Read efik 2 SAMUEL 9 Bible Online

2 SAMUEL 9 - efik bible

2 SAMUEL 9

¹EKEM David ɔdɔhɔ ete, Nte owo ke odudu kaŋa osuk ke ufɔk Saul, man mfɔn ido ye enye mbaŋa Jonathan?

²Ndien ufɔk Saul enyene owo kiet ekere Ziba. Ndien adaŋemi ekotde enye enɔ David, edidem obup enye, ete, Ndi afo edi Ziba? Ndien enye ɔbɔrɔ ete, Owo fo edi enye.

³Ndien edidem obup ete, Nte eyen ufɔk Saul iduhe aba, man mfɔn mfɔn-ido Abasi ye enye? Ndien Ziba ɔdɔhɔ edidem, ete, Eyen Jonathan kiet ke odudu kaŋa emi ukot ɔbuŋɔde enye.

⁴Ndien edidem obup enye, ete, Enye odu mmɔŋ? Ndien Ziba ɔbɔrɔ edidem, ete, Sese, enye mmɔ ke ufɔk Machir, eyen Ammiel, ke Lodebar.

⁵Ndien edidem David ɔdɔŋ ekeda enye ke ufɔk Machir, eyen Ammiel, ke Lodebar edi.

⁶Ekem adaŋemi Mephibosheth, eyen Jonathan, eyen Saul, osimde David, emye ɔduɔ ke isɔŋ okubi iso esie, onyuŋ atuak ibuot. Ndien David ɔdɔhɔ ete, Mephibosheth. Ndien enye eyere ete, Se owo fo.

⁷Ndien David ɔdɔhɔ enye, ete, Kufehe ndik; koro ndinamde mfɔn-ido ye afo mbaŋa Jonathan usɔ, nyenyuŋ nyak kpukpru iŋwaŋ Saul usɔ nnɔ fi; afo eyenyuŋ adia ŋkpɔ ke okpokoro mi kpukpru ini.

⁸Ndien enye atuak ibuot, onyuŋ ɔdɔhɔ, ete, Owo fo edi nso, eke esinde fi akabare ese oruk okpo ebua nte ami?

⁹Ndien edidem okot Ziba, owo Saul, edi, onyuŋ ɔdɔhɔ enye, ete, Mmada kpukpru se ikenyenede Saul ye ofuri ufɔk esie nnɔ eyen usɔ.

¹⁰Afo, ye nditɔ fo, ye ikɔt fo, enyuŋ ediɔŋ isɔŋ enɔ enye, enyuŋ eda esɔk enye, man eyen usɔ enyene udia eke adiade; Mephihosheth eyen usɔ eyenyuŋ adia ŋkpɔ ke okpokoro mi kpukpru ini. Ndien Ziba enyene nditɔ-iren efut ye owo edip.

¹¹Ndien Ziba ɔbɔrɔ edidem, ete, Owo fo eyenam kpukpru se ɔbɔŋ mi edidem etemede owo esie. “Ndien Mephibosheth eyedia ŋkpɔ ke okpokoro mi, nte eyen edidem kiet.”

¹²Mephibosheth onyuŋ enyene ekpri eyen-eren kiet ekere Mica. Kpukpru mme andiduŋ ufɔk Ziba enyuŋ edi ikɔt Mephibosheth.

¹³Ntre ke Mephibosheth oduŋ ke Jerusalem: koro enye adiade ŋkpɔ ke okpokoro edidem kpukpru ini; enye onyuŋ edi mbuŋɔ ke ukot mbiba.