Read efik 1 NDIDEM 9 Bible Online

1 NDIDEM 9 - efik bible

1 NDIDEM 9

¹EDIKEM adaŋemi Solomon ɔkɔbɔpde ufɔk Jehovah, ye ufɔk edidem, ye kpukpru se itɔŋ ɔdɔŋde Solomon ndinam,

²ndien Jehovah ɔtɔŋɔ ntak owut Solomon idem, kpa nte okowutde enye ke Gibeon.

³Ndien Jehovah ɔdɔhɔ enye, ete, Mmokop akam fo, ye mkpe-ubɔk fo oro afo akanamde ke iso mi: mmonim ufɔk emi afo ɔkɔbɔpde, ke edisana, man nnim enyiŋ mi do ke nsinsi: ndien enyin mi ye esit mi eyedu do kpukpru ini.

⁴Ndien afo ama asaŋa ke iso mi, kpa nte David usɔ akasaŋade, ke ofuri esit nte enende, anam kpukpru se ntemede fi, ama onyuŋ onim mme ewuhɔ mi ye mme item mi:

⁵ndien nyenam ebekpo ubɔŋ fo ɔsɔŋ ada ke Israel ke nsinsi, kpa nte ŋkɔdɔhɔde David usɔ, nte, Owo idinanake fi ke ebekpo Israel.

⁶Edi edieke mbufo ye nditɔ mbufo edifiakde edem, enyuŋ etre nditiene mi, minyuŋ inimke mbet mi, ye mme ewuhɔ mi, emi ŋkonimde ke iso mbufo, edi ema eka ekenam ŋkpɔ mme abasi efen, enyuŋ etuak ibuot enɔ mmɔ:

⁷ndien nyesibe Israel mfep ke iso isɔŋ emi ŋkɔnɔde mmɔ; ndien ama edi ufɔk emi ŋkonimde nnɔ enyiŋ mi, nyemen enye ke iso mi mfep nduɔk; ndien Israel eyedi ŋkpɔ ikwɔ ye ufiet ke otu kpukpru owo;

⁸ndien ufɔk emi eyedi edikoŋ: kpukpru owo eke edibede eyeyik, enyuŋ esi; ndien mmɔ eyedɔhɔ, ete, Nsinam Jehovah akanamde isɔŋ emi, ye ufɔk emi ntem?

⁹Ndien mmɔ eyebɔrɔ ete, Koro mmɔ ekekpɔŋde Jehovah Abasi mmɔ, emi okosiode mme ete mmɔ ke isɔŋ Egypt, ndien eka ekemum mme abasi efen ekama, enyuŋ etuak ibuot enɔ mmɔ, enyuŋ enam ŋkpɔ enɔ mmɔ: mmɔdo Jehovah kadade ofuri idiɔk-ŋkpɔ emi etiene mmɔ.

¹⁰Edikem ke utit isua edip nte Solomon ɔkɔbɔp ufɔk mbiba oro, ufɔk Jehovah, ye ufɔk edidem,

¹¹(Hiram edidem Tyre ekedi andiŋwam Solomon ke eto cedar, ye ke eto cypress, ye ke gold, kpa nte enye oyomde kpukpru), ndien edidem Solomon ɔnɔ Hiram obio edip ke isɔŋ Galilee.

¹²Ndien Hiram oto ke Tyre aka ekese obio oro Solomon ɔkɔnɔde enye, ndien mmɔ inemke enye.

¹³Ndien enye ɔdɔhɔ ete, Nso oruk obio edi emi afo ɔnɔde mi, eyen-ete mi? Ndien enye osio mmɔ enyiŋ isɔŋ Cabul, tutu osim mfin emi.

¹⁴Ndien Hiram ɔkɔnɔ gold talent ikie ye edip esɔk edidem.

¹⁵Emi ŋko onyuŋ edi ikɔ mbon-utom oro edidem Solomon ɔkɔbɔde ndibɔp ufɔk Jehovah, ye ufɔk esiemɔ, ye Millo, ye ibibene Jerusalem, ye Hazor, ye Megiddo ye Gezer.

¹⁶Pharaoh edidem Egypt ɔdɔk aka akada Gezer, onyuŋ ɔfɔp enye ke ikaŋ, onyuŋ owot mme Canaanite emi eduŋde ke obio oro, ndien emen enye ɔnɔ eyen esie, ŋwan Solomon, ke ŋkpɔ ndɔ,

¹⁷Ndien Solomon ɔdiɔŋ Gezer, ye Beth-horon ke usuhɔre, ye Baalath,

¹⁸ye Tadmor ke wilderness, ke isɔŋ,

¹⁹ye kpukpru obio unim-ŋkpɔ oro Solomon enyenede, mme obio chariot, ye mme obio mbon horse, ye kpukpru se itɔŋ ɔdɔŋde Solomon ndibɔp ke Jerusalem, ye ke Lebanon, ye ke ofuri isɔŋ emi enye akarade.

²⁰Kpukpru mme Amorite, ye mme Hittite, ye mme Perizzite, ye mme Hivite, ye mme Jebusite, emi esuhɔde, emi midige nditɔ Israel,

²¹kpa nditɔ mmɔ eke ekesuhɔde mmɔ ke edem ke isɔŋ, eke nditɔ Israel mikekemeke ndisobo, mmɔ ke Solomon okonim ke mbon-utom, tutu osim mfin emi.

²²Edi Solomon inimke nditɔ Israel baba ke ifin: edi mmɔ edi mbonekɔŋ, ye mme asaŋutom esie, ye ikpɔ owo esie, ye mme etubom esie, ye mme etubom mme chariot esie, ye mbon horse esie.

²³Mme mmɔ emi edi mme etubom mme adidaha emi esede utom Solomon, owo ikie ition ye aba ye duop, emi edide mme etubom mbon emi enamde utom.

²⁴Edi eyen Pharaoh aŋwan oto ke obio David ɔdɔk ke ufɔk esie emi enye (Solomon) ɔkɔbɔpde ɔnɔ enye. Ndien enye ɔbɔp Millo ŋko.

²⁵Ndien Solomon awa edifɔp uwa emem ke itie-uwa emi enye akanamde ɔnɔ Jehovah, utim ikata ke isua, onyuŋ ɔfɔp incense ke itie-ufɔp emi odude ke iso Jehovah. Ntem ke enye ama ufɔk.

²⁶Edikem Solomon onyuŋ anam ubom-mbakara ke Ezion-geber, emi ekperede Eloth, ke mben Ididuot Inyaŋ, ke isɔŋ Edom.

²⁷Ndien Hiram ada ikɔt esie eke edide mbon-ubom, enyuŋ efiɔkde inyaŋ, ɔdɔŋ mmɔ etiene ikɔt Solomon ke mme ubom-mbakara oro.

²⁸Ndien mmɔ ema ke Ophir, ekeda talent gold ikie inaŋ ye edip do, edisɔk edidem Solomon.