Read efik 2 SAMUEL 20 Bible Online

2 SAMUEL 20 - efik bible

2 SAMUEL 20

¹NDIEN oburobut owo kiet odu do ekere Sheba, eyen Bichri, eyen Benjamin; ndien enye ofuri ukorowo, onyuŋ ɔdɔhɔ ete, Nnyin inyeneke ubak idem David, inyuŋ inyeneke udeme idem eyen Jesse: yak kpukpru owo enyɔŋɔ ke tent mmɔ, O Israel.

²Ntre ke kpukpru nditɔ Israel ekpɔŋ David edɔk, etiene Sheba, eyen Bichri: edi nditɔ Judah eyire ye edidem mmɔ, ɔtɔŋɔde ke Jordan tutu osim ke Jerusalem.

³Ekem David edisim ufɔk esie ke Jerusalem; ndien edidem ada iban-esa duop oro enye okonimde ete ekpeme ufɔk, esin mmɔ ke ufɔk ukpeme, onyuŋ ɔbɔk mmɔ, edi ikotke aba mmɔ. Ntre ke mmɔ ekuhɔ tutu osim usen mkpa mmɔ, ke edu uwem nte iban mme ebe mmɔ ekpade.

⁴Ekem edidem ɔdɔhɔ Amasa, ete, Kowuk nditɔ Judah, ete etiene mi ke usen ita, afo nyuŋ du mi.

⁵Ndien Amasa aka ndiwuk Judah: edi enye ebigi ebe ini emi edidem okodoride ɔnɔ enye.

⁶Ndien David ɔdɔhɔ Abishai, ete, Ke emi Sheba eyen Bichri eyenam nnyin idiɔk akan Absalom: afo da ikɔt usɔ kebine enye, mbak enye edisim obio ibibene, onyuŋ osio nnyin enyin.

⁷Ndien ikɔt Joab etiene enye ke edem ewɔŋɔ, ye mme Cherethite, ye mme Pelethite, ye kpukpru mbon uko: ndien mmɔ eto ke Jerusalem eka ndibine Sheba eyen Bichri.

⁸Adaŋemi mmɔ esimde akamba itiat emi odude ke Gibeon, Amasa ɔbiɔŋɔre ke iso mmɔ. Ndien Joab ɔbɔbɔ ɔfɔŋ-idem emi enye esinede, ubɔp-ofut emi enye etebede ke isin esie ke efɔk esie onyuŋ ɔbɔbɔ ke enyɔŋ: ndien efɔk ɔkpɔhɔre, ofut onyuŋ ɔduɔ.

⁹Ndien Joab ɔdɔhɔ Amasa, ete, Mmɔkɔm fi, eyen-ete mi. Joab onyuŋ ada ubɔk nnasia omum Amasa ntaŋebek, ete itim enye inua.

¹⁰Edi Amasa isehe ofut oro odude Joab ke ubɔk: ndien enye (Joab) okim enye ke idibi, osioŋo nsia esie ɔduɔk ke isɔŋ, itɔŋɔke ntak ikim enye; ndien enye akpa. Ndien Joab ye Abishai eyen-ete esie ebine Sheba eyen Bichri.

¹¹Ndien akparawa Joab kiet ada ekpere enye, onyuŋ ɔdɔhɔ ete, Yak owo eke amade Joab, ye eke adade ye David, etiene Joab.

¹²Ndien Amasa amamiaŋa ke iyip ke ufɔt ɔkpɔ-usuŋ. Ndien adaŋemi owo oro okutde nte kpukpru owo etuakde eda, enye emen Amasa ke ɔkpɔ-usuŋ efep, esin ke iŋwaŋ, onyuŋ ada ɔfɔŋ-idem ofuk enye, adaŋemi enye okutde nte kpukpru owo eke esimde enye etuakde eda.

¹³Adaŋemi eke emende enye ke ɔkpɔ-usuŋ efep, kpukpru owo ebe etiene Joab, man ebine Sheba eyen Bichri.

¹⁴Ndien enye asaŋa ke otu kpukpru esien Israel, ebe aka ke Abel, ye Beth-maacah, ye ke ɔtɔ kpukpru mme Berite: ndien mmɔ esop idem ɔtɔ kiet, enyuŋ etiene enye ŋko.

¹⁵Ekem mmɔ eka ekekan enye (Sheba) ekuk ke Abel Beth-maacah, mmɔ enyuŋ ebiom ntan ekubi, enam ibombom ke mben obio, enye onyuŋ ada ke ukpe obio: ndien kpukpru mmɔ eke edude ye Joab ewuri, man eduɔk ibibene.

¹⁶Ndien enyene-ibuot aŋwan kiet ke obio ofiori okot, ete, Mbufo ekop, ekop; mbɔk, edɔhɔ Joab, ete, Yak enye asaŋa ekpere mi, man ndɔhɔ ikɔ ye afo.

¹⁷Ndien ke adaŋemi enye asaŋade ekpere enye, ŋwan oro obup ete, Nte afo edi Joab? Ndien enye ete, Edi ami. Ndien aŋwan ete enye, Kop uyo ofin aŋwan fo. Ndien enye ete, Mmɔŋ ŋkop.

¹⁸Ndien ŋwan ɔdɔhɔ ete, Ekam esidɔhɔ ke mbemiso, ete, Yak ebup Abel, ndien enam ŋkpɔ.

¹⁹Ami ndu ke otu mbon emem ye akpanikɔ ke Israel: afo oyoyom ndisobo obio ye eka ke Israel. Afo edinam didie emen udeme Jehovah emen?

²⁰Ndien Joab ɔbɔrɔ ete, Nsa mi O! nsa mi O,

²¹mmenke nnyuŋ nsoboke. Ŋkpɔ itiehe ntre: edi owo kiet, ekere sheba, eyen Bichri, emi otode ke obot Ephraim, ememenere ubɔk esie aŋwana ye edidem David: mbufo eda enye ikpɔŋ enɔ mi, ndien nyedaha ke obio emi.

²²Ndien ŋwan oro ɔdɔhɔ Joab, ete, Sese, eyeda ibuot esie etie ke ibibene etop enɔ fi. Ndien ŋwan oro ada eti-ibuot esie etiene kpukpru mbio-obio. Ndien mmɔ ebigi Sheba eyen Bichri ibuot, emen etop enɔ Joab. Ndien enye ofuri ukorowo, ndien mmɔ esuana ekpɔŋ obio kpukpru owo eka ke tent mmɔ. Ndien Joab onyuŋ etiene edidem ke Jerusalem.

²³Ntre ke Joab edi etubom kpukpru mbon-ekɔŋ Israel: Benaiah eyen Jehoiada onyuŋ edi etubom mme Cherethite ye eke mme Pelethite:

²⁴Adoram onyuŋ edi akama utomo: Jehoshaphat eyen Ahilud onyuŋ ewet ŋkpɔ obio;

²⁵Sheva onyuŋ edi ewet-ŋwed: Zadok ye Abiathar enyuŋ edi mme oku:

²⁶Ira Jairite onyuŋ edi akamba owo David.