Read efik 1 NDIDEM 17 Bible Online

1 NDIDEM 17 - efik bible

1 NDIDEM 17

¹EKEM Elijah Tishbite emi otode ke mme andiduŋ Gilead, ɔdɔhɔ Ahab, ete Ma uwem Jehovah Abasi Israel, emi ndade enye ke iso, mbara ye edim ididuhe ke mme isua emi, ke mitoho ke uyo mi.

²Ekem uyo Jehovah osim enye, ete, Daha ke ebiet emi,

³kabare ka ke edem usiaha-utin, nyuŋ dibe ke mben idim Cherith, emi odude ke iso Jordan.

⁴Ndien ama ekem afo eyeŋwɔŋ mmɔŋ ke idim: mmonyuŋ nteme mme utere nte ebɔk fi do.

⁵Ndien enye aka akanam ke uyo Jehovah: ntre ke enye aka eketie ke mben idim Cherith, emi odude ke iso Jordan.

⁶Mme utere enyuŋ eda uyo ye unam edisɔk enye ke usenubɔk, enyuŋ eda uyo ye unam edisɔk enye ke mbubreyo; enye onyuŋ ɔŋwɔŋ mmɔŋ ke idim.

⁷Edikem ke utit mme usen oro mmɔŋ ke idim asat ama, koro edim mikoduhe ke edem oro.

⁸Ndien uyo Jehovah osim enye, ete,

⁹Daha ke enyɔŋ ka ke Zarephath, emi enyenede Zidon, nyuŋ duŋ do: sese, mma nteme ŋwan kiet emi ebe esie akpade, nte ɔbɔk fi do.

¹⁰Ekem enye adaha ke enyɔŋ aka ke Zarephath. Ndien adaŋemi enye osimde ke inua-otop obio, sese, ŋwan do emi ebe esie akpade ke ataŋ ifia: ndien enye ɔdɔhɔ ŋwan, ete, Mbɔk, sin ekpri mmɔŋ ke uŋwɔŋ-ŋkpɔ di sɔk mi ŋŋwɔŋ.

¹¹Ndien nte ŋwan akade ndida ndi, enye (Elijah) okot enye, ete, Mbɔk da uyo esisit ke ubɔk fo di sɔk mi.

¹²Ndien ŋwan ɔdɔhɔ, ete, Ma uwem Jehovah Abasi fo, nnyeneke uyo, ke mibɔhɔke ndomuyo ke abaŋ adaŋa nte owo ekemede ndiwobi ke eka-ubɔk, ye aran esisit ke ekpeme: ndien, sese, ami mmɔŋ ntataŋ ifia iba, man ŋka ŋkanam enye nnɔ idemmi ye eyen mi, man nnyin ita enye ndien ikpa.

¹³Ndien Elijah ɔdɔhɔ enye, ete, Kufehe; ka kanam ke uyo fo: edi bem iso sio ke esit, nam ekpri uyo nɔ mi; da di sɔk mi, ndien amanam, nam okuo ye eke eyen fo.

¹⁴Koro ntem ke Jehovah Abasi Israel ɔdɔhɔ ete, Ndom-uyo oro idikureke ke abaŋ, aran ke ekpeme idinyuŋ itreke, tutu osim usen emi Jehovah edinɔde edim ke iso isɔŋ,

¹⁵Ndien ŋwan aka akanam ke uyo Elijah; ndien ŋwan, ye enye, ye ufɔk ŋwan, edia ŋkpɔ ediwak usen

¹⁶Ndom-uyo inyuŋ ikureke ke abaŋ, aran inyuŋ itreke ke ekpeme, ekem ke uyo Jehovah oro enye ɔkɔdɔhɔde ke inua Elijah.

¹⁷Edikem ŋkpɔ emi ema ekebe, ndien eyen a-ŋwan oro, eka ufɔk, ɔduɔ udɔŋɔ; udɔŋɔ onyuŋ ɔsɔŋ ubɔk anam enye eti-eti, tutu ibifik onime enye.

¹⁸Ndien eka ɔdɔhɔ Elijah, ete, Ami nsaŋa nso ye afo, O owo Abasi? Nte afo emedi ke ufɔk mi, nditi mi idiɔk ido mi, nnyuŋ ŋwot eyen mi?

¹⁹Ndien enye ɔdɔhɔ ŋwan, ete, Nɔ mi eyen fo. Ndien enye ɔbɔ ŋwan eyen ke ikpanesit emen enye ɔdɔk ke ubet enyɔŋ, emi enye oduŋde do, okonim enye ke bed esiemɔ.

²⁰Ndien enye eseme ɔnɔ Jehovah, ete, O Jehovah Abasi mi, nte afo onyuŋ ada idiɔk-ŋkpɔ etiene ebe-akpa emi nduŋde ye enye, ke eriwot eyen esie?

²¹Ndien enye anyanare idem esie ke idem eyen utim ikata, onyuŋ eseme ɔnɔ Jehovah, ete, O Jehovah Abasi mi, mbɔk, yak ukpɔŋ eyen emi afiak oduk enye ke idem.

²²Ndien Jehovah okop uyo Elijah; ukpɔŋ eyen oro onyuŋ afiak oduk enye ke idem, ndien enye eset.

²³Ndien Elijah emen eyen ke ubet enyɔŋ ɔsuhɔre ke ufɔk ada enye ɔnɔ eka esie. Ndien Elijah ɔdɔhɔ, ete, Sese, eyen fo ke odu uwem.

²⁴Ndien ŋwan oro ɔdɔhɔ Elijah, ete, Ke emi ke mfiɔk nte ke afo edi owo Abasi, uyo Jehovah emi odude fi ke inua onyuŋ edi akpanikɔ ŋko.