Read efik 1 NDIDEM 18 Bible Online

1 NDIDEM 18 - efik bible

1 NDIDEM 18

¹EDIKEM ediwak usen ema ekebe, ndien uyo Jehovah osim Elijah ke ɔyɔhɔ isua ita, ete, Ka kowut Ahab idemfo; ndien nyenam edim edep ke iso isɔŋ.

²Ndien Elijah aka ndiwut Ahab idemesie. Akaŋ onyuŋ ɔsɔŋ ubɔk eti-eti ke Samaria.

³Ekem Ahab okot Obadiah, emi edide etubom ufɔk esie. (Ndien Obadiah abak Jehovah eti-eti:

⁴koro edikem adaŋemi Jezebel okowotde mme prophet Jehovah, Obadiah ada prophet ikie, odip mmɔ owo aba ye duop, aba ye duop, ke aba itiat, onyuŋ ɔbɔk mmɔ ke uyo ye mmɔŋ.)

⁵Ndien Ahab ɔdɔhɔ Obadiah, ete, Saŋa ke isɔŋ, ka ke kpukpru obube mmɔŋ, kpukpru idim: mme nnyin iyekut mbiet, inyuŋ inim mme horse ye mme mule ke uwem, man ufene nnyin okusobo ama.

⁶Ndien mmɔ ebahare isɔŋ ke idemmɔ, ete isaŋa ibe ke esit; Ahab asaŋa aka usuŋ ke idemesie, Obadiah onyuŋ aka usuŋ efen ke idemesie.

⁷Ekem ke ini Obadiah asaŋade ke usuŋ, sese, Elijah ɔbiɔŋɔre enye ke iso: ndien enye ɔdiɔŋɔ enye, onyuŋ ɔduɔ ke isɔŋ okubi iso esie, ete, Nte afo emi edi ɔbɔŋ mi Elijah?

⁸Ndien enye ɔbɔrɔ enye, ete, Edi ami: ka kɔdɔhɔ ɔbɔŋ fo, ete Sese, Elijah mi.

⁹Ndien enye ɔdɔhɔ ete, Nnam nso idiɔk-ŋkpɔ, eke esinde fi ada owo fo ɔnɔ Ahab ke ubɔk, ete owot mi?

¹⁰Ma uwem Jehovah Abasi fo, baba obio, baba idut eke ete mi mikɔdɔŋke utom do ekeyom fi, iduhe: ndien adaŋoro mmɔ edɔhɔde, ete, Iduhe, enye anam idut oro, ye obio oro ɔŋwɔŋɔ, ete ke ikwe fi.

¹¹Ndien ke emi afo ɔdɔhɔ ete, Ka ketiŋ nɔ usɔ, ete, Sese, Elijah mi.

¹²Ndien ama ekem ke ini ami ndinyɔŋɔde ŋkpɔŋ fi, spirit Jehovah eyemen fi aka ke ebiet eke mmendifiɔkke; ndien ke ini ŋkade ŋketiŋ nnɔ Ahab, ndien enye midikwe fi, enye eyewot mi; edi owo fo edi andibak Jehovah toto ke ini uyen mi.

¹³Nte iketiŋkde inɔ ɔbɔŋ mi se ŋkanamde ke ini Jezebel okowotde mme prophet Jehovah, nte ŋkadade mme prophet Jehovah ndip owo ikie, aba ye duop, aba ye duop, ke aba itiat, nnyuŋ mbɔk mmɔ ke uyo ye mmɔŋ?

¹⁴Ndien ke emi afo ɔdɔhɔ ete, Ka ketiŋ nɔ ɔbɔŋ fo, ete, Sese, Elijah mi! ndien enye eyewot mi.

¹⁵Ndien Elijah ɔdɔhɔ ete, Ma uwem Jehovah mme udim, emi ami ndade enye ke iso, nditreke ndiwut Ahab idem mi mfin emi.

¹⁶Ndien Obadiah aka okosobo ye Ahab, onyuŋ etiŋ ɔnɔ enye: ndien Ahab aka okosobo ye Elijah.

¹⁷Edikem ke ini Ahab okutde Elijah, Ahab ɔdɔhɔ enye, ete, Nte edi afo odutuhɔ Israel?

¹⁸Ndien enye ɔbɔrɔ ete, Idige ami ndutuhɔ Israel; edi afo, ye ufɔk usɔ (enam), koro mbufo ekpɔŋde mbet Jehovah, koro afo onyuŋ etienede Baalim.

¹⁹Kam dɔŋ ekebon ofuri Israel enɔ mi ke obot Carmel, ye mme prophet Baal ikie inaŋ ye aba ye duop, ye mme prophet Asherah owo ikie inaŋ emi ediade ŋkpɔ ke okpokoro Jezebel.

²⁰Ndien Ahab ɔdɔŋ ekekot kpukpru nditɔ Israel edi, onyuŋ obon kpukpru mme prophet oro ke obot Carmel.

²¹Ekem Elijah oto edi editiene mbon oro, ndien ɔdɔhɔ, ete, Adaŋa didie ke mbufo esɔk ukot ke edem mbiba? Edieke Jehovah edide Abasi, mbufo etiene enye: edi ama edi Baal, etiene enye. Edi mbon oro ibɔrɔke enye baba ikɔ kiet.

²²Ndien Elijah ɔdɔhɔ mbon oro, ete Ami nsuk ikpɔŋ prophet Jehovah; ndien mme prophet Baal edi owo ikie inaŋ ye aba ye duop.

²³Yak enɔ nnyin enaŋ iba, ndien; yak mmɔ oro enyuŋ emek enaŋ kiet ke idem mmɔ, enyuŋ ebak enye edori ke ifia, edi ekusin ikaŋ; ndien ami nyediɔŋ enaŋ, eken nnyuŋ ndori enye ke ifia, edi ndisinke ikaŋ:

²⁴ndien mbufo ekot enyiŋ abasi mbufo, ndien ami nyekot enyiŋ Jehovah; ndien yak Abasi emi edidade ikaŋ ɔbɔrɔ edi Abasi. Ndien kpukpru owo edɔhɔ ete, ikɔ oro ɔfɔn.

²⁵Ekem Elijah ɔdɔhɔ mme prophet Baal, ete, Mbufo emek enaŋ kiet ke idem mbufo, enyuŋ ebem iso ediɔŋ enye; koro mbufo ewakde; ndien ekot enyiŋ abasi mbufo, edi ekusin ikaŋ.

²⁶Ntre ke mmɔ eda enaŋ oro ekenɔde mmɔ, enyuŋ ediɔŋ enye, ndien efiori ekot enyiŋ Baal, ɔtɔŋɔde ke usenubɔk tutu osim ufɔt uwemeyo, ete, O Baal, yere nnyin. Edi baba uyo kiet iduhe, baba owo kiet eke eyerede inyuŋ iduhe. Ndien mmɔ enek unek ekan itie-uwa oro mmɔ ekenamde ekuk.

²⁷Edikem ke ufɔt uwemeyo, ndien Elijah abiaŋa mmɔ, onyuŋ ɔdɔhɔ, ete, Mbufo esɔŋ uyo ekot: koro enye edide abasi; koro enye etiede ekere: koro enye awahade aka ŋkpɔ koro enye adade isaŋ; mme enye ede idap, ndien enyene nditatuak enye.

²⁸Ndien mmɔ emenere uyo efiori, enyuŋ eda ikwa ye akaraŋ ekpi idem mmɔ nte ekam enamde, tutu iyip eyere mmɔ ke idem.

²⁹Ekem ke ini ufɔt uwemeyo ama ekebe, mmɔ edama nte idat, tutu oyom ndikem ke ini emi ewade uwa, edi uyo iduhe, baba owo kiet eke eyerede iduhe, baba mkpaŋ-utɔŋ inyuŋ iduhe.

³⁰Ndien Elijah ɔdɔhɔ kpukpru owo, ete, Mbufo esaŋa ekpere mi, Ndien kpukpru owo esaŋa ekpere enye. Ndien enye ɔdiɔŋ itie-uwa Jehovah emi okowurede.

³¹Ndien Elijah ada itiat duopeba, ekem ke ibat mme esien nditɔ Jacob, emi uyo Jehovah okosimde enye, ete, Israel eyedi enyiŋ fo.

³²Enye onyuŋ emen itiat oro anam itie-uwa esin ke enyiŋ Jehovah: onyuŋ otibi isɔŋ akan itie-uwa oro okuk, anam ukpe eke odukde udomo mkpasip iba

³³Ndien enye ɔdiɔŋ onim ifia onyuŋ abak enaŋ, emen odori ke ifia; ndien enye ɔdɔhɔ ete,

³⁴Mbufo ekoi abaŋ mmɔŋ inaŋ, eŋwaŋa ke uwa emi, ye ke ifia. Ndien enye ete, mbufo etɔŋɔ ntak enam. Ndien mmɔ etɔŋɔ ntak enam. Enye onyuŋ ɔdɔhɔ, ete, Mbufo enam utim ikata.

³⁵Ndien mmɔ enam utim ikata. Ntre ke mmɔŋ ɔrɔ ɔfiɔrɔ akan itie-uwa okuk; enye onyuŋ esin mmɔŋ ke ukpe ɔyɔhɔ.

³⁶Edikem ke ini emi ekam ewade uwa, prophet Elijah asaŋa ekpere, onyuŋ ɔdɔhɔ ete, O Jehovah Abasi Abraham, ye eke Isaac, ye eke Israel, ke ami nnyuŋ ndi owo fo, ke nnyuŋ nnam kpukpru ŋkpɔ emi ke uyo fo.

³⁷Yere mi, O Jehovah, yere mi, man mbio emi efiɔk ete ke afo edi Jehovah Abasi mmimɔ, ete ke afo onyuŋ akabare esit mmɔ efiak.

³⁸Ndien ikaŋ Jehovah ɔduɔ, ata uwa oro, ye ifia, ye itiat, ye ntɔŋ, onyuŋ edei mmɔŋ emi odude ke ukpe.

³⁹Ndien kpukpru owo ekut, enyuŋ eduɔŋɔ ke isɔŋ, ekubi iso mmɔ: ndien mmɔ edɔhɔ ete, Jehovah edi Abasi! Jehovah edi Abasi!

⁴⁰Ndien Elijah ɔdɔhɔ ete, Mbufo emum mme prophet Baal; ekuyak baba owo mmɔ kiet ɔbɔhɔ. Ndien mmɔ emum mmɔ: Elijah onyuŋ ada mmɔ ɔsuhɔre ke akpa Kishon, onyuŋ owot mmɔ do.

⁴¹Ekem Elijah ɔdɔhɔ Ahab, ete, Dɔk ka dia ŋkpɔ nyuŋ ŋwɔŋ, koro uyom ediwak edim odude.

⁴²Ndien Ahab ɔdɔk aka ndidia ŋkpɔ nnyuŋ ŋŋwɔŋ. Elijah onyuŋ ɔdɔk ŋko ke ibuot Carmel; onyuŋ ɔsuhɔre etie ke isɔŋ, onyuŋ onuk ibuot esie esin mkpatian-ukot esie.

⁴³Ndien enye ɔdɔhɔ akparawa esie, ete, Dɔk, ndien, ka kese edem inyaŋ. Ndien enye ɔdɔk aka ekese, ndien edidɔhɔ ete, Ŋkpɔ baba kiet iduhe.

⁴⁴Ndien enye ete, Fiak ka utim ikatiaba. Edikem ke ɔyɔhɔ ikatiaba, enye ete, Sese, ekpri ŋkpɔ ke ikpa-enyɔŋ ebiet eka-ubɔk owo oto ke inyaŋ ɔdɔk. Ndien enye ete, Ka kɔdɔhɔ Ahab, ete, Tim chariot fo, nyuŋ suhɔre, mbak edim edikpehe fi.

⁴⁵Edikem, ke idem idaha oro ikpa-enyɔŋ akabare okim, oyobio onyuŋ edi, ɔkpɔsɔŋ edim onyuŋ ɔduɔt. Ndien Ahab odoro ke chariot aka ke Jezreel.

⁴⁶Ndien ubɔk Jehovah odoro Elijah ke idem; ndien enye ɔbɔbɔ mbɔbɔ ke isin esie, onyuŋ ebem Ahab iso efehe tutu osim ke inua-otop Jezreel.