Read efik 1 NDIDEM 15 Bible Online

1 NDIDEM 15 - efik bible

1 NDIDEM 15

¹EKEM ke ɔyɔhɔ isua edidem Jeroboam eyen Nebat efureta, Abijam ada itie edidem ke Judah.

²Enye edi edidem ke Jerusalem ke isua ita. Ndien enyiŋ eka esie ekere Maacah eyen Abishalom.

³Enye onyuŋ asaŋa ke kpukpru mme idiɔk ido ete esie, emi ete ekebemde enye iso anam: ofuri esit esie inyuŋ isaŋake ye Jehovah Abasi esie, nte esit David ete esie.

⁴Edi Jehovah Abasi esie ɔnɔ enye utuenikaŋ ke Jerusalem, abaŋa David ete esie; onyuŋ anam eyen esie etiene enye adaha ada, onyuŋ anam Jerusalem ɔsɔŋ ada:

⁵koro David akanamde se inende ke iso Jehovah, mikonyuŋ iwahake ikpɔŋ baba ŋkpɔ kiet eke Enye eketemede enye ke ofuri eyo uwem esie, ke mibɔhɔke ke ikɔ Uriah Hittite ikpɔŋ-ikpɔŋ.

⁶Ekɔŋ onyuŋ odu ke ufɔt Rehoboam ye Jeroboam ke ofuri eyo uwem esie.

⁷Ndien ama edi ikɔ Abijam eŋwen, ye kpukpru se enye akanamde, nte ikewetke mmɔ ke ŋwed eyo ndidem Judah?

⁸Ekɔŋ onyuŋ odu ke ufɔt Abijam ye Jeroboam. Ekem Abijam ɔsuhɔre ana ye mme ete esie ede; ndien ebuk enye ke obio David; ndien Asa eyen esie osuk ke edidem ke itie esie.

⁹Ndien ke ɔyɔhɔ isua Jeroboam edidem Isreal edip, Asa ada ubɔŋ ke Judah.

¹⁰Enye edi edidem ke Jerusalem ke isua aba ye kiet. Ndien enyiŋ eka esie ekere Maacah eyen Abishalom.

¹¹Ndien Asa anam se inende ke iso Jehovah, nte David ete esie.

¹²Enye onyuŋ osobo mbon-use-sodom ke isɔŋ efep onyuŋ emen kpukpru nsu-nsu abasi emi mme ete esie ekenamde, ɔduɔŋɔ.

¹³Enye onyuŋ osio Maacah eka esie ke itie ɔbɔŋ aŋwan efep, koro enye akanamde mbiet ɔnɔ Ashtoreth: ndien Asa asai mbiet esie mbai-mbai, onyuŋ ɔfɔp enye ke ebedeŋ Kidron.

¹⁴Edi enye imenke ŋkokoŋo ebiet ifep; edi ofuri esit Asa asaŋa ye Jehovah ke ofuri eyo esie.

¹⁵Enye onyuŋ emen ŋkpɔ oro ete esie okonimde, ye emi enye ke idem esie okonimde, esin ke ufɔk Jehovah, kpa silver, ye gold, ye mkpoduoho.

¹⁶Ekɔŋ onyuŋ odu ke ufɔt Asa ye Baasha edidem Israel ke ofuri eyo mmɔ

¹⁷Ndien Baasha edidem Israel ɔdɔk akaŋwana ye Judah, onyuŋ ɔbɔp Ramah, ete ikuyak owo ɔwɔrɔ onyuŋ oduk etiene Asa edidem Judah.

¹⁸Ndien Asa ada kpukpru silver ye gold emi ɔsuhɔde ke ebiet-unim ŋkpɔ-uto ufɔk Jehovah, ye ke ebiet unim ŋkpɔ uto ufɔk edidem, ada mmɔ esin ikɔt esie ke ubɔk: ndien edidem Asa ɔnɔ mmɔ esɔk Benhadad eyen Tabrimmon, eyen Hezion, edidem Syria, emi oduŋde ke Damascus, ete,

¹⁹Ediomi ke odu ke ufɔt mi ye afo, ye ke ufɔt ete mi ye usɔ: sese, mmɔŋɔ enɔ silver ye gold esɔk fi; di biat ediomi fo ye Baasha edidem Israel, man enye ɔdɔk ɔkpɔŋ mi.

²⁰Ndien Benhadad okop uyo edidem Asa, onyuŋ ɔdɔŋ mme etubom mme udim mbon-ekɔŋ emi enye enyenede, utom ete eka ekeŋwana ekɔŋ ye mme obio Israel, onyuŋ asuan Ijon, ye Dan, ye Abel-beth-maacah, ye ofuri Chinneroth, ɔkɔrɔ ye ofuri isɔŋ Naphtali.

²¹Edikem ke ini Baasha okopde, enye etre ndibɔp Ramah, ndien aka okoduŋ ke Tirzah.

²²Ndien edidem Asa owuk ofuri Judah; baba kiet isuhɔke: ndien mmɔ eka ekebiom kpukpru mme itiat Ramah, ye mme eto esie oro Baasha akadade ɔbɔp; edidem Asa onyuŋ ada mmɔ ɔdiɔŋ Geba a Benjamin, ye Mizpah.

²³Ndien ama edi kpukpru ikɔ Asa eŋwen, ye ofuri odudu esie, ye kpukpru se enye akanamde, ye mme obio emi enye ɔbɔpde, nte ikewetke mmɔ ke ŋwed ikɔ eyo ndidem Judah? Edi ke ini usɔŋ esie udɔŋɔ anam enye ke ukot.

²⁴Ekem Asa ɔsuhɔre ana ye mme ete esie ede, onyuŋ ɔbuhɔ ye mme ete esie ke obio David ete esie: ndien Jehoshaphat eyen esie osuk ke edidem ke itie esie.

²⁵Ekem Nadab eyen Jeroboam ada ubɔŋ Israel ke udiana-akpa isua Asa edidem Judah, onyuŋ edi edidem ke Israel iba isua iba.

²⁶Ndien enye anam se idiɔkde Jehovah ke enyin, onyuŋ asaŋa ke usuŋ ete esie, ye ke idiɔk ido esie emi enye akadade esin Israel ediɔk.

²⁷Ndien Baasha eyen Ahijah, emi otode ke ufɔk Isaachar, oduk odu abaŋa enye; Baasha onyuŋ owot enye ke Gibbethon, emi enyenede mme Philistine; koro Nadab ye ofuri Israel ekande Gibbethon ekuk.

²⁸Ntem ke Baasha owot enye ke ɔyɔhɔ isua Asa edidem Judah ita, onyuŋ ada ubɔŋ ke ibuot esie.

²⁹Edikem ke ini enye ama akada ubɔŋ, enye owot ofuri ufɔk Jeroboam; isuhɔke baba se iduɔkde ibifik, inɔ Jeroboam, edi osobo enye ama, ekem ke uyo Jehovah emi enye akadade inua Ahijah Shilonite owo esie ɔdɔhɔ:

³⁰ke abaŋa mme idiɔk ido Jeroboam emi enye akanamde, ye se enye esinde Israel enam, ke eriyat emi enye ayatde Jehovah Abasi Israel esit.

³¹Ndien ama edi ikɔ Nadab eŋwen, ye kpukpru se enye akanamde, nte ikewetke mmɔ ke ŋwed ikɔ eyo ndidem Israel?

³²Ekɔŋ onyuŋ odu ke ufɔt Asa ye Baasha edidem Israel ke ofuri eyo mmɔ.

³³Ke ɔyɔhɔ isua Asa edidem Judah ita, Baasha eyen Ahijah ada ubɔŋ ofuri Israel ke Tirzah, ke ofuri isua edip ye inaŋ.

³⁴Enye onyuŋ anam idiɔk ke iso Jehovah, onyuŋ asaŋa ke usuŋ Jeroboam, ye ke idiɔk ido esie emi enye esinde Israel ediɔk.