Read efik 1 NDIDEM 22 Bible Online

1 NDIDEM 22 - efik bible

1 NDIDEM 22

¹NDIEN mmɔ etie ke isua ita; ekɔŋ iduhe ke ufɔt Syria ye nditɔ Israel.

²Edikem ke ɔyɔhɔ isua ita, Jehoshaphat edidem Judah ɔsuhɔre aka ke ebiet edidem Israel.

³Ndien edidem Israel ɔdɔhɔ ikɔt esiemɔ, ete, Nte mbuifo ifiɔkke ite ke Ramoth-gilead enyene nnyin, ndien nnyin idodop, ikaha ikada enye edidem Syria ke ubɔk?

⁴Ndien enye obup Jehoshaphat, ete, Nte afo onyime ndisaŋa ye ami, ŋka ekɔŋ ke Ramoth - gilead? Ndien Jehoshaphat ɔdɔhɔ edidem Israel, ete, Ami nnam nte afo anamde, ikɔt mi nte ikɔt fo, mme horse mi nte horse fo.

⁵Ndien Jehoshaphat ɔdɔhɔ edidem Israel, ete, Mbɔk, bup uyo Jehovah mfin emi.

⁶Ndien edidem Israel obon mme prophet, owo ikie inaŋ, ɔtɔ kiet, ndien obup mmɔ, ete, Nte ŋka ekɔŋ ke Ramoth-gilead, mme ŋkuka? Ndien mmɔ ebɔrɔ ete, Dɔk: ndien Ɔbɔŋ eyeda enye esin edidem ke ubɔk.

⁷Ndien Jehoshaphat ɔdɔhɔ ete, Nte prophet Jehovah eke nnyin ikpebupde enye, iduhe aba mi?

⁸Ndien edidem Israel ɔbɔrɔ Jehoshaphat, ete, Osuk kaŋa owo kiet, Micaiah eyen Imlah, emi nnyin ikemede ndida enye mbup Jehovah: edi ami mmasua enye: koro enye misitiŋke eti prophecy ibaŋa mi, ke mibɔhɔke idiɔk. Ndien Jehoshaphat ɔdɔhɔ, ete, Edidem okudɔhɔ ntre.

⁹Ekem edidem Israel okot adidaha kiet edi, onyuŋ ɔdɔhɔ enye, ete, Wara kada Micaiah eyen Imlah di.

¹⁰Ndien edidem Israel ye Jehoshaphat edidem Judah etie kiet kiet ke ebekpo mmɔ, esine edisine-ŋkpɔ ubɔŋ, ke ntaŋwaŋ ebiet ke inua-otop Samaria: ndien kpukpru prophet oro ke etetiŋ prophecy ke iso mmɔ.

¹¹Zedekiah eyen Chenaanah ama onyuŋ anam nduk ukwak ɔnɔ idem esie; ndien enye ɔdɔhɔ ete, Ntem ke Jehovah ɔdɔhɔ ete, Afo eyeda mme mmɔ emi onuk Syria tutu osobo mmɔ ama.

¹²Ndien kpukpru prophet oro etiŋ prophecy ntem, ete, Dɔk ka ke Ramoth-gilead, nyuŋ kut unen: koro Jehovah eyeda enye esin edidem ke ubɔk.

¹³Ndien isuŋutom oro akakade ndikot Micaiah edi, ɔdɔhɔ enye, ete, Mbɔk, sese, mme prophet eda inua kiet etiŋ nti ikɔ enɔ edidem: mbɔk, yak ikɔ fo edi nte ikɔ owo mmɔ kiet, nyuŋ tiŋ se ifɔnde.

¹⁴Ndien Micaiah ɔdɔhɔ ete, Ma uwem Jehovah, se Jehovah edidɔhɔde mi, oro ke nditiŋ.

¹⁵Ekem enye osim edidem Ndien edidem ɔdɔhɔ enye, ete, Micaiah, nte nnyin ika ekɔŋ ke Ramoth Gilead, mme itre ndika? Ndien enye ɔbɔrɔ enye, ete, Dɔk; nyuŋ kut unen: ndien Jehovah eyeda enye esin edidem ke ubɔk.

¹⁶Ndien edidem ɔdɔhɔ enye, ete, Adaŋa didie ke ami ndiwuk fi, nte okutiŋ ke mibɔhɔke akpanikɔ unɔ mi ke enyiŋ Jehovah?

¹⁷Ndien enye eken ɔdɔhɔ ete, Ŋkokut ofuri Israel, nte esuanade ke ikpɔ obot, nte erɔŋ eke minyeneke ekpeme: ndien Jehovah ɔdɔhɔ ete, Mme mmɔ emi inyeneke ɔbɔŋ: yak kpukpru mmɔ efiak ke ufɔk mmɔ ke ifure.

¹⁸Ndien edidem Israel ɔdɔhɔ Jehoshaphat, ete, Nte ŋkɔdɔhɔke fi, nte ke enye isitiŋke eti prophecy ibaŋa mi, edi idiɔk?

¹⁹Ndien enye ɔdɔhɔ ete, Kam kop ndien uyo Jehovah: ŋkokut Jehovah nte enye etiede ke ebekpo esie, kpukpru mme udim enyɔŋ enyuŋ ekpere enye eda ke nnasia ye ke ufien.

²⁰Ndien Jehovah ɔdɔhɔ enye ete, Anie editap Ahab, man enye ɔdɔk aka ɔkɔduɔ ke Ramoth-gilead? Ndien kiet ɔdɔhɔ ntem, kiet eken onyuŋ ɔdɔhɔ ntem.

²¹Ekem spirit kiet oto edida ke iso Jehovah, onyuŋ ɔdɔhɔ ete, Ami nyetap enye.

²²Ndien Jehovah obup enye, ete, Ke nso? Ndien enye ɔbɔrɔ ete, Nyewɔrɔ ŋkakabare ndi spirit nsu ke inua kpukpru prophet esie. Ndien enye ete, Afo eyetap, eyenyuŋ ekeme ŋko:

²³Wɔrɔ kanam ntre. Mmɔdo, sese, Jehovah emesin kpukpru mme prophet fo emi spirit nsu ke inua, Jehovah onyuŋ ɔdɔhɔ idiɔk abaŋa fi.

²⁴Edi Zedekiah eyen Chenaanah asaŋa ekpere okoyibi Micaiah ke mfuk, onyuŋ ɔdɔhɔ ete, Ke usuŋ ewe ke spirit Jehovah ɔkpɔŋ mi, ebe editiŋ ikɔ inɔ fi?

²⁵Ndien Micaiah ɔbɔrɔ ete, Sese, afo eyekut ke usen emi afo edidukde ke esit ubet okodibe.

²⁶Ndien edidem Israel ɔdɔhɔ ete, Mum Micaiah, da enye fiak kɔnɔ Amon etubom obio, ye Joash eyen edidem;

²⁷nyuŋ dɔhɔ ete, Ntem ke edidem ɔdɔhɔ ete, Mbufo esin owo emi ke ufɔk ukwak, enyuŋ eda uyo ukut, ye mmɔŋ ukut ebɔk enye, tutu ami ndi ke ifure.

²⁸Ndien Micaiah ɔdɔhɔ ete, Afo ama afiak ke ifure, Jehovah ikadaha inua mi itiŋ. Enye onyuŋ ɔdɔhɔ ete, Mbufo akpaimɔ ekop.

²⁹Ndien edidem Israel ye Jehoshaphat edidem Judah edɔk eka ke Ramoth-gilead.

³⁰Ndien edidem Israel ɔdɔhɔ Jehoshaphat, ete, Nyefuk idem mi nduk ke ekɔŋ; edi afo sine ɔfɔŋ-idem ubɔŋ fo. Ndien edidem Israel ofuk idem esie oduk ke ekɔŋ.

³¹Edi edidem Syria ama eketeme mme etubom mme chariot esie, owo edip ye duopeba, ete, Mbufo ekuŋwana ekɔŋ ye ekpri, ekunyuŋ ŋwana ye akamba, ke mibɔhɔke edidem Israel ikpɔŋ-ikpɔŋ

³²Edikem adaŋemi mme etubom mme chariot ekutde Jehoshaphat, mmɔ edɔhɔ ete, Ŋkɔm enye edi edidem Israel. Ndien mmɔ ewɔŋɔre eka ndiŋwana ye enye: ndien Jehoshaphat ofiori.

³³Edikem adaŋemi mme etubom mme chariot ekutde ete ke enye idige edidem Israel, mmɔ efiak edem etre ndibine enye.

³⁴Ekem owo kiet odudi utiga ikoho-koi, etiga edidem Israel ke ɔtɔ isobo ŋkpɔ ikpan-esit: ndien enye ɔdɔhɔ etubom chariot esie, ete, Kabare ubɔk fo, da mi wɔrɔ ke ekɔŋ; koro ndade unan.

³⁵Ndien ekɔŋ ɔdɔdiɔŋ ɔsɔŋ ubɔk ke usen oro: mmɔ enyuŋ emum edidem ekama ada ke chariot esie ke iso mme Syrian, ndien enye akpa ke mbubreyo: iyip onyuŋ ɔwɔrɔ ke unan ɔduɔ ke esit chariot.

³⁶Ekem ke ini usop-utin, mfiori asaŋa ke ufɔt nna, ete, Yak kpukpru owo enyɔŋɔ ke obio mmɔ ye edem mmɔ.

³⁷Ntre ke edidem akpa, ndien osim Samaria; ndien mmɔ ebuk edidem ke Samaria.

³⁸Ekem owo eyet chariot oro ke mkpɔdiɔhɔ-mmɔŋ samaria; ndien mme ebua edei iyip esie; mmɔ enyuŋ eyet ŋkpɔ-ekɔŋ esie; ke uyo Jehovah oro enye ɔkɔdɔhɔde.

³⁹Ndien ama edi ikɔ Ahab eke esuhɔde, ye kpukpru se enye akanamde, ye ufɔk oduk-enin emi enye ɔkɔbɔpde, ye kpukpru obio oro enye ɔkɔbɔpde, nte ikewetke mmɔ isin ke ŋwed ikɔ eyo edidem Israel?

⁴⁰Ntem ke Ahab ɔsuhɔre ana ye mme ete esie ede; ndien Ahaziah eyen esie ada ubɔŋ ke itie esie.

⁴¹Ndien Jehoshaphat eyen Asa ada ubɔŋ Judah, ke ɔyɔhɔ isua Ahab edidem Israel inaŋ.

⁴²Jehoshaphat osim isua edip ye efut ke ini enye adade ubɔŋ; ndien enye edi edidem ke Jerusalem ke isua edip ye ition. Enyiŋ eka esie ŋko onyuŋ ekere Azubah eyen Shilhi.

⁴³Enye onyuŋ asaŋa ke kpukpru usuŋ Asa ete esie; ikabakede ikpɔŋ enye, edi anam se inende ke iso Jehovah: edi isioho mme edikoŋ ebiet ifep; mbio-obio esuk ewa uwa, enyuŋ efɔp incense ke mme edikoŋ ebiet.

⁴⁴Jehoshaphat onyuŋ etie ke emem ye edidem Israel.

⁴⁵Ndien ama edi ikɔ Jehoshaphat eke esuhɔde, ye uko esie emi enye akanamde, ye nte enye ŋwanade ekɔŋ, nte ikewetke mmɔ isin ke ŋwed ikɔ eyo ndidem Judah?

⁴⁶Enye onyuŋ ɔkpɔri mbon-use-sodom eke esuhɔde, eke ekekpɔŋde ke eyo Asa ete esie, ke isɔŋ efep.

⁴⁷Edidem inyuŋ iduhe ke Edom: adidaha owo kiet edi edidem.

⁴⁸Jehoshaphat ɔkɔŋ ubom mbakara: ete eka ke Ophir ndida gold ndi: edi mmɔ ikaha ka; koro mme ubom oro ebomode ke Ezion-geber.

⁴⁹Ahaziah eyen Ahab onyuŋ ɔdɔhɔ Jehoshaphat, ete, Yak ikɔt mi etiene ikɔt fo eka ke ubom oro. Edi Jehoshaphat inyimeke.

⁵⁰Ekem Jehoshaphat ɔsuhɔre ana ye mme ete esie ede, onyuŋ ɔbuhɔ ye mme ete esie ke obio David ete esie: ndien Jehoram eyen esie ada ubɔŋ ke itie esie.

⁵¹Ahaziah eyen Ahab ada ubɔŋ ke Samaria ke ɔyɔhɔ isua Jehoshaphat edidem Judah efureba, onyuŋ edi edidem Israel ke isua iba.

⁵²Enye ŋko onyuŋ anam idiɔk ke iso Jehovah, onyuŋ asaŋa ke usuŋ ete esie, ye ke usuŋ eka esie, ye ke usuŋ Jeroboam eyen Nebat, emi akanamde Israel ediɔk.

⁵³Enye onyuŋ anam ŋkpɔ Baal, onyuŋ atuak ibuot ɔnɔ enye, ndien ayat Jehovah Abasi Israel esit, kpasuk nte ete esie akanamde kpukpru ŋkpɔ.