Read efik 1 NDIDEM 16 Bible Online

1 NDIDEM 16 - efik bible

1 NDIDEM 16

¹EKEM uyo Jehovah osim Jehu eyen Hanani, abaŋa Baasha, ete, Koro ŋkemenerede fi ke ntɔŋ,

²Koro ŋkemenerede fi ke ntɔŋ, nnyuŋ nnimde fi ke etubom ikɔt mi Israel; ndien afo ama akasaŋa ke usuŋ Jeroboam, onyuŋ esin ikɔt mi Israel ediɔk, enyuŋ eyat mi esit ke idiɔk mmɔ; sese,

³ami mmɔŋ ŋkpɔri Baasha ye ufɔk esie mfep; nyenyuŋ nnam ufɔk fo etie nte ufɔk Jeroboam eyen Nebat.

⁴Mme ebua eyeta owo Baasha eke akpade ke obio; mme inuen enyɔŋ eyenyuŋ eta owo esie eke akpade ke iŋwaŋ.

⁵Ndien ama edi ikɔ Baasha eŋwen, ye se enye akanamde, ye odudu esie, nte ikewetke mmɔ ke ŋwed ikɔ eyo ndidem Israel?

⁶Ekem Baasha ɔsuhɔre ana ye mme ete esie ede, onyuŋ ɔbuhɔ ke Tirzah: ndien Elah eyen esie osuk ke edidem ke itie esie.

⁷Ndien ikɔ Jehovah oto ke inua prophet Jehu eyen Hanani osim Baasha, ye ufɔk esie, ke abaŋa kpukpru mme idiɔk ido oro enye akanamde ke iso Jehovah, onyuŋ ayat enye esit ke utom ubɔk esie, onyuŋ ebiet ufɔk Jeroboam: koro enye okonyuŋ osobode enye.

⁸Ke ɔyɔhɔ isua Asa edidem Judah edip ye itiokiet, Elah eyen Baasha ada ubɔŋ ke Tirzah, ke isua iba.

⁹Ekem owo esie Zimri, etubom ubak mme chariot esie, oduk odu abaŋa enye. Ndien ke ini enye odude ke Tirzah, ɔŋwɔŋ mmin akpa ke ufɔk Arza etubom ufɔk esie ke Tirzah;

¹⁰Zimri aka okokim enye owot, ke ɔyɔhɔ isua Asa edidem Judah edip ye itiaba: ndien ada ubɔŋ ke itie esie.

¹¹Edikem adaŋemi enye akadade ubɔŋ, onyuŋ etiede ke ebekpo esie, enye osobo ofuri ufɔk Baasha, ikpɔŋke baba erenowo kiet ke otu oruk esie, ye mme ufan esie, inɔ enye.

¹²Ntem ke Zimri osobo ofuri ufɔk Baasha, ekem ke uyo Jehovah oro enye akadade inua prophet Jehu,

¹³ɔdɔhɔ abaŋa Baasha; ke abaŋa kpukpru mme idiɔk ido Baasha, ye mme idiɔk ido Elah eyen esie, emi mmɔ ekenamde, enyuŋ edade esin Israel ediɔk, enyuŋ eyat Jehovah Abasi Israel esit, ke ndisime ido mmɔ.

¹⁴Ndien ama edi ikɔ Elah eŋwen, ye kpukpru se enye akanamde, nte ikewetke mmɔ isin ke ŋwed ikɔ eyo ndidem Israel?

¹⁵Ke ɔyɔhɔ isua Asa edidem Judah edip ye itiaba, Zimri ada ubɔŋ usen itiaba ke Tirzah. Ndien mbon-ekɔŋ ena ke nna - ekɔŋ eŋwana ye Gibbethon, emi enyenede mme Philistine.

¹⁶Ndien adaŋa emi mmɔ eke edude ke nna-ekɔŋ ekopde ete ke Zimri ama oduk odu, ama onyuŋ owot edidem ŋko, ofuri Israel eda Omri, etubom mboŋ-ekɔŋ, enim ke edidem ofuri Israel ke usen oro ke nna-ekɔŋ.

¹⁷Ndien Omri ye ofuri Israel ŋko edaŋa ke Gibbethon, eka ekekan Tizah ekuk.

¹⁸Edikem adaŋemi Zimri okutde nte ema ekeda obio, enye oduk ke ufɔk-enyɔŋ ufɔk edidem, onyuŋ ɔfɔp ufɔk edidem ke ikaŋ, abaha idemesie, ndien akpa.

¹⁹Kabaŋa mme idiɔk ido esie oro enye akanamde, ke anam idiɔk ke iso Jehovah, onyuŋ asaŋa ke usuŋ Jeroboam, ye ke idiɔk ido esie oro enye akanamde, ke ndisin Israel ediɔk.

²⁰Ndien ama edi ikɔ Zimri eŋwen, ye odu esie oro enye okodukde, nte ikewetke mmɔ isin ke ŋwed eyo ndidem Israel?

²¹Ndien nditɔ Israel ebahare edem iba: ubak mmɔ kiet etiene Tibni eyen Ginath, ete inim enye ke edidem; ubak eken enyuŋ etiene Omiri.

²²Edi mmɔ oro etienede Omri esɔŋɔ ekan mmɔ oro etienede Tibni eyen Ginath: ntem ke Tibni akpa, ndien Omri ada ubɔŋ.

²³Ke ɔyɔhɔ isua Asa edidem Judah edip ye duopekiet, Omri ada ubɔŋ Israel ke isua duopeba: enye edi edidem ke Tirzah ke isua itiokiet.

²⁴Ndien enye edep obot Samaria ye Shemer ke talent silver iba, onyuŋ ɔbɔp (obio) ke obot oro, onyuŋ ada enyiŋ Shemer, andinyene obot, osio obio oro enye ɔkɔbɔpde, okot ete Samaria.

²⁵Edi Omri anam idiɔk ke iso Jehovah, onyuŋ ɔdiɔk akan kpukpru mmɔ oro ekebemde enye iso.

²⁶Koro enye asaŋade ke ofuri usuŋ Jeroboam eyen Nebat, ye ke idiɔk ido esie oro enye akadade esin Israel ediɔk, ke ayat Jehovah Abasi Israel esit ke ndisime ido mmɔ.

²⁷Ndien ama edi ŋkpɔ Omri eŋwen emi enye akanamde, ye uko esie emi enye akanamde, nte ikewetke mmɔ isin ke ŋwed ikɔ eyo ndidem Israel?

²⁸Ekem Omri ɔsuhɔre ana ye mme ete esie ede, onyuŋ ɔbuhɔ ke Samaria: ndien Ahab eyen esie ada ubɔŋ ke itie esie.

²⁹Ekem Ahab eyen Omri ada itie edidem Israel ke ɔyɔhɔ isua Asa edidem Judah edip ye efureta: ndien Ahab eyen Omri edi edidem Israel ke Samaria ke isua edip ye iba.

³⁰Ahab eyen Omri onyuŋ anam idiɔk ke iso Jehovah akan kpukpru mmɔ oro ekebemde enye iso.

³¹Edikem, (nte erisaŋa emi enye asaŋade ke mme idiɔk ido Jeroboam eyen Nebat edi ekpri ŋkpɔ), enye onyuŋ ada Jezebel eyen Ethbaal edidem mme Zidonian ɔdɔ, onyuŋ aka akanam ŋkpɔ Baal, onyuŋ atuak ibuot ɔnɔ enye.

³²Enye onyuŋ anam itie-uwa ɔnɔ Baal ke ufɔk Baal oro enye ɔkɔbɔpde ke Samaria.

³³Ahab onyuŋ anam eto-mkpe; Ahab onyuŋ ɔdɔdiɔŋ anam se iyatde Jehovah Abasi Israel esit, akan kpukpru ndidem Israel oro ekebemde enye iso.

³⁴Hiel a Bethel ɔbɔp Jericho ke eyo esie: ɔtɔŋɔ ndibɔp ke Abiram akpan esie, onyuŋ ɔkɔŋ itim esie ke Segub ekpri eyen esie, ekem ke eyo Jehovah oro enye ɔkɔdɔhɔde ke inua Joshua eyen Nun.