Read efik 1 NDIDEM 3 Bible Online

1 NDIDEM 3 - efik bible

1 NDIDEM 3

¹EKEM Solomon okoro ukot ye Pharaoh edidem Egypt, onyuŋ ada eyen Pharaoh ɔdɔ, ada enye edi ke obio David, tutu enye edibɔp ufɔk esiemɔ, ye ufɔk Jehovah, ye ibibene Jerusalem akan okuk.

²Edi mbio-obio ekewa uwa ke edikoŋ ebiet: koro mika ibɔpke ufɔk inɔ enyiŋ Jehovah,tutu osim ke usen oro.

³Ndien Solomon ama Jehovah, ke asaŋa ke item David ete esie: edi enye awa uwa, onyuŋ ɔfɔp incense, ke edikoŋ ebiet.

⁴Ekem edidem aka ke Gibeon akawa uwa do: koro enye oro edide akamba edikoŋ ebiet: Solomon akawa tɔsin edifɔp uwa ke itie uwa oro.

⁵Ekem Jehovah okowut Solomon idem ke Gibeon, ke ndap ke okoneyo: Abasi onyuŋ ɔdɔhɔ, ete, Beŋe se ndinɔde fi.

⁶Ndien Solomon ɔdɔhɔ ete, Afo ɔmɔfɔn ye owo fo David ete mi akamba mfɔn, kpa nte enye akasaŋade ke iso fo ke akpanikɔ, ye ke eti ido, ye ke esit emi enende ye afo; afo ama onyuŋ onim akamba mfɔn emi ɔnɔ enye, ama onyuŋ ɔnɔ enye eyen eke etiede ke ebekpo esie, kpa nte edide mfin emi.

⁷Ndien ke emi O Jehovah Abasi mi, afo omonim owo fo ke edidem ke itie David ete mi; ndien ami ndi ata eyenɔwɔŋ: mfiɔkke ndiwɔrɔ nnyuŋ nduk.

⁸Owo fo onyuŋ odu ke otu ikɔt fo emi afo ekemekde, kpa ekese owo, emi uwak mmɔ miyakke owo odomo,

⁹onyuŋ abat. Nɔ owo fo ndien esit ɔniɔŋ, man ŋkpe ikpe ikɔt fo, man ntim mfiɔk eti ye idiɔk: koro anie ekeme ndikpe akwa ikɔt fo emi?

¹⁰Ndien uyo oro enem Ɔbɔŋ, koro Solomon ekebeŋede oruk ŋkpɔ emi.

¹¹Ndien Abasi ɔdɔhɔ enye, ete, Koro afo ekebeŋede ŋkpɔ emi, mukonyuŋ ubeŋeke ediwak usen ke idemfo: mukonyuŋ ubeŋeke inyene ke idemfo; mukonyuŋ ubeŋeke uwem mme asua fo; edi ama ebeŋe ke idemfo, ete afo ɔfiɔk nditim ŋkpe ikpe;

¹²sese, mmanam ke uyo fo: sese, mmɔnɔ fi esit ifiɔk ye ɔniɔŋ; ndien baba owo kiet eke ebietde fi idinyuŋ itieneke fi edem idaha ida.

¹³Ndien ŋko-ŋko, mmonyuŋ nnɔ fi inyene ye ubɔŋ, emi afo mukebeŋeke: ndien baba owo kiet ke otu ndidem idibietke fi ke ofuri uwem fo.

¹⁴Ndien edieke afo edisaŋade ke usuŋ mi, onyuŋ onim mme ewuhɔ mi ye mbet mi, kpa nte David usɔ akasaŋade, nyenam mme usen fo ebigi.

¹⁵Ndien Solomon edemere; ndien, sese, ndap ke edi. Ndien enye edi ke Jerusalem, edida ke iso ekebe ediomi Jehovah, onyuŋ etem akamba udia ɔnɔ kpukpru ikɔt esie.

¹⁶Ekem ndien mme akpara-iban iba editiene edidem, enyuŋ eda enye ke iso.

¹⁷Ndien ŋwan kiet ɔdɔhɔ ete, Mbɔk, ɔbɔŋ mi, ami ye ŋwan emi iduŋ ufɔk kiet, ndien mman eyen ye enye ke ufɔk.

¹⁸Edikem ke ɔyɔhɔ usen ita nte ami ŋkaman, ŋwan emi onyuŋ aman ŋko: ndien nnyin iduŋ nnyin nnyin; esen owo ndomo kiet ikoduhe ye nnyin ke ufɔk ibɔhɔke nnyin owo mbiba ke ufɔk.

¹⁹Ekem eyen aŋwan emi akpa ke okoneyo: koro enye okofukde enye.

²⁰Ndien enye edemere ke ufɔt okoneyo, emen eyen mi ke ŋkaŋ mi efep, ke ini ofin aŋwan fo edede idap, ada onim ke ikpanesit esiemɔ, onyuŋ emen eyen esiemɔ emi akpade, onim mi ke ikpanesit.

²¹Ekem ke usenubɔk, ndemere nte nnɔ eyen mi eba, ndien, sese, eyen amakpa: edi ke ini ntimde nse enye ke usenubɔk, sese, ke idigedi eyen mi emi ŋkamande.

²²Ndien ŋwan eken ɔdɔhɔ, ete, Idige ntre; edi odu-uwem edi eyen mi, akpam-mkpa onyuŋ edi eyen fo. Ndien emi onyuŋ ɔdɔhɔ ete, Idige ntre; edi akpa-mkpa edi eyen fo, ndien odu-uwem edi eyen mi. Ntem ke mmɔ edɔhɔ ke iso edidem.

²³Ndien edidem ɔdɔhɔ ete, Ŋwan emi ke ɔdɔhɔ ete, Odu-uwem emi edi eyen mi, akpa-mkpa onyuŋ edi eyen fo. Enye eken onyuŋ ɔdɔhɔ ete, Idige ntre; edi akpa mkpa edi eyen fo, ndien odu uwem edi eyen mi.

²⁴Ndien edidem ɔdɔhɔ ete, Mbufo eda ofut esɔk mi. Ndien mmɔ eda ofut edi ke iso edidem.

²⁵Ndien edidem ɔdɔhɔ ete, Mbufo ebahare odu-uwem eyen ke mbak iba, enyuŋ enɔ kiet ubak, enɔ enye eken ubak ŋko.

²⁶Ndien ŋwan emi odu-uwem eyen edide esie, ɔdɔhɔ edidem, koro itɔŋ eyen esie ɔdɔŋde enye, ete, Mbɔk, ɔbɔŋ mi, mbufo enɔ enye odu-uwem eyen, kuwot enye baba; edi enye eken ɔdɔhɔ ete, Okunyene mi, okunyuŋ enyene fi: mbufo ebahare.

²⁷Ndien edidem ɔbɔrɔ, onyuŋ ɔdɔhɔ ete, Mbufo enɔ enye oro odu-uwem eyen, ekunyuŋ ewot enye baba: enye oro edi eka esie.

²⁸Ekem ofuri Israel ekop ikpe oro edidem ekekpede; ndien mmɔ eteŋe edidem; koro ekutde ete ke ifiɔk Abasi odu enye ke esit, ke erikpe ikpe.