Read efik 2 SAMUEL 22 Bible Online

2 SAMUEL 22 - efik bible

2 SAMUEL 22

¹EKEM David ada ikɔ ikwɔ etiŋ ɔnɔ Jehovah, ke usen oro Jehovah okosiode enye ke ubɔk kpukpru mme asua esie, ye ke ubɔk Saul;

²ndien enye ɔdɔhɔ ete, Jehovah edi akwa itiat mi, ye ufɔk ekɔŋ mi, ye andinɔ mi ubɔhɔ;

³Abasi akwa itiat mi; nyebuɔt idem mi ye enye: otu-ekɔŋ mi, ye nduk erinyaŋa mi, edikoŋ tower mi, ye ebiet ubɔhɔ mi, andiyaŋa mi; afo anyaŋa mi osio ke nnama.

⁴Nyeseme nnɔ enye emi etorode, kpa Jehovah: ndien eyenyaŋa mi esio mme asua mi ke ubɔk.

⁵Adaŋemi odut mkpa akande mi okuk, mme akpa mmɔŋ idiɔk ido enyuŋ esinde mi ndikhe.

⁶Mme idut udi ekande mi ekuk; mme afia mkpa enyuŋ esimde mi.

⁷Ke nnanenyin mi nyefiori ŋkot Jehovah, nnyuŋ nseme nnɔ Abasi mi: ndien enye etie ke temple esie okop uyo mi, mfiori mi onyuŋ oduk enye ke utɔŋ.

⁸Ndien isɔŋ aduai onyuŋ enyek; se enyɔŋ eberede ke esit onyuŋ otut onyuŋ aduai, koro enye ayatde esit.

⁹Nsuŋikaŋ oto enye ke ibuo ɔdɔk, ikaŋ onyuŋ ɔwɔrɔ enye ke inua asak: ebok ikaŋ obubere ke esit.

¹⁰Ndien enye onuk ikpa-enyɔŋ, ɔsuhɔre; ɔkpɔsɔŋ ekim onyuŋ odu enye ke idak ukot.

¹¹Enye onyuŋ odoro cherub, efe: enyuŋ ekut enye odoro ke mba ofum.

¹²Enye onyuŋ ada ekim onim nte tent akan idemesie okuk, ebok mmɔŋ, ye mbubit enyɔŋ.

¹³Ebok ikaŋ obubere ke uyama emi odude enye ke iso.

¹⁴Jehovah akatuak enyɔŋ, Ata Andikoŋ onyuŋ osiosro uyo.

¹⁵Enye onyuŋ otop idaŋ, asuan mmɔ; asiak obuma, otimere mmɔ.

¹⁶Ndien ekut afua mmɔŋ, se ererimbot eberede ke esit ayarare, ke nduari Jehovah, ke ibifik ofimede ke ibuo esie.

¹⁷Enye etie ke enyɔŋ ɔdɔŋ edida mi; odudi mi osio ke ediwak mmɔŋ

¹⁸Enye anyaŋa mi osio ke ubɔk mkpɔsɔŋ mme asua mi, ye eke mbon-utɔk mi: koro mmɔ esɔŋde ekan mi.

¹⁹Mmɔ ekebuat mi ke usen ukut mi: edi Jehovah eberi mi ubɔk.

²⁰Enye ada mi ɔwɔrɔ esin ke akamba ufaŋ: atara mi idem, koro amade mi.

²¹Jehovah ɔnɔ mi usiene, nte eti ido mi edide: ɔnɔ mi nte ubɔk asanade mi.

²²Koro ŋkpemede usuŋ Jehovah, mmenyuŋ ndiɔkke ŋkpɔŋ Abasi mi.

²³Koro kpukpru ikpe esie edude mi ke iso: ama onyuŋ edi mme ewuhɔ esie, ŋwahake ŋkpɔŋ mmɔ.

²⁴Ŋkonyuŋ mfɔn mma ye enye, nnyuŋ ŋkpeme idem mi, man ŋkunam oburobut ido mi.

²⁵Mmɔdo Jehovah osiode mi usiene esin ke nti ido mi: ye nte idem asanade mi ke iso esie.

²⁶Afo anam ke ima ye mbon-ima, onyuŋ ɔfɔn ama ye owo eke ɔfɔnde ama.

²⁷Afo onim idem fo ke edisana ye owo eke asanade; onyuŋ anam ŋkwaŋa-ŋkwaŋa ye mmɔ eke ekwaŋade.

²⁸Eyenyuŋ anyaŋa mbon-ukut: edi enyin fo ese mbon iseri: afo ɔsuhɔre mmɔ.

²⁹Koro afo edide utuenikaŋ mi, O Jehovah: Jehovah onyuŋ aŋwaŋade ekim mi.

³⁰Koro ndade fi mbumere udim owo: nda Abasi mi mfrɔ ŋkaŋa ibibene.

³¹Abasi! usuŋ esie ɔfɔn ama: ema edomo uyo Jehovah; enye edi otu - ekɔŋ kpukpru mmɔ eke ebuɔtde idem mmɔ ye enye.

³²Koro anie edi Abasi ke mibɔhɔke Jehovah? Anie onyuŋ edi akwa itiat ke mibɔhɔke Abasi nnyin?

³³Abasi edi ɔkpɔsɔŋ ebiet ubɔhɔ mi, onyuŋ ada owo eke ɔfɔnde ama, asaŋa ke usuŋ esie.

³⁴Enye anam ukot mi ebiet edop: onyuŋ odori mi ke edikoŋ ebiet mi.

³⁵Eteme ubɔk mi ndiŋwana ekɔŋ; ubɔk mi onyuŋ onuk utiga okpoho.

³⁶Afo onyuŋ ɔnɔ mi otu-ekɔŋ erinyaŋa fo; ibɔrɔ fo onyuŋ ofori mi.

³⁷Afo aŋwaŋa ikpat isaŋ mi ke idak mi; ndien itɔŋ ukot mi ikehekede.

³⁸Nyebine mme asua mi, nnyuŋ nsobo mmɔ; ndinyuŋ mfiakke edem tutu esobo mmɔ ema.

³⁹Nyenyuŋ nsobo mmɔ, nnyuŋ nyibi mmɔ, ndien mmɔ ididahake ke enyɔŋ: mmɔ enyuŋ eduɔŋɔ ema ke idak ikpat.

⁴⁰Afo onyuŋ ada odudu ekɔŋ ɔbɔbɔ mi ke idem: ɔsuhɔre mmɔ eke eyomde mi ikɔ onim mi ke ke idak.

⁴¹Afo omonyuŋ ada itɔŋ mme asua mi ɔnɔ mi, man nsobo mbon utɔk mi.

⁴²Mmɔ etiŋ enyin ese, edi owo eke anyaŋade iduhe; ese Jehovah, edi enye ibɔrɔke mmɔ.

⁴³Ndien nnuak mmɔ emem nte ntan isɔŋ: ntim mmɔ nte mbat efak, nnyuŋ ndigi mmɔ.

⁴⁴Afo onyuŋ osio mi ke ubɔk mbio-obio mi, ekpeme mi, ete, ndi etubom mme idut; mbon emi mmemfiɔkke eyedi ikɔt mi.

⁴⁵Nditɔ isen owo eyenem inua enɔ mi: adaŋemi mmɔ ekopde ke utɔŋ, mmɔ eyenam uyo mi.

⁴⁶Nditɔ isen owo eyeyemere, enyuŋ edikhe ke ebiet udibe mmɔ.

⁴⁷Jehovah odudu uwem; yak enyuŋ ekɔm akwa itiat mi; enyuŋ etoro Abasi itiat erinyaŋa mi.

⁴⁸Edi Abasi mi osio usiene ɔnɔ mi, onyuŋ ɔsuhɔre mme idut onim mi ke idak;

⁴⁹Onyuŋ osio mi ke ubɔk mme asua mi: onyuŋ ofori mi akan mmɔ emi edahade ke enyɔŋ eyom mi ikɔ; afo anyaŋa mi osio mbon afai ke ubɔk.

⁵⁰Mmɔdo ndikwɔde fi ke otu mme idut, O Jehovah, nyenyuŋ ŋkwɔ ikwɔ nnɔ enyiŋ fo.

⁵¹Ɔkpɔsɔŋ ufɔk erinyaŋa edidem esie, emi ɔfɔnde mfɔn ye owo esie emi eyerede aran, kpa David ye ubon esie ke nsinsi-nsinsi.