Read efik 1 NDIDEM 2 Bible Online

1 NDIDEM 2 - efik bible

1 NDIDEM 2

¹EKEM usen mkpa David ekpere: ndien enye eteme Solomon eyen esie,

²ete, Ami mmɔŋ ŋka usuŋ ofuri ererimbot: sɔŋ ubɔk, ndien, nyuŋ nam ido erenowo;

³nyuŋ kpeme mme ewuhɔ Jehovah Abasi fo, nyuŋ saŋa ke usuŋ esie, nyuŋ kpeme mme ewuhɔ esie, ye mbet esie, ye mme item esie, ye ikɔ ntiense esie, kpa nte emi ewetde ke ŋwed ewuhɔ Moses, man afo ada ɔniɔŋ anam kpukpru se afo anamde, ke kpukpru ebiet eke afo akabarede aka;

⁴man Jehovah onim uyo esie emi enye ɔkɔdɔhɔde mi, ete, Edieke nditɔ fo ekpemede ikpat isaŋ mmɔ, enyuŋ esaŋa ke iso mi ke akpanikɔ, ke ofuri esit mmɔ, ye ke ofuri ukpɔŋ mmɔ: ete, Owo eke etiede ke ebekpo Israel idinanake fi.

⁵Afo omonyuŋ ɔfiɔk ŋko se Joab eyen Zeruiah akanamde mi, se enye akanamde mme etubom mbon ekɔŋ Israel mbiba, Abner eyen Ner, ye Amasa eyen Jether, emi enye okowotde, okonyuŋ ɔduɔkde iyip ekɔŋ ke ini emem, onyuŋ ada iyip ekɔŋ eyet mbɔbɔ emi odude enye ke isin, ye ke ikpa ukot emi esinede enye ke ukot.

⁶Nam ndien ke eti ibuot fo, kunyuŋ uyak iwat esie ɔsuhɔre ke udi ke ifure.

⁷Edi fɔn ido ye nditɔ Barzillai-a-Gilead, yak mmɔ enyuŋ edu ke otu mmɔ eke ediade ŋkpɔ ke okpokoro fo; koro ntem ke mmɔ eketiene mi ke ini ŋkefehede mbɔhɔ Absalom eyen-usɔ.

⁸Ndien, sese, Shimei eyen Gera, eyen Benjamin, emi otode ke Bahurim, mmɔ mi ye afo: enye okosuŋi mi ata idiɔk isuŋi ke usen oro ŋkade Mahanaim: edi enye ɔsuhɔre aka ke Jordan okosobo ye ami, ndien ami ntomo Jehovah nnɔ enye, nte, Ndiwotke fi ke ofut.

⁹Kuyak enye ɔbɔhɔ isop ndien: koro afo edide owo eti ibuot, onyuŋ ɔfiɔkde se akpanamde ye enye; nam ndien iwat esie ɔsuhɔre ke udi ke iyip.

¹⁰Ekem David edide idap ye mme ete esie, onyuŋ ɔbuhɔ ke obio David.

¹¹Ndien mme usen emi David akadade ubɔŋ ke Israel edi isua aba: ada ubɔŋ isua itiaba ke Hebron; onyuŋ ada ubɔŋ isua edip ye duopeba ke Jerusalem.

¹²Ekem Solomon etie ke ebekpo David ete esie; ndien ubɔŋ esie ɔsɔŋ eti-eti.

¹³Ndien Adonijah eyen Haggith aka ke ɔtɔ Bathsheba eka Solomon. Ndien enye obup ete, Nte afo edi ye emem?

¹⁴Ndien enye ete, Ye emem. Enye onyuŋ ɔdɔhɔ ete, Mmenyene ikɔ kiet eke ndɔhɔde fi. Ndien enye (ŋwan) ete, Dɔhɔ.

¹⁵Ndien enye ete, Ŋkɔm afo ɔmɔfiɔk ete ke itie edidem ekenyene mi, ofuri Israel ekenyuŋ ewuk enyin ese mi, ete nda ubɔŋ: edi ubɔŋ ama akabare edi eke eyen-ete mi:

¹⁶koro Jehovah akadade enye ɔnɔ enye. Ndien ke emi mmebeŋe fi ŋkpɔ kiet, kusin mi. Ndien enye (ŋwan) ete enye, Siak.

¹⁷Ndien enye ɔdɔhɔ ete, Mbɔk, dɔhɔ Solomon edidem, ete ɔnɔ mi Abishag ŋwan-a-Shunem ndɔ:

¹⁸koro enye midisinke fi. Ndien Bathsheba ete, Ɔfɔn; nyeneme ye edidem mbaŋa fi.

¹⁹Ekem Bathsheba aka ke ɔtɔ edidem Solomon, ndineme nneme ye enye mbaŋa Adonijah. Ndien edidem adaha ke enyɔŋ aka okosobo ye enye, onyuŋ ɔnuhɔ ɔnɔ enye; ndien ɔsuhɔre etie ke ebekpo esie, onyuŋ ɔdɔhɔ ete, ediɔk ebekpo enɔ eka edidem; ndien enye ɔsuhɔre etie enye ke ubɔk nnasia.

²⁰Ndien enye (eka) ɔdɔhɔ ete, Ami ndi ndibeŋe fi ekpri ebeŋe kiet: kusin mi. Ndien edidem ɔbɔrɔ, enye ete, Beŋe, eka mi: koro mmendisinke fi.

²¹Ndien enye ɔdɔhɔ ete. Yak eda Abishag ŋwan-a-Shunem enɔ Adonijah eyen-usɔ ɔdɔ.

²²Ndien edidem Solomon ɔbɔrɔ eka esie, ete Nsinam ndien afo ebeŋede Abishag eyen-a-Shunem ɔnɔ Adonijah? Beŋe ubɔŋ nɔ enye ŋko: koro enye edide ebio-owo eyenete mi: beŋe nɔ enye, ye Abiathar oku, ye Joab eyen Zeruiah.

²³Ndien edidem Solomon otomo Jehovah, ete, Ntem ke Abasi edinam mi, ntem ke onyuŋ anam aka iso, Adonijah mikosuk idɔhɔke ikɔ emi ituk uwem esiemɔ.

²⁴Ndien ke emi, ma uwem Jehovah, emi akanamde mi nsɔŋɔ nda, onyuŋ emende mi odori ke ebekpo David ete mi, emi onyuŋ anamde ufɔk ɔnɔ mi, kpa nte enye ɔkɔdɔhɔde, Adonijah eyekpa mfin emi.

²⁵Ndien Solomon edidem ada ubɔk Benaiah eyen Jehoiada ɔdɔŋ ekekim enye ewot.

²⁶Ndien edidem ɔdɔhɔ Abiathar oku, ete, Nyɔŋ ka ke Anathoth ka iŋwaŋ fo; koro afo odotde mkpa: edi ŋwotke fi mfin emi, koro afo okobiomde ekebe Jehovah Ɔbɔŋ ebem David ete mi iso, koro afo okonyuŋ okutde ukut ke kpukpru se ete mi okokutde ukut ke esit.

²⁷Ntre ke Solomon osio Abiathar ke itie oku Jehovah; man enye anam uyo Jehovah oro Enye ɔkɔdɔhɔde abaŋa ufɔk Eli ke Shiloh, osu.

²⁸Ekem etop oro edisim Joab: koro Joab etienede Adonijah, edi iketieneke Absalom. Ndien Joab efehe aka ke efe Jehovah, okomum nduk itie-uwa.

²⁹Ndien mmɔ esian Solomon, ete, Joab emefehe aka ke efe Jehovah; ndien, sese, enye ke odu ke ŋkaŋ itie-uwa. Ndien Solomon ɔdɔŋ Benaiah eyen Jehoiada, ete, Ka kowot enye.

³⁰Ndien Benaiah aka ke efe Jehovah, ɔkɔdɔhɔ enye, ete, Ntem ke edidem ɔdɔhɔ ete, Wɔrɔ. Ndien enye ete, Ih ih: yak ŋkpa mi. Ndien Benaiah emen uyo oro eketiŋ ɔnɔ edidem, ete, Ntem ke Joab ɔkɔdɔhɔ, ntem ke enye okonyuŋ ɔbɔrɔ mi.

³¹Ndien edidem ɔdɔhɔ enye, ete, Nam nte enye ɔdɔhɔde, wot enye, nyuŋ buk enye; nyuŋ nam iyip oro Joab ɔkɔduɔkde ke ikpikpu akabare ɔkpɔŋ mi, ye ufɔk ete mi.

³²Ntem ke Jehovah anam iyip esie afiak odoro enye ke ibuot, koro enye okokpokde owo iba emi enende, enyuŋ efɔnde ekan enye, okonyuŋ owotde mmɔ ke ofut, ke ini David ete mi mifiɔkke, kpa Abner eyen Ner, etubom mbon-ekɔŋ Israel, ye Amasa eyen Jether, etubom mbon-ekɔŋ Judah.

³³Ntem ke iyip mmɔ edifiak odoro Joab ke ibuot, ye ke ibuot ubon esie ke nsinsi: edi David, ye ubon esie, ye ufɔk esie, ye ebekpo esie enyenyene ifure ke nsinsi oto Jehovah.

³⁴Ndien Benaiah eyen Jehoiada ɔdɔk aka okokpok enye owot: ndien enye ɔbuhɔ ke ufɔk esie ke wilderness.

³⁵Ndien edidem ada Benaiah eyen Jehoiada, onim ke etubom mbon-ekɔŋ ke itie esie: edidem onyuŋ ada Zadok onim ke oku ke itie Abiathar.

³⁶Ekem edidem ɔdɔŋ ekekot Shimei, onyuŋ ɔdɔhɔ enye, ete, Bɔp ufɔk nɔ idemfo ke Jerusalem, nyuŋ tie do, kunyuŋ uwɔrɔ uka ebiet ekededi.

³⁷Ama ekem ke usen eke afo ediwɔrɔde ebe idim Kedron, afo eyetim ɔfiɔk ete ke udutreke ndikpa: iyip fo eyedoro idemfo ke ibuot.

³⁸Ndien Shimei ɔdɔhɔ edidem, ete, Uyo oro ɔfɔn: owo fo eyenam kpa nte ɔbɔŋ mi edidem ɔdɔhɔde. Ntre ke Shimei oduŋ ke Jerusalem ediwak usen.

³⁹Edikem ke utit isua ita, ndien ifin Shimei iba efehe eka ebiet Achish eyen Maacah, ɔbɔŋ Gath: ndien etɔt Shimei, ete, Sese, ifin fo ke edu ke Gath.

⁴⁰Ndien Shimei adaha ke enyɔŋ ɔdiɔŋ ass esie, aka ke Gath ke ebiet Achish okoyom ifin esie: ntre ke Shimei aka akada ifin esie ke Gath edi.

⁴¹Ekem etiŋ enɔ Solomon, ete, Shimei ama okoto ke Jerusalem aka Gath, ndien ɔnyɔŋ edi.

⁴²Ndien edidem ɔdɔŋ ekekot Shimei edi, onyuŋ ɔdɔhɔ enye, ete, Nte ŋkanamke fi otomo Jehovah, ŋkonyuŋ ŋwukke fi, nte ke usen eke afo ediwɔrɔde aka ke ebiet ekededi, afo eyetim ɔfiɔk ete ke afo udutreke ndikpa. Nte afo ukonyuŋ udɔhɔke mi, ete, “Uyo emi ŋkopde ɔfɔn?”

⁴³Nsinam ndien mukonimke uŋwɔŋɔ Jehovah, ye ewuhɔ oro ŋkowukde fi?

⁴⁴Ndien edidem onyuŋ ɔdɔhɔ Shimei, ete, Afo ɔmɔfiɔk kpukpru mme idiɔk ido emi esit fo otimde obure, emi afo akanamde David ete mi: Jehovah omonyuŋ ada idiɔk ido fo odori fi ke ibuot.

⁴⁵Ndien eyefɔn ye Solomon edidem, ebekpo David eyenyuŋ ɔsɔŋ ada ke iso Jehovah ke nsinsi.

⁴⁶Ndien edidem eteme Benaiah eyen Jehoiada; ndien enye ɔwɔrɔ aka okokim enye owot. Ndien ubɔŋ ɔsɔŋ ada ke ubɔk Solomon.