Read efik 1 NDIDEM 14 Bible Online

1 NDIDEM 14 - efik bible

1 NDIDEM 14

¹KE ini oro Abijah eyen Jeroboam ɔdɔŋɔ. Ndien Jeroboam ɔdɔhɔ ŋwan esie, ete,

²Mbɔk, daha ke enyɔŋ, foro owo efen, man ekufiɔk ete ke afo edi ŋwan Jeroboam: ndien ka ke Shiloh: sese, Ahijah prophet oro ɔkɔdɔhɔde abaŋa mi ete ke ami ndida ubɔŋ obio emi, odu do.

³Nyuŋ da uyo duop, ye obukpa uyo, ye aran-ɔkwɔk ke ekpeme ke ubɔk fo, nyuŋ ka ke ɔtɔ esie: enye eyesiak se idiwɔrɔde eyen emi.

⁴Ndien ŋwan Jeroboam anam ntre, onyuŋ adaha ke enyɔŋ aka ke Shiloh, okoduk ke ufɔk Ahijah. Edi Ahijah ikwe ŋkpɔ, koro usɔŋ esie esinde enyin akai enye.

⁵Ndien Jehovah ɔdɔhɔ Ahijah, ete, Sese, ŋwan Jeroboam ke edi ndibup fi ŋkpɔ, mbaŋa eyen esiemɔ: koro eyen ɔdɔŋɔde dɔhɔ enye ntem ye ntem ndien ama ekem adaŋemi enye edidide, enye eyenim idem nte owo efen.

⁶Edikem ke ini Ahijah okopde ntim-ikpat esie, nte enye odukde ke enyin-usuŋ, enye ɔdɔhɔ, ete, Ŋwan Jeroboam, be duk, nsinam afo onimde idem fo nte owo efen? Koro etobode mi ɔkpɔsɔŋ ikɔ enɔ fi.

⁷Ka kɔdɔhɔ Jeroboam, ete, Ntem ke Jehovah Abasi Israel ɔdɔhɔ ete, Koro ami ŋkemenerede fi ke ufɔt obio, nnyuŋ nnim fi ke ɔbɔŋ ikɔt mi Israel,

⁸ŋkonyuŋ ŋwai ubɔŋ ufɔk David mbɔ, nda nnɔ fi, ndien afo ukanamke nte owo mi David, emi okonimde mbet mi, onyuŋ ebinede mi ke ofuri esit esie, onyuŋ anam se inende mi ke enyin ikpɔŋ-ikpɔŋ,

⁹edi ama anam idiɔk akan kpukpru owo emi ekebemde fi iso edu ama onyuŋ aka akanam abasi eŋwen, ye editara mbiet, onyuŋ ayat mi esit, onyuŋ emen mi ɔduɔk ke edem fo.

¹⁰Mmɔdo, sese, ami nyeda idiɔk-ŋkpɔ ntiene ufɔk Jeroboam, nyenyuŋ nsibe irenowo ufɔk Jeroboam mfep. Ofin ye eyen isɔŋ ke Israel, ndien nyebine ufɔk Jeroboam ŋkpɔri mfep, kpa nte owo ɔkpɔride ifum efep tutu okure.

¹¹Mme ebua eyeta owo Jeroboam eke akpade ke obio, mme inuen enyɔŋ eyenyuŋ eta owo eke akpade ke iŋwaŋ: koro edi Jehovah ɔdɔhɔ.

¹²Afo daha ke enyɔŋ ndien ka ke ufɔk fo: adaŋemi ukot fo odukde ke obio, eyen oro eyekpa.

¹³Ndien ofuri Israel eyetuaŋa enye, enyuŋ ebuk enye: koro enye ikpɔŋ-ikpɔŋ ke eke Jeroboam edibukhɔ ke udi; koro ekutde ete ke se Jehovah Abasi Israel esede ke eti ŋkpɔ odu enye ke esit, ke ufɔk Jeroboam.

¹⁴Ndien Jehovah eyenam edidem Israel adaha ke enyɔŋ, eke edikpokde ufɔk Jeroboam efep. Emi eyesu mfin; ye kpa ke idem idahemi,

¹⁵Ndien Jehovah eyenuak Israel, kpa nte mmɔŋ enyeŋede nnyanyaŋa, enye eyenyuŋ edibere Israel efep ke eti isɔŋ emi enye ɔkɔnɔde mme ete mmɔ, onyuŋ asuan mmɔ ke edem akpa oko: koro mmɔ enamde eto-mkpe, ke eyat Jehovah esit.

¹⁶Ndien enye eyeyak Israel ɔnɔ, abaŋa mme idiɔk ido Jeroboam emi ɔkɔdiɔkde, emi okonyuŋ anamde Israel ediɔk.

¹⁷Ndien ŋwan Jeroboam adaha ke enyɔŋ, ɔnyɔŋ ke Tirzah: ndien ke ini enye ebede asaŋa-udɔk oduk ke ufɔk mmɔ, eyen oro akpa.

¹⁸Ndien mmɔ ebuk enye; ofuri Israel enyuŋ etuaŋa enye, ke uyo Jehovah oro enye akadade inua owo esie Ahijah prophet ɔdɔhɔ.

¹⁹Ndien ikɔ Jeroboam eŋwen, nte enye akaŋwanade ekɔŋ, nte enye okonyuŋ adade ubɔŋ, sese, emewet mmɔ ke ŋwed ikɔ eyo ndidem Israel.

²⁰Ndien ini emi Jeroboam akadade ubɔŋ edi isua edip ye iba: ndien enye ɔsuhɔre ana ye mme ete esie ede idap: ndien Nadab eyen esie ada ubɔŋ ke itie esie.

²¹Ndien Rehoboam eyen Solomon edi edidem ke Judah. Rehoboam osim isua aba ye kiet ke ini enye adade ubɔŋ, onyuŋ edi edidem ke isua efureba ke Jerusalem, obio oro Jehovah ekemekde ke otu kpukpru esien Israel, ndisin enyiŋ esie do. Ndien enyiŋ eka esie ekere Naamah ŋwan Ammon.

²²Judah enyuŋ enam idiɔk ke iso Jehovah enyuŋ esin enye ofibe ufup akan kpukpru se mme ete mmɔ ekenamde, ke idiɔk ido mmɔ eke mmɔ ekenamde.

²³Ndien mmɔ enyuŋ enam edikoŋ ebiet ŋko-ŋko, ye mme adaha, ye eto mkpe, ke enyɔŋ kpukpru ŋkokoŋo obot, ye ke idak kpukpru awawa eto.

²⁴Ndien mbon-use-sodom edu ke idut oro ŋko: mmɔ enam kpukpru mbubiam mme idut oro Jehovah okosiode ke iso nditɔ Israel ɔduɔk.

²⁵Edikem ke ɔyɔhɔ isua edidem Jeroboam ition, Shishak edidem Egypt ɔdɔk edi ekɔŋ ke Jerusalem;

²⁶onyuŋ ada ŋkpɔ-uto ufɔk Jehovah, ye ŋkpɔ-uto ufɔk edidem efep; enye ada kpukpru: onyuŋ emen kpukpru otu-ekɔŋ o gold oro Solomon akanamde, ɔnyɔŋ.

²⁷Ndien edidem Rehoboam ada okpoho anam otu-ekɔŋ ke ibuot mmɔ, ada mmɔ esin ke ubɔk mme etubom mme andikpeme edidem, emi ekpemede inua-otop ufɔk edidem.

²⁸Edikem adaŋemi edidem odukde ke ufɔk Jehovah, mme andikpeme ebiom mmɔ, ndien eda mmɔ efiak enim ke ubet mme andikpeme.

²⁹Ndien ama edi ikɔ Rehoboam eŋwen, ye kpukpru se enye akanamde, nte ikewetke mmɔ ke ŋwed ikɔ ndidem Judah?

³⁰Ekɔŋ onyuŋ odu ke ufɔt Rehoboam ye Jeroboam ke ofuri eyo mmɔ. Ekem Rehoboam ana ɔsuhɔre ye mme ete esie ede idap, onyuŋ ɔbuhɔ ye mme ete esie ke obio David.

³¹Ndien enyiŋ eka esie ekere Naamah ŋwan Ammon. Ndien Abiijam eyen esie ada ubɔŋ ke itie esie.