Read efik 1 NDIDEM 19 Bible Online

1 NDIDEM 19 - efik bible

1 NDIDEM 19

¹EKEM Ahab emen kpukpru se Elijah akanamde etiŋ ɔnɔ Jezebel, nte enye okonyuŋ owotde kpukpru mme prophet ŋko ke ofut.

²Ndien Jezebel ɔdɔŋ isuŋ ɔkɔdɔhɔ Elijah, ete, Yak mme abasi enam ntem, yak mmɔ enyuŋ enam eka iso, ke mmendinamke uwem fo etie nte uwem owo mmɔ oro kiet, ke adaŋa ini ntem mkpɔŋ.

³Ndien adaŋemi enye okutde, enye adaha ke enyɔŋ, efehe ke uwem esie, aka ke Beersheba, emi enyenede Judah, ndien ɔkpɔŋ akparawa esie do.

⁴Ndien enye ada isaŋ usen kiet oduk ke wilderness, ndien aka eketie ke idak eto juniper kiet: onyuŋ ebeŋe ke idem esie ete ikpa; onyuŋ ɔdɔhɔ ete, Ekem, ndien; O Jehovah, kam bɔ mi uwem: koro mme-mfɔnke ŋkan mme ete mi.

⁵Ekem enye ana ke idak juniper oro ede idap, ndien, se do, angel kiet atuak enye, onyuŋ ɔdɔhɔ enye, ete, Daha ke enyɔŋ dia ŋkpɔ.

⁶Ndien enye okut, ndien, sese, obukpa uyo emi ekesaŋde ke ebok-ikaŋ, ye mmɔŋ ke ekpeme ke ena ke ɔtɔ udori-ibuot esie. Ndien enye emen ata, onyuŋ ɔŋwɔŋ, onyuŋ ɔtɔŋɔ ntak ɔsuhɔre ana ke isɔŋ.

⁷Ekem angel Jehovah ɔtɔŋɔ ntak edi edituak enye, ete, Daha ke enyɔŋ dia ŋkpɔ; koro usuŋ emi oyomde akan fi.

⁸Ndien enye adaha ke enyɔŋ, adia, onyuŋ ɔŋwɔŋ, onyuŋ asaŋa ke odudu udia oro ke uwemeyo aba ye ke okoneyo aba, aka ke Horeb obot Abasi.

⁹Ndien enye osim do aka okoduk ke aba itiat kiet, onyuŋ oduŋ do; ndien, sese, uyo Jehovah osim enye, onyuŋ ɔdɔhɔ enye, ete, Afo anam nso mi,

¹⁰Elijah? Ndien enye ɔdɔhɔ ete, Mma mfibe ufup eti-eti nnɔ Jehovah Abasi mme udim: koro nditɔ Israel emekpɔŋ ediomi fo, emewuri mme itie-uwa fo, eme-nyuŋ ewot mme prophet fo ke ofut; ndien ami nsuk ikpɔŋ ke idem mi; ndien mmɔ ke enyuŋ eyom uwem mi ndibɔ.

¹¹Ndien enye ɔdɔhɔ ete, Wɔrɔ, kada ke obot ke iso Jehovah. Ndien, sese, Jehovah ke ebe, ndien akamba ye ɔkpɔsɔŋ oyobio asiak ikpɔ obot, onyuŋ anuak mme itiat ke iso Jehovah; edi Jehovah iduhe ke oyobio. Ndien ke oyobio ama ekebe, isɔŋ enyek; edi Jehovah iduhe ke unyek-isɔŋ.

¹²Ndien ke unyek-isɔŋ ama ekebe, ikaŋ edi; edi Jehovah iduhe ke ikaŋ oro: ndien ke ikaŋ ama ekebe, suŋ-suŋ ekpri uyo edi.

¹³Edikem ke ini Elijah okopde, enye ada mantle esie ofuk iso esie, onyuŋ ɔwɔrɔ, akada ke inua aba oro. Ndien, sese, uyo oro osim enye, ete, afo anam nso mi, Elijah?

¹⁴Ndien enye ɔdɔhɔ ete, Mma mfibe ufup eti-eti nnɔ Jehovah Abasi mme udim: koro nditɔ Israel emekpɔŋ ediomi fo, emenyuŋ ewuri mme itie-uwa fo, enyuŋ ewot mme prophet fo ke iso ofut; ndien ami nsuk ikpɔŋ ke idem mi: ndien mmɔ ke eyom uwem mi ndibɔ.

¹⁵Ndien Jehovah ɔdɔhɔ enye, ete, Fiak ke usuŋ wilderness Damascus: ndien ke ini afo edisimde, yet Hazael aran nim ke edidem Syria:

¹⁶nyuŋ yet Jehu eyen Nimshi aran nim ke edidem Israel: nyuŋ yet Elisha eyen Shaphat, emi otode ke Abel meholah, nim ke prophet ke itie fo.

¹⁷Ndien ama ekem Jehu eyewot mmɔ eke ebɔhɔde ofut Hazael; ndien Elisha eyewot mmɔ eke ebɔhɔde ofut Jehu.

¹⁸Edi mma nsuhɔ tɔsin owo itiaba ke Israel nnɔ idem mi, kpukpru mme edɔŋ eke mikenuhɔke inɔ Baal, ye kpukpru mme inua eke miketimke enye.

¹⁹Ntre ke enye adaha do, aka okokut Elisha eyen Shaphat, nte enye ofuŋde isɔŋ, enaŋ iba, iba itie duopeba ebem enye iso, ndien enye asaŋa ye ɔyɔhɔ duopeba: ndien Elijah asaŋa ekpere enye, onyuŋ ada mantle esie ofuk enye ke idem.

²⁰Ndien enye ɔkpɔŋ enaŋ oro efehe ebine Elijah, onyuŋ ɔdɔhɔ ete, Mbɔk, yak ntim kaŋa ete mi ye eka mi inua, ndien nyetiene fi edem. Ndien enye (Elijah) ete enye, Ka, fiak di, koro nnam fi nso ŋkpɔ?

²¹Ndien enye (Elisha) afiak ɔkpɔŋ enye, aka akada enaŋ iba owot, onyuŋ ada ŋkpɔ unam-utom etem unam mmɔ, emen ɔnɔ mbon-utom eta. Ndien enye adaha ke enyɔŋ, etiene Elijah ke edem, onyuŋ anam ŋkpɔ ɔnɔ enye.