Read efik 2 SAMUEL 23 Bible Online

2 SAMUEL 23 - efik bible

2 SAMUEL 23

¹NDIEN mme mmɔ emi edi akpatre ikɔ David: ete, David eyen Jesse ɔdɔhɔ, owo emi okoforode ke enyɔŋ ɔdɔhɔ, emi Abasi Jacob ekeyetde aran, andikwɔ inem ikwɔ Israel ɔdɔhɔ, ete,

²Spirit Jehovah ada mi etiŋ ikɔ, uyo esie onyuŋ odu mi ke edeme.

³Abasi Israel ɔdɔhɔ, Akwa Itiat Israel etiŋ ɔnɔ mi, ete, Edinen andikara owo eyedu, ada uteŋe Abasi akara;

⁴Ndien enye eyebiet uŋwana usenubɔk, ke utin asiahade, eke uyama miyakke mbubit enyɔŋ odu: nte edim esinde mbiet afiari ke isɔŋ.

⁵Koro nte ufɔk mi itiehe ntem ye Abasi? Koro enye amanam nsinsi ediomi ye ami, emi ediɔŋde ke kpukpru ŋkpɔ, enyuŋ enimde: koro nte enye idinamke ofuri erinyaŋa mi ye ima esit mi etibe?

⁶Ama edi mme oburobut owo, mmɔ eyebiet mbarekpe eke emende etop eduɔk; koro mikemeke ndimum mmɔ ke ubɔk:

⁷Edi owo eke oyomde ndituk mmɔ ada ukwak ye eto eduat esin ke ubɔk; ndien mmɔ eyeta ikaŋ ke ɔtɔ mmɔ.

⁸Mmemmɔ emi edi enyiŋ mbon-uko oro David ekenyenede: Josheb-basshebeth, Tahchemonite, ɔbɔŋ mme etubom; enye (ekere) Adino Eznite, abaŋa owo ikie itiata emi eduɔŋde afai ini kiet.

⁹Ndien Eleazar, eyen Dodai eyen Ahohi adiana enye, enye okodu ke otu mbon-uko ita ye David, ke ini mmɔ esahide mme Philistine oro ebonode ke itie-ekɔŋ, ndien nditɔ Israel edɔk edi:

¹⁰enye adaha ke enyɔŋ owot mme Philistine, tutu ubɔk emem enye, ubɔk onyuŋ adiana enye ke ofut: ndien Jehovah anam akamba erinyaŋa ke usen oro; ndien kpukpru owo efiak etiene enye, eka ekebume mbume ikpɔŋ-ikpɔŋ.

¹¹Ndien Shammah eyen Agee Hararite edi udiana esie. Ndien mme Philistine ebono ke udim, eke iŋwaŋ emi ɔkɔti ɔyɔhɔde odude do. Ndien kpukpru mmɔ efeŋe ke iso mme Philistine.

¹²Edi enye adaha ada ke ufɔt iŋwaŋ oro, osio mmɔ efep ke esit, onyuŋ owot mme Philistine: Jehovah onyuŋ anam akamba erinyaŋa.

¹³Ndien ita ke otu ata ikpɔ owo edip ye duop oro esuhɔre ke ini ukpeŋe ekesim David ke aba Adullam: ndien udim mme Philistine ena ke itihere Rephaim.

¹⁴Ndien David odu ke ɔkpɔsɔŋ ebiet ke ini oro; udim-ekɔŋ mme Philistine onyuŋ odu ke Bethlehem ini oro.

¹⁵Ndien itɔŋ asat David, enye onyuŋ ɔdɔhɔ ŋko, ete, Owo akpakam ada mmɔŋ ke obube Bethlehem, emi odude ke mben inua-otop, ɔsɔk mi ŋŋwɔŋ!

¹⁶Ndien mbon-uko ita oro ebumere esiak nna-ekɔŋ mme Philistine, ebe, ekekoi mmɔŋ ke obube Bethlehem emi odude ke mben inuatop, eda esɔk David: edi enye inyimeke ndiŋwɔŋ ke esit, edi aŋwaŋa enye ɔnɔ Jehovah.

¹⁷Enye onyuŋ ɔdɔhɔ, ete, Nsa mi, O Jehovah, nnamke ntem. Ke edi iyip owo eke edade uwem mmɔ eka. Ntre ke enye inyimeke ndiŋwɔŋ. Ntem ke mbon-uko ita oro ekenam.

¹⁸Ndien Abishai, eyen-eka Joab, eyen Zeruaih edi etubom ita oro. Ndien enye ekemenere eduat esie aŋwana ye owo ikie ita, owot, onyuŋ ɔwɔrɔ etop ke otu mbita oro.

¹⁹Nte enye ikenyeneke ukpono ikan mbita? Enye onyuŋ edi etubom mmɔ; edi ikemke ye akpa mbita oro.

²⁰Ndien Benaiah eyen Jehoiada, eyen owo uko kiet, emi okotode ke Kabzeel, emi akanamde ediwak ŋkpɔ ndyɔ, enye owot owo Moab iba emi ebietde lion: onyuŋ ɔsuhɔre okowot lion kiet ke esit obube ke ini snow:

²¹enye onyuŋ owot eyen Egypt kiet, emi edide ediye owo: eduat onyuŋ odu eyen Egypt ke ubɔk; edi enye ada eto ɔsuhɔre etiene enye, akafabare eyen Egypt eduat ke ubɔk, ada eduat esie oro owot enye.

²²Benaiah eyen Jehoiada anam ŋkpɔ oro, ndien enye enyene enyiŋ ke otu mbon-uko mbita oro.

²³Enye ekenyene ukpono akan mbedip ye duop oro, edi ikemke ye mbita oro. Ndien David onim enye ke etubom mbet esiemɔ.

²⁴Asahel eyen-eka Joab edi kiet ke otu mbedip ye duɔp oro; Elhana eyen Dodo a Beth-lehem,

²⁵Shammah Harodite, Elika Harodite;

²⁶Helez Paltite, Ira eyen Ikkesh Tekoite;

²⁷Abiezer Anathothite, Mebunnai Hushathite;

²⁸Zalmon Ahohite, Maharai Netophathite; Heleb eyen Baanah,

²⁹Netophathite kiet, Ittai eyen Ribai emi okotode ke Gibeah nditɔ Benjamin;

³⁰Benaiah Pirathonite, Hiddai emi okotode ke mme itihere Gaash;

³¹Abi-albon Arbathite,

³²Azmaveth Barhumite; Eliahba Shaalbonite, nditɔ Jashen, Jonathan;

³³Shammah Hararite, Ahiam eyen Sharar Ararite;

³⁴Eliphelet eyen Ahasbai, eyen Maacathite, Eliam eyen Ahithophel Gilonite;

³⁵Hezro Carmelite, Paarai Arbite;

³⁶Igal eyen Nathan a Zobah, Bani Gadite;

³⁷Zelek Ammonite, Naharai Beerothite, emi akamade ŋkpɔ-ekɔŋ Joab eyen Zeruiah;

³⁸Ira Ithrite kiet, Gareb Ithrite kiet;

³⁹Uriah Hittite: kpukpru mmɔ ewɔrɔ edip ye efureba.