Read efik 2 SAMUEL 21 Bible Online

2 SAMUEL 21 - efik bible

2 SAMUEL 21

¹NDIEN akaŋ odu ke ini David ke ofuri isua ita, ke isua, ke isua; ndien David oyom iso Jehovah. Ndien Jehovah ɔdɔhɔ ete, Oto Saul ye ufɔk iyip esie, koro enye okowotde mme Gibeonite.

²Ekem edidem okot mme Gibeonite, onyuŋ ɔdɔhɔ mmɔ; (edi mme Gibeonite idige nditɔ Israel, edi mmɔ eto ke mme Amorite eke esuhɔde; nditɔ Israel ekenyuŋ eŋwɔŋɔ enɔ mmɔ: ndien Saul okoyom usuŋ nte owotde mmɔ, ke ufup esie emi enye ofibede ɔnɔ nditɔ Israel ye Judah:)

³ndien David ɔdɔhɔ mme Gibeonite, ete, Nso ke ndinam nnɔ mbufo? ndinyuŋ nda nso nsio isop, man mbufo ediɔŋ udeme Jehovah?

⁴Ndien mme Gibeonite edɔhɔ enye, ete, Saul ye ufɔk esie inyeneke ikɔ silver ye gold ye ami; ndien inyeneke nnyin ndiwot owo ke Israel. Ndien enye ɔdɔhɔ ete, Se mbufo edidɔhɔde, oro ke ndinam nnɔ mbufo.

⁵Ndien mmɔ ebɔrɔ edidem, ete, Owo oro akabiatde nnyin, okonyuŋ aduakde ete isobo ifep, ikutie aba ke ofuri adaŋa Israel,

⁶yak eda owo oro ye nditɔ iren esie itiaba enɔ nnyin, man nnyin iyiri mmɔ inɔ Jehovah ke Gibeah Saul, emi Jehovah ekemekde. Ndien edidem ete, Ami nyenɔ.

⁷Edi edidem ɔkpɔŋ Mephibosheth, eyen Jonathan, eyen Saul, abaŋa uŋwɔŋɔ Jehovah oro okodude ke ufɔt mmɔ, kpa ke ufɔt David ye Jonathan eyen Saul.

⁸Ndien edidem ada nditɔ-iren Rizpah eyen Aiah aŋwan, iba, Armoni ye Mephibosheth, emi enye akamande ɔnɔ Saul, ye nditɔ iren Merab eyen Saul aŋwan, ition, emi enye akamande ɔnɔ Adriel eyen Barzillai Meholathite;

⁹enye emen mmɔ esin mme Gibeonite ke ubɔk, ndien mmɔ eyiri mmɔ ke obot ke iso Jehovah: ndien kpukpru mbitiaba oro eduɔŋɔ ini kiet, enyuŋ ewot mmɔ ke ini ukpeŋe ibokpot, ke akpa usen, ke eritɔŋɔ ukpeŋe barley.

¹⁰Ndien Rizpah eyen Aiah aŋwan ada ɔfɔŋ ikpo ebri ke enyɔŋ itiat ɔnɔ idem esie, ke eritɔŋɔ ukpeŋe, tutu mmɔŋ oto ke enyɔŋ edep mmɔ ke idem, enye inyuŋ iyakke mme inuen enyɔŋ esɔrɔ mmɔ ke idem ke uwemeyo, inyuŋ iyakke mme unam ikɔt etuk mmɔ ke okoneyo.

¹¹Ekem mmɔ emen se Rizpah eyen Aiah aŋwan, ŋwan-esa Saul akanamde,esian David.

¹²Ndien David aka ɔkɔbɔ mme ɔkpɔ Saul, ye mme ɔkpɔ Jonathan eyen esie ke ubɔk mbio-obio Jabesh Gilead oro ekeyipde mmɔ ke aŋwa Bethshan, ke ɔtɔ oro mme Philistine ekekɔŋde mmɔ, ke ini mme Philistine ekewotde Saul ke Gilboa:

¹³enye onyuŋ ada mme ɔkpɔ Jonathan eyen esie do ɔdɔk; mmɔ enyuŋ etaŋ mme ɔkpɔ mmɔ oro ekeyiride.

¹⁴Ndien mmɔ eda mme ɔkpɔ Saul ye mme ɔkpɔ Jonathan eyen esie, ebuk ke isɔŋ Benjamin ke Zelah, ke udi Kish ete esie: ntre ke mmɔ enam kpukpru se edidem okowukde. Ndien ke ini oro ebede, Abasi okop mkpeubɔk emi ekpede enɔ idut oro.

¹⁵Ekem mme Philistine etɔŋɔ ntak eŋwana ekɔŋ ye Israel; ndien David ye ikɔt esie ŋko esuhɔre ekeŋwana ekɔŋ ye mme Philistine: ndien David akpa mba.

¹⁶Ndien Ishbi-benob emi okotode ke nditɔ Raphah, emi udop eduat esie edide shekel okpoho ikie ita, onyuŋ ɔbɔbɔde obufa ofut, ekere ndiwot David.

¹⁷Edi Abishai eyen Zeruiah anyaŋa enye, onyuŋ ɔtɔ Philistine oro owot. Ndien ikɔt David ewuk enye, ete Afo kuwɔrɔ aba utiene nnyin uka ekɔŋ, kunyuŋ unime utuenikaŋ Israel.

¹⁸Ekem ke ini oro ebede, mmɔ etɔŋɔ ntak eŋwana ekɔŋ ye mme Philistine ke Gob: ndien Sibbechai Hushathite owot Saph emi okotode ke nditɔ Raphah.

¹⁹Ndien mmɔ etɔŋɔ ntak eŋwana ekɔŋ ye mme Philistine ke Gob, ndien Elhanan eyen Jaare-oregim eyen Bethlehem kiet, owot Goliath a Gath, emi eto eduat esie ebietde eto ɔdɔk-ɔfɔŋ.

²⁰Ekɔŋ eŋwen onyuŋ ɔtɔŋɔ ntak odu ke Gath, ndien anyan owo odu do, emi nnuenubɔk esie ye nnuenukot esie edide itiokiet, itiokiet, ewɔrɔ edip ye inaŋ ke ibat; enye okonyuŋ amama ɔnɔ Raphah.

²¹Ndien adaŋemi enye esinde Israel ke ndek, Jonathan eyen Shimei eyen-eka David owot enye.

²²Mme mmɔ emi mbinaŋ ekemana enɔ Raphah ke Gath, ndien mmɔ eduɔŋɔ ke ubɔk David, ye ke ubɔk ikɔt esie.