Read efik 2 SAMUEL 8 Bible Online

2 SAMUEL 8 - efik bible

2 SAMUEL 8

¹EDIKEM ŋkpɔ emi ema ekebe, ndien David asuan mme Philistine, onyuŋ anam mmɔ ekɔŋɔ mfaŋ: David onyuŋ osio mme Philistine Metheg-ammah ke ubɔk.

²Enye onyuŋ asuan Moab, onyuŋ ada uruk odomo mmɔ, anam mmɔ ena ke isɔŋ; enye onyuŋ odomo ubak iba eke ediwotde, ye ata akamba ubak eke edinimde ke uwem. Ntre ke nditɔ Moab ekabare edi ifin David, enyuŋ etomo utomo.

³David onyuŋ asuan Hadadezer eyen Rehob, edidem Zobah, ke ini enye akade nditɔŋɔ ntak nnim ubɔŋ esie ke edem Akpa (Euphrates).

⁴David onyuŋ ɔbɔ enye tɔsin mbon horse ye ikie itiaba, ye tɔsin mbon-ekɔŋ edip eke esaŋade ke ikpat: David onyuŋ okpok kpukpru mme horse chariot akpan osip, onyuŋ osio horse ikie ke otu mmɔ onim.

⁵Ndien adaŋemi Syria Damascus edide ndiŋwam Hadadezer edidem Zobah, David owot tɔsin owo Syria edip ye iba.

⁶David onyuŋ onim mbon-ekɔŋ ke itie, ke itie, ke Syria Damascus: nditɔ Syria enyuŋ ekabare edi ifin David, enyuŋ etomo utomo. Jehovah onyuŋ anyaŋa David ke kpukpru ebiet emi enye akade.

⁷Ndien David ada mme otu-ekɔŋ o gold oro ikɔt Hadadezer ekamade, onyuŋ emen mmɔ edi ke Jerusalem.

⁸David edidem onyuŋ ataŋ ata ediwak okpoho efep ke Betah ye Berothai, mme obio Hadadezer.

⁹Ekem Toi edidem Hamath okop, ete ke David ama akan ofuri udim - ekɔŋ Hadadezer.

¹⁰Ndien Toi ɔdɔŋ Joram eyen esie utom ke ɔtɔ edidem David ete ɔkɔm enye, onyuŋ otoro enye: koro enye akaŋwanade ekɔŋ ye Hadadezer, okonyuŋ asuande enye: koro Hadadezer akam aŋwanade ekɔŋ ye Toi. Ŋkpɔ silver, ye ŋkpɔ gold, ye ŋkpɔ okpoho enyuŋ edu enye (Joram) ke ubɔk:

¹¹ndien David edidem onyuŋ ada mmɔ onim ɔnɔ Jehovah, ɔkɔrɔ ye silver, ye gold oro enye ɔkɔbɔde kpukpru mme idut emi enye akakande, onim (ɔnɔ Jehovah); eke Syria,

¹²ye eke Moab, ye eke nditɔ Ammon, ye eke mme Philistine ye eke Amalek, ye mbume Hadadezer, eyen Rehob, edidem Zobah.

¹³Ndien David ɔwɔrɔ etop ke adaŋemi enye ama oto ndiwot Aram tɔsin owo efureta ke itihere inuŋ afiak edi.

¹⁴Enye onyuŋ onim mbon-ekɔŋ ke itie, ke itie, ke Edom; ke ofuri Edom ke enye onim mbon-ekɔŋ ke itie, ofuri Edom enyuŋ ekabare edi ifin David. Jehovah onyuŋ anyaŋa David ke kpukpru ebiet emi enye akade.

¹⁵Ntre ke David edi edidem ofuri Israel; David onyuŋ ekpe edinen ikpe ɔnɔ kpukpru ikɔt esie.

¹⁶Joab eyen Zeruiah onyuŋ edi etubom mbon-ekɔŋ; Jehoshaphat eyen Ahilud onyuŋ edi andiwet ŋwed obio;

¹⁷Zadok eyen Ahitub, ye Ahimelek eyen Abiathar, enyuŋ edi mme oku; Seraiah onyuŋ edi andiwet ŋwed:

¹⁸Benaiah eyen Jehoiada onyuŋ edi etubom mme Cherethite ye eke mme Pelethite; nditɔ-iren David enyuŋ edi mbɔŋ.