Read efik 1 NDIDEM 11 Bible Online

1 NDIDEM 11 - efik bible

1 NDIDEM 11

¹NDIEN edidem Solomon ama ediwak isen iban, ɔkɔrɔ ke eyen Pharaoh aŋwan, kpa iban Moab, ye eke Ammon, ye eke Edom, ye eke Zidon, ye eke Heth;

²eke eketode ke mme idut emi Jehovah ɔkɔdɔhɔde nditɔ Israel, ete, Mbufo ekutiene mmɔ, ekunyuŋ eyak mmɔ etiene mbufo ŋko: mmɔ iditreke ndikabare mbufo esit etiene mme abasi mmɔ: Solomon eyire ye mmɔ oro ke ima.

³Ndien enye enyene iban eke edide nditɔ mbɔŋ ikie itiaba, ye iban esa ikie ita: ndien iban esie eyut enye esit.

⁴Edikem ke ini usɔŋ Solomon, iban esie eyut enye esit, esin enye akabare etiene abasi efen; ndien ofuri esit esie isaŋake ye Jehovah Abasi esie, nte esit David ete esie.

⁵Edi Solomon aka eketiene Ashtoreth idem mme Zidonian, ye Milcom mbubiam-ŋkpɔ mme Ammonite.

⁶Ntre ke Solomon anam idiɔk ke iso Jehovah, inyuŋ itimke itiene Jehovah, nte David ete esie.

⁷Ndien Solomon anam edikoŋ ebiet ɔnɔ Chemosh, mbubiam-ŋkpɔ Moab, onyuŋ anam ɔnɔ Molech, mbubian-ŋkpɔ nditɔ Ammon, ke akamba obot emi asakde iso ese Jerusalem.

⁸Ntem ke enye anam ɔnɔ kpukpru isen iban esie, emi efɔpde incense, enyuŋ ewade uwa enɔ mme abasi mmɔ.

⁹Ndien Jehovah ayat esit ye Solomon, koro esit esie akabarede ɔkpɔŋ Jehovah Abasi Israel, emi okowutde enye idem utim ikaba;

¹⁰okonyuŋ owukde enye abaŋa ŋkpɔ emi, ete enye okutiene abasi efen; edi enye inimke se Jehovah okowukde.

¹¹Ndien Jehovah ɔdɔhɔ Solomon, ete, Koro edide ntem ye afo, mukonyuŋ unimke ediomi mi, ye mme ewuhɔ mi, emi ŋkowukde fi, nditreke ndiwai fi ubɔŋ ke ubɔk mbɔ, nnyuŋ nda enye nnɔ owo fo.

¹²Edi ndinamke ntem ke eyo fo, mbaŋa David usɔ: nyewai enye ke ubɔk eyen fo nsio. Edi ndiwahi ofuri ubɔŋ mbɔ;

¹³nyenɔ eyen fo esien kiet mbaŋa David owo mi, nnyuŋ mbaŋa Jerusalem emi ŋkemekde.

¹⁴Ndien Jehovah edemere usua ɔnɔ Solomon, kpa Hadad eyen Edom: emi otode ke ubon edidem ke Edom.

¹⁵Edikem adaŋemi David okodude ke Edom, ke Joab, etubom mbon-ekɔŋ, ama ɔkɔdɔk aka ndibuk mme akpa-mkpa, ke ini enye ama okowot kpukpru iren-owo ke Edom;

¹⁶(koro Joab ye ofuri Israel ekedaŋde do ke ɔfiɔŋ itiokiet, tutu enye okpok kpukpru iren-owo Edom efep:)

¹⁷ndien Hadad efehe, kpa enye, ye ndusuk nditɔ Edom ŋko emi edide ikɔt ete esie, aka ke Egypt; Hadad onyuŋ edi ata eyenɔwɔŋ.

¹⁸Ndien mmɔ eto ke Midian eka ke Paran; ndien eda owo ke Paran eke esaŋade ye mmɔ, eka ke Egypt ke ɔtɔ Pharaoh edidem Egypt; ndien enye (Pharaoh) ɔnɔ enye ufɔk, onyuŋ onim udia ɔnɔ enye, onyuŋ ɔnɔ enye iŋwaŋ.

¹⁹Ndien Pharaoh ɔfɔn ido ye Hadad eti eti, onyuŋ emen eyen-eka ŋwan esiemɔ, eyen-eka Tahpenes ɔbɔŋ-aŋwan, ɔnɔ enye ɔdɔ.

²⁰Ekem eyen-eka Tahpenes aman Genubath eyen esie eren ɔnɔ enye, ndien Tahpenes anam enye adaha ke eba ke ufɔk Pharaoh: ntre ke Genubath odu ke ufɔk Pharaoh ke otu nditɔ Pharaoh.

²¹Ekem adaŋemi Hadad etiede ke Egypt okop ete ke David edede idap ye mme ete esie, ke Joab etubom mbon-ekɔŋ ama onyuŋ akpa, Hadad ɔdɔhɔ Pharaoh, ete, Yak mi nnyɔŋ ke edem nnyin.

²²Ndien Pharaoh obup enye, ete, Nso ŋkpɔ anana fi ke ubɔk mi? Ndien, sese, afo ke oyom unyɔŋ ke edem mbufo! Ndien enye ete, Baba ŋkpɔ kiet: edi kutre ndiyak mi.

²³Abasi onyuŋ edemere usua ɔnɔ enye ŋko, kpa Rezon eyen Eliada, emi ekefehede ɔkpɔŋ Hadadezer edidem Zobah, ɔbɔŋ esie:

²⁴ndien enye ɔkɔ owo adian idem, onyuŋ akabare edi etubom udim owo, adaŋemi David owotde mmɔ: ndien mmɔ eka ke Damascus ekeduŋ ke esit, enyuŋ eda ubɔŋ ke Damascus.

²⁵Ndien enye edi asua Israel ke ofuri eyo Solomon, adian ye idiɔk-ŋkpɔ oro Hadad akanamde: ndien enye asua Israel, onyuŋ ada ubɔŋ ke Syria.

²⁶Ekem Jeroboam eyen Nebat, eyen Ephraim emi okotode ke Zeredah, emi eka esie ekerede Zeruah, ŋwan kiet emi ebe esie akakpade, edi owo Solomon, ndien enye emenere ubɔk aŋwana ye edidem.

²⁷Ndien emi edi ntak emi enye ekemenerede ubɔk esie aŋwana ye edidem; Solomon ɔkɔbɔp Millo, onyuŋ ɔdiɔŋ ŋwure obio David ete esie:

²⁸owo oro Jeroboam onyuŋ edi ɔkpɔsɔŋ owo uko; ndien adaŋemi Solomon okutde nte akparawa oro anamde utom, enye onim enye ke etubom mbon-utom ufɔk Joseph.

²⁹Edikem ke ini oro, Jeroboam ɔwɔrɔ ke Jerusalem, ndien prophet Ahijah a Shiloh okut enye ke usuŋ; enye onyuŋ esine obufa ɔfɔŋ-idem; ndien mmɔ mbiba edu ikpɔŋ ke itie:

³⁰ndien Ahijah omum obufa ɔfɔŋ-idem emi enye esinede, awai ke mbak duopeba: onyuŋ ɔdɔhɔ Jeroboam, ete,

³¹Bɔ mbak duop ke idemfo: koro ntem ke Jehovah Abasi Israel ɔdɔhɔ ete, Sese, ami mmɔŋ ŋwai idut emi ke ubɔk Solomon mfep, nyenyuŋ nnɔ fi esien duop:

³²(edi enye eyeda esien kiet abaŋa owo mi David, ye Jerusalem, obio emi ŋkemekde ke kpukpru esien Israel:)

³³koro mmɔ emekpɔŋ mi, emenyuŋ etuak ibuot enɔ Astoreth idem Zidon, ye Chemosh idem Moab, ye Milcom idem nditɔ Ammon; inyuŋ isaŋake ke usuŋ mi, inyuŋ inamke se inende ke enyin mi, inyuŋ inimke mme ewuhɔ mi, ye mbet mi, nte David ete esie.

³⁴Edi ndibɔhɔ enye kpukpru ubɔŋ ke ubɔk: edi nyenim enye ke ɔbɔŋ ke ofuri eyo uwem esie, mbaŋa David owo mi emi ŋkemekde: koro enye okonimde mbet mi ye mme ewuhɔ mi:

³⁵edi nyebɔ eyen esie ubɔŋ ke ubɔk, nnyuŋ nda enye nnɔ fi, kpa esien duop.

³⁶Edi nyeda esien kiet nnɔ eyen esie, kpaŋ David owo mi ekpenyene utuenikaŋ kpukpru ini ke iso mi ke Jerusalem, obio emi ŋkemekde ke idem mi, ndinim enyiŋ mi do.

³⁷Ndien ami nyeda fi, afo eyenyuŋ akara kpukpru se ukpɔŋ fo oyomde, onyuŋ edi edidem Israel.

³⁸Ndien ama ekem edieke afo edikopde kpukpru se ami ntemede fi, edinyuŋ asaŋade ke usuŋ mi, onyuŋ anam se inende ke iso mi, onyuŋ onim mme ewuhɔ mi ye mbet mi, kpa nte David owo mi akanamde; nyedu ye afo, ndien, nnyuŋ mbɔp ɔkpɔsɔŋ ufɔk nnɔ fi.

³⁹Ndien nyetuhɔ ubon David mbaŋa ŋkpɔ emi, edi ndituhɔke kpukpru ini.

⁴⁰Ekem Solomon oyom Jeroboam ndiwot. Edi Jeroboam adaha ke enyɔŋ, efehe aka Egypt, etiene Shishak edidem Egypt, onyuŋ odu ke Egypt tutu Solomon akpa.

⁴¹Ndien ŋkpɔ Solomon eŋwen, ye kpukpru se enye akanamde, ye ifiɔk esie, nte ikewetke mmɔ ke ŋwed ŋkpɔ Solomon?

⁴²Ndien mme usen emi Solomon akadade ubɔŋ ofuri Israel ke Jerusalem edi isua aba.

⁴³Ekem Solomon ɔsuhɔre ana ye mme ete esie ede, onyuŋ ɔbuhɔ ke obio David ete esie: ndien Rehoboam eyen esie ada ubɔŋ ke itie esie.