Read efik 2 SAMUEL 24 Bible Online

2 SAMUEL 24 - efik bible

2 SAMUEL 24

¹EKEM Jehovah ɔtɔŋɔ ntak ayat esit ye Israel, ndien enye edemere David ɔnɔ mmɔ ete, Ka kabat Israel ye Judah.

²Ndien edidem ɔdɔhɔ Joab etubom mbon-ekɔŋ, emi odude ye enye, ete, Mbɔk, saŋa ke kpukpru esien Israel, ɔtɔŋɔde ke Dan tutu osim ke Beer-sheba; mbufo enyuŋ ebat kpukpru owo, man mfiɔk ibat mbio-obio

³Ndien Joab ɔdɔhɔ edidem, ete, Mbio-obio edi se ededi, yak Jehovah Abasi fo akam ada efen ɔkɔrɔ utim ikoduop, yak enyin ɔbɔŋ mi edidem enyuŋ ekut: edi ɔbɔŋ mi edidem anam didie ama ŋkpɔ emi?

⁴Edi uyo edidem ɔsɔŋ akan eke Joab, ye eke mme etubom mbon-ekɔŋ. Ndien Joab ye mme etubom mbon-ekɔŋ eto ke iso edidem ndika ŋkabat mbio Israel.

⁵Ndien mmɔ ebe Jordan, eka ekenam nna ke Aroer, ke edem obio nnasia emi anade ke ufɔt itihere isɔŋ Gad, ese Jazer:

⁶ndien mmɔ ekesim ke Gilead, ye ke isɔŋ Tahtim-hodshi; ndien mmɔ eka ke Dan-jaan: ndien mmɔ ewɔŋɔre ekesim ke Zidon.

⁷Ndien mmɔ esim ɔkpɔsɔŋ ebiet Tyre, ye kpukpru obio mme Hivite, ye eke mme Canaanite; ndien mmɔ ewɔŋɔ ke edem usuk-usuk Judah, ke Beersheba.

⁸Ntre ke mmɔ ekesaŋa ke ofuri isɔŋ; ndien ekem ke utit ɔfiɔŋ usukkiet ye usen edip mmɔ esim ke Jerusalem.

⁹Ndien Joab ada ibat owo oro mmɔ ekebatde esɔk edidem: ndien Israel edi tɔsin mbon-uko emi esiɔŋode ofut ke itie ikie itiaita; iren-owo Judah enyuŋ edi tɔsin ke itie ikie ition.

¹⁰Ekem esit ɔtɔ David, ke enye ama akabat mbio-obio ntre. David onyuŋ ɔdɔhɔ Jehovah, ete, Mmanam idiɔk eti-eti ke se ŋkanamde: edi, mbɔk Jehovah, kam dahado ke idiɔk ido owo fo; koro mmanam ndisime ido eti-eti.

¹¹Ndien ke adaŋemi David abakde ke usenubɔk edemere, uyo Jehovah osim prophet Gad, okut-ŋkukut David, ete,

¹²Ka kɔdɔhɔ David, ete, Ntem ke Jehovah ɔdɔhɔ ete, Mmanyan ŋkpɔ ita nnɔ fi: mek kiet ke otu mmɔ ke idem fo, man nnam fi.

¹³Ntre ke Gad aka ke ebiet David eketiŋ ɔnɔ enye, onyuŋ ɔdɔhɔ enye, ete, Nte isua akaŋ itiaba eyetiene fi ke isɔŋ fo? Mme afo eyefehe itɔk ke ofuri ɔfiɔŋ ita ke iso mme asua fo, ke mmɔ ebinede fi? Mme idiɔk udɔŋɔ usen ita odu ke isɔŋ fo? Fiɔk ndien, nyuŋ kere ikɔ eke ndidade ntiŋ nnɔ Andidɔŋ mi.

¹⁴Ndien David ɔdɔhɔ Gad, ete, Mmetie ke akwa nnanenyin: yak nnyin ikam iduɔ isine Jehovah ke ubɔk: koro enye okponde mbɔm: yak mi ŋkuduɔ nsine ke ubɔk owo.

¹⁵Ndien Jehovah anam idiɔk udɔŋɔ etiene Israel, ɔtɔŋɔde ke usenubɔk oro tutu osim ini enye okodoride: ndien tɔsin owo ata ye duop ekpaŋa ke otu mmɔ, ɔtɔŋɔde ke Dan tutu osim Beersheba.

¹⁶Ndien adaŋemi angel oro anyande ubɔk esie ese Jerusalem, ete isobo enye, mbɔm idiɔk-ŋkpɔ oro anam Jehovah, enye onyuŋ ɔdɔhɔ angel oro, ete, Ekem, ndien: fep ubɔk fo. Ndien angel Jehovah ada ke ɔtɔ ubek ibokpot Araunah Jebusite.

¹⁷Ndien David ɔdɔhɔ Jehovah, ke ini enye okutde angel oro owotde mbio-mbio, ete, Sese, ami ŋkedue, ŋkonyuŋ nnam se ikwaŋade: edi ŋkpri ufene emi ekenam nso? Mbɔk, yak ubɔk fo odoro mi, ye ufɔk ete mi.

¹⁸Ndien Gad aka ke ɔtɔ David ke usen oro, ɔkɔdɔhɔ enye, ete, Dɔk kanam itie-uwa nɔ Jehovah ke ɔtɔ ubek ibokpot Araunah Jebusite.

¹⁹Ndien David ɔdɔk ke uyo Gad, kpa nte Jehovah eketemede.

²⁰Ndien Araunah emenere enyin, okut edidem ye ikɔt esie ke edi etiene enye: ndien Araunah ɔwɔrɔ okowuk ubɔk ɔnɔ edidem,otuk iso esie ke isɔŋ.

²¹Ndien Araunah ɔdɔhɔ ete, Nsinam ɔbɔŋ mi edidem edide ke ebiet owo esie? Ndien David ɔdɔhɔ, ete, Ndi ndidep ɔtɔ ubek ibokpot ye afo, man nnam itie-uwa nnɔ Jehovah, man ufen emi okure ke otu mbio-obio.

²²Ndien Araunah ɔdɔhɔ David, ete, Yak ɔbɔŋ mi edidem ada enye, onyuŋ awa se enye amade: sese, enaŋ ke edifɔp uwa, ye ŋkpɔ ubek ibokpot ye ŋkpɔ ufene ke ifia.

²³“O edidem, Araunah ke emen kpukpru ŋkpɔ emi ɔnɔ edidem;” Araunah onyuŋ ɔdɔhɔ edidem, ete, Yak Jehovah Abasi fo ama fi.

²⁴Ndien edidem ɔdɔhɔ Araunah, ete, Ih ih; edi nyebɔ fi ke ekɔm-urua; ndinyuŋ mfɔpke edifɔp uwa nnɔ Jehovah Abasi mi ke se mikpaha mi baba okuk kiet. Ndien David edep ɔtɔ ubek ibokpot oro, ye mme enaŋ ke shekel silver aba ye duop.

²⁵Ndien David anam itie-uwa ɔnɔ Jehovah do, onyuŋ awa edifɔp uwa ye uwa emem. Ndien Jehovah okop mkpe-ubɔk eke ekpede enɔ obio, onyuŋ osibe idiɔk udɔŋɔ oro ke Israel efep.