel, efiak: koro Joab oyomde ndinim mbon oro.

¹⁷Ndien mmɔ eda Absalom eduɔk ke akamba obube ke akai oro, enyuŋ ekubi enye ata akamba ebok itiat ke idem: kpukpru nditɔ Israel enyuŋ efeŋe eka ke mme tent mmɔ.

¹⁸Ndien Absalom ama akada adaha emi odude ke ebedeŋ edidem, onim ɔnɔ idemesie, ke eyo uwem esie: koro enye ɔkɔdɔhɔde ete, Ami nnyeneke eyen-eren eke edinamde eti enyiŋ mi: enye onyuŋ ada enyiŋ esie osio adaha oro: enye onyuŋ ekere adaha Absalom tutu osim mfin emi.

¹⁹Ndien Ahimaaz eyen Zadok ɔdɔhɔ ete, Mbɔk, yak mfehe, ŋketiŋ eti ikɔ emi nnɔ edidem, koro Jehovah emekpe ikpe osio enye ke ubɔk mme asua esie.

²⁰Edi Joab ɔdɔhɔ enye, ete, Idige afo obuk mbuk mfin emi, edi eyebuk usen efen: edi udubukke mfin, koro eyen edidem akpade.

²¹Ndien Joab ɔdɔhɔ Cushi, ete, Men se afo okokutde ka ketiŋ nɔ edidem,

²²Ndien Cushi ɔnuhɔ ɔnɔ Joab, onyuŋ otibi itɔk. Ndien Ahimaaz eyen Zadok ɔtɔŋɔ ntak ɔdɔhɔ Joab, ete, Edi se ededi, mbɔk, yak ami mfehe mbine Cushi. Ndien Joab ɔdɔhɔ ete, Afo edifehe didie, eyen mi, emi munyeneke ikɔ eke adade aka?

²³(Enye ete) Edi se ededi, yak mfehe. Ndien enye ete, Fehe. Ndien Ahimaaz efehe ke usuŋ una-isɔŋ, onyuŋ ebe Cushi.

²⁴Ndien David etie ke ufɔt enyin-usuŋ iba: andikpeme onyuŋ ɔdɔk ke enyɔŋ inua-otop ke ibibene, onyuŋ emenere enyin esie ese, ndien sese, owo ke efehe ikpɔŋ.

²⁵Ndien andikpeme ofiori asian edidem. Ndien edidem ɔdɔhɔ ete, Edieke enye edide ikpɔŋ, mbuk odu enye ke inua. Ndien enye asaŋa ɔdɔdiɔŋ ekpere.

²⁶Ekem andikpeme okut owo efen nte efehede: andikpeme onyuŋ ofiori okot etie usuŋ, ete, Sese, owo ke efehe ikpɔŋ. Ndien edidem ɔdɔhɔ ete, Enye ŋko ada mbuk edi.

²⁷Andikpeme onyuŋ ɔdɔhɔ ete, Etie mi nte itɔk akpa owo ebietde itɔk Ahimaaz eyen Zadok. Ndien edidem ɔdɔhɔ ete, Enye edi eti owo, onyuŋ ada eti mbuk edi.

²⁸Ekem Ahimaaz ofiori ɔdɔhɔ edidem, ete, Ŋkpɔ ɔfɔfɔn. Enye onyuŋ atuak ibuot ɔnɔ edidem, otuk iso esie ese isɔŋ: onyuŋ ɔdɔhɔ ete, Ekɔm Jehovah Abasi fo, emi adade mmɔ emi emende ubɔk mmɔ eŋwana ye ɔbɔŋ mi edidem, ayak ɔnɔ.

²⁹Ndien edidem ɔdɔhɔ ete, Nte ɔfɔn ye eyen oro, Absalom? Ndien Ahimaaz ete, Ŋkokut akwa ndutime, ke ini Joab ɔdɔŋde owo edidem ye mi owo fo utom, edi mfiɔkke se idude.

³⁰Ndien edidem ɔdɔhɔ ete, Wɔŋɔre di da mi. Ndien enye ɔwɔŋɔre, atuak ada.

³¹Ekem, sese, Cushi edi. Ndien Cushi ɔdɔhɔ ete, Yak etiŋ eti ikɔ, ɔbɔŋ mi edidem, koro Jehovah emekpe ikpe mfin emi, osio fi ke ubɔk mme mmɔ oro edahade ke enyɔŋ eŋwana ye afo.

³²Ndien edidem ɔdɔhɔ Cushi ete, Nte ɔfɔn ye eyen oro, kpa Absalom? Ndien Cushi ɔbɔrɔ ete, Yak mme asua ɔbɔŋ mi edidem, ye kpukpru owo eke edahade ke enyɔŋ ete inam fi idiɔk, etie nte eyen oro.

³³Ndien esit ayat edidem, enye onyuŋ ɔdɔk ke ubet ke enyɔŋ inua-otop, ke atua eyet: onyuŋ ɔdɔhɔ ntem, nte enye ɔdɔkde, ete, Eyen mi Absalom! eyen mi, eyen mi, Absalom! ami ŋkpakam ŋkpa ke ibuot fo, O Absalom, eyen mi, eyen mi.