Read efik 1 NDIDEM 13 Bible Online

1 NDIDEM 13 - efik bible

1 NDIDEM 13

¹EKEM, sese, owo Abasi kiet okoto ke Judah ke uyo Jehovah, aka ke Bethel, ndien Jeroboam ke ada ke iso itie-uwa oro ɔfɔp incense.

²Ndien enye ada uyo Jehovah ofiori okot itie-uwa oro, ete, O itie-uwa! ntem ke Jehovah ɔdɔhɔ ete; Sese, eyen kiet, ekere Josiah, eyemana ɔnɔ ufɔk David; ndien enye eyeda mme oku edikoŋ ebiet eke efɔpde incense ke esit, awa fi ke enyɔŋ; ndien mme ɔkpɔ owo eyefɔbɔ fi ke enyɔŋ.

³Ndien enye asiak utibe-ŋkpɔ ke usen oro, ete, Emi edi utibe-ŋkpɔ emi Jehovah ɔkɔdɔhɔde ete, Sese, itie-uwa emi eyesiaha, ntɔŋ emi odude ke esit eyenyuŋ ɔduɔhɔ.

⁴Edikem adaŋemi edidem okopde uyo owo Abasi oro okofioride okot itie-uwa ke Bethel, Jeroboam ada ke ŋkaŋ itie-uwa anyan ubɔk esie, ete, Mbufo emum enye. Ndien ubɔk esie emi enye anyande otuk enye eken, akpa, enye inyuŋ ikwe aba nte adade ubɔk adian ke idemesie.

⁵Itie-uwa oro onyuŋ asiaha, ntɔŋ onyuŋ oto ke itie-uwa ɔduɔŋɔ ke isɔŋ, ekem ye utibe-ŋkpɔ oro owo Abasi oro akasiakde ke uyo Jehovah.

⁶Ndien edidem ɔbɔrɔ owo Abasi oro, ete, Mbɔk, beŋe Jehovah Abasi fo, nyuŋ kpe enye ubɔk nɔ mi, ete Enye ayak ubɔk mi afiak mi ke idem. Ndien owo Abasi oro ebeŋe Jehovah, ndien ubɔk edidem afiak adiana enye ke idem, onyuŋ akabare etie nte akpa.

⁷Ndien edidem ɔdɔhɔ owo Abasi oro, ete, Tiene mi di ke ufɔk, sɔŋ idem, nyenɔ fi enɔ.

⁸Edi owo Abasi oro ɔbɔrɔ edidem, ete, Afo ɔkpɔnɔnɔ mi ubak ufɔk fo, ndikaha ye afo, ndinyuŋ ndiaha ŋkpɔ, nnyuŋ ŋŋwɔŋke mmɔŋ ke ebiet emi:

⁹koro ntem ke ekewuk mi ke uyo Jehovah, ete, Kudia ŋkpɔ, kunyuŋ uŋwɔŋ mmɔŋ, kunyuŋ ufiak ke usuŋ emi afo asaŋade aka.

¹⁰Ekem enye ɔnyɔŋ ke usuŋ efen, inyuŋ ifiakke ke usuŋ oro enye akasaŋade ke esit edi ke Bethel.

¹¹Ndien akani prophet kiet oduŋ ke Bethel; eyen esie kiet onyuŋ emen kpukpru ŋkpɔ emi owo Abasi oro akanamde ke usen oro ke Bethel, edibuk ɔnɔ enye: mmɔ enyuŋ emen ikɔ oro enye ɔkɔdɔhɔde edidem etiŋ enɔ ete mmɔ.

¹²Ndien ete mmɔ obup mmɔ, ete, Enye aka usuŋ ewe? Nditɔ esio ema enyuŋ ekut usuŋ emi owo Abasi oro okotode ke Judah, akasaŋade ɔnyɔŋ.

¹³Ndien enye ɔdɔhɔ nditɔ esie, ete, Mbufo ediɔŋ ass mi enɔ mi; ndien mmɔ ediɔŋ ass esie enɔ enye, enye onyuŋ odoro ke esit.

¹⁴Ndien enye ebine owo Abasi oro, onyuŋ osim enye, nte enye etiede ke idak ofriyo kiet: ndien enye obup enye, ete, Nte afo edi owo Abasi oro okotode ke Judah edi? Ndien enye ete, edi ami.

¹⁵Ndien enye ɔdɔhɔ enye, ete, Tiene mi di ke ufɔk mi, dia ŋkpɔ.

¹⁶Edi enye ɔbɔrɔ, ete, Ndikwe nte nsaŋade ye afo mfiak ŋkoduk ke ɔtɔ fo: ndinyuŋ ndiaha ŋkpɔ, nnyuŋ ŋŋwɔŋke mmɔŋ ye afo ke ebiet emi:

¹⁷koro ekedɔhɔde mi ke uyo Jehovah, ete, Kudia ŋkpɔ, kunyuŋ uŋwɔŋ mmɔŋ do, kufiak udi ke usuŋ oro afo edisaŋade ke esit aka.

¹⁸Ndien enye eken ete, Ami nde-nde ndi prophet kpa nte afo, ndien angel kiet ɔkɔdɔhɔ mi ke uyo Jehovah, ete, Da enye fiak ye afo ke ufɔk fo, man enye adia ŋkpɔ, onyuŋ ɔŋwɔŋ mmɔŋ; edi enye osusu ɔnɔ enye.

¹⁹Ntre ke enye etiene enye afiak, aka akadia ŋkpɔ ke ufɔk esie, onyuŋ ɔŋwɔŋ mmɔŋ.

²⁰Edikem ke ini mmɔ etiede do ke okpokoro, uyo Jehovah osim prophet oro akadade enye afiak:

²¹ndien enye ofiori okot owo Abasi emi okotode ke Judah edi, ete, Ntem ke Jehovah ɔdɔhɔ, ete, Koro afo otutde utɔŋ ke inua Jehovah, munyuŋ unimke ibet oro Jehovah Abasi fo ekebetde fi,

²²edi ama afiak, onyuŋ adia ŋkpɔ, onyuŋ ɔŋwɔŋ mmɔŋ ke ebiet emi enye ɔkɔdɔhɔde fi, ete okudia ŋkpɔ, okunyuŋ ɔŋwɔŋ mmɔŋ; okpo fo idisimke udi mme usɔ.

²³Edikem, adaŋemi enye adiade ŋkpɔ, onyuŋ ɔŋwɔŋde ama, enye ɔdiɔŋ ass ɔnɔ enye, kpa prophet oro enye akadade afiak edi. Ndien enye ɔnyɔŋ.

²⁴Ekem lion kiet osim enye ke ɔkpɔ-usuŋ, onyuŋ owot enye: ndien okpo esie ɔduɔ ana ke usuŋ, ass onyuŋ ada enye ke ŋkaŋ, lion onyuŋ ada okpo ke ŋkaŋ ŋko.

²⁵Ekem, sese, nte owo ebede, mmɔ ekut okpo oro nte anade ke ɔkpɔ-usuŋ, ye nte lion adade okpo ke ŋkaŋ: ndien mmɔ eka eketiŋ ke obio oro akani prophet oduŋde ke esit.

²⁶Ekem prophet oro akadade enye ke usuŋ afiak, okop, onyuŋ ɔdɔhɔ, ete, Enye oro edi owo Abasi emi okotutde utɔŋ ke inua Jehovah: mmɔdo Jehovah ama ada enye ɔnɔ lion emi anuakde enye, onyuŋ owotde enye, ke uyo Jehovah emi ɔkɔdɔhɔde ye enye.

²⁷Ndien enye ɔdɔhɔ nditɔ esiemɔ, ete, Mbufo ediɔŋ ass enɔ mi. Ndien mmɔ ediɔŋ.

²⁸Ndien enye aka okosim okpo esie oro nte anade ke ɔkpɔ-usuŋ, ye ass ye lion nte edade ke ŋkaŋ okpo oro: lion ikataha okpo, ikonyuŋ iwotke ass.

²⁹Ndien prophet emen okpo owo Abasi oro, odori ke ass, ada enye afiak: akani prophet onyuŋ edi ke obio, editua enye, onyuŋ obuk enye.

³⁰Enye onyuŋ ada okpo esie oro esin ke udi esiemɔ; ndien mmɔ etuaŋa enye, ete, Mbɔm eyen-ete mi!

³¹Edikem ke adaŋemi enye ama okobuk enye, enye ɔdɔhɔ nditɔ esie, ete, Adaŋemi ndikpade, mbufo ebuk mi ke udi emi owo Abasi oro ɔbuhɔde ke esit; enim mme ɔkpɔ mi ke ŋkaŋ mme ɔkpɔ esie:

³²koro ikɔ oro enye okofioride ke uyo Jehovah, okot itie-uwa emi odude ke Bethel, ye kpukpru mme ufɔk edikoŋ ebiet emi edude ke mme obio Samaria, miditreke ndisu.

³³Ke ini ŋkpɔ emi ebede, Jeroboam ifiakke edem ikpɔŋ idiɔk usuŋ esie, edi enye ɔtɔŋɔ ntak osio owo ke ofuri obio onim ke oku edikoŋ ebiet: ndien ama edi owo ekededi eke oyomde, enye ɔyɔhɔ owo oro ubɔk, ndien enye akabare edi kiet ke otu mme oku edikoŋ ebiet.

³⁴Ndien edi ŋkpɔ emi ekesin ufɔk Jeroboam ɔdiɔk, man ebiat mmɔ, enyuŋ esobo mmɔ ke iso isɔŋ efep.