Read efik 2 NDIDEM 11 Bible Online

2 NDIDEM 11 - efik bible

2 NDIDEM 11

¹EKEM ke ini Athaliah, eka Ahaziah, okutde ete ke eyen imɔ amakpa, enye adaha ke enyɔŋ osobo ofuri ubon edidem.

²Edi Jehosheba eyen edidem Joram aŋwan, eyen-ete Ahaziah aŋwan, ada Joash eyen Ahaziah, oyip enye efep ke otu nditɔ edidem oro mmɔ eyomde ndiwot, kpa enye ye edep esie, oduk ke ubet mkpana; ntre ke eda enye edip Athaliah; ndien iwotke enye.

³Ntre ke eyen odu ye enye ke ufɔk Jehovah, odibe ke isua itiokiet. Ndien Athaliah ada ubɔŋ obio.

⁴Ekem ke ɔyɔhɔ isua itiaba, Jehoiada ɔdɔŋ ekeda mme etubom mme ikie, kpa eke mbon mme Carite, ye mbon-itɔk edi, ndien enye ada mmɔ oduk ke ufɔk Jehovah, adian idem, onyuŋ odiomi ediomi ye mmɔ, onyuŋ anam mmɔ eŋwɔŋɔ ke ufɔk Jehovah, onyuŋ owut mmɔ eyen edidem.

⁵Enye onyuŋ eteme mmɔ, ete, Emi edi se mbufo edinamde; yak ɔyɔhɔ ubak mbufo ita emi edukde ke sabbath, ekpeme ufɔk edidem;

⁶ɔyɔhɔ ubak ita ŋko etie ke inua-otop Sur; ɔyɔhɔ ubak ita enyuŋ etie ke inua-otop ke edem mbon-itɔk; ntem ke mbufo edikpeme ufɔk, man ebin owo efep.

⁷Ndien mbak mbufo iba, kpa kpukpru owo eke ewɔŋɔde ke sabbath, edikpeme ufɔk Jehovah ekpere edidem.

⁸Kpukpru mbufo enyuŋ ekama ŋkpɔ ekɔŋ mbufo ke ubɔk, ekan edidem ekuk: ndien owo eke odukde ke otu udim edikpa: mbufo enyuŋ etiene edidem ke ini enye ɔwɔrɔde, onyuŋ odukde.

⁹Ndien mme etubom mme ikie enam kpukpru se Jehoiada oku eketemede. Kpukpru mmɔ eda ikɔt mmɔ eke edukde ke sabbath, ye mmɔ eke ewɔrɔde ke sabbath, enyuŋ eda ke ɔtɔ Jehoiada oku.

¹⁰Ndien oku ada eduat ye otu-ekɔŋ oro ekenyenede edidem David, emi edude ke ufɔk Jehovah, ɔnɔ mme etubom mme ikie.

¹¹Ndien kpukpru mbon-itɔk eda ye ŋkpɔ-ekɔŋ mmɔ ke ubɔk, ɔtɔŋɔde ke ŋkaŋ ufɔk nnasia, tutu osim ke ŋkaŋ ufɔk ufien, ekpere itie-uwa ye ufɔk,

¹²ekan edidem ekuk. Ndien enye ada eyen edidem ɔwɔrɔ, onyuŋ ayara enye anyanya ke ibuot, onyuŋ ɔnɔ enye ŋwed-ibet; ntre ke mmɔ enim enye ke edidem, enyuŋ eyet enye aran; ndien mmɔ ekwak ubɔk, ete, Yak edidem odu uwem.

¹³Ekem adaŋemi Athaliah okopde uyo mbon-itɔk, ye eke mbio eken, enye etiene mmɔ ke ufɔk Jehovah.

¹⁴Ndien ke ini enye okutde, sese, edidem ke ada adiana adaha, nte akam esinamde, mme etubom, ye mme andifuri ukorowo enyuŋ ekpere edidem; kpukpru mbio-obio enyuŋ edara, enyuŋ efuri ukorowo. Ndien Athaliah asiak ɔfɔŋ-idem esie, onyuŋ ofiori ete, Odu! Odu!

¹⁵Ndien Jehoiada oku eteme mme etubom mme ikie, kpa mme adidaha udim-ekɔŋ, onyuŋ ɔdɔhɔ mmɔ, ete, Mbufo esio enye ke otu mme udim efep: enyuŋ eda ofut ewot mmɔ eke etienede enye ke edem: koro oku ɔkɔdɔhɔde ete, Ekuwot enye ke ufɔk Jehovah.

¹⁶Ndien mmɔ enɔ enye ufaŋ; ndien enye aka ke usuŋ oro mme horse ekade ke ufɔk edidem: ndien mmɔ ewot enye do.

¹⁷Ndien Jehoiada anam ediomi ke ufɔt Jehovah ye edidem, ye mbio-obio ete mmɔ edi ikɔt Jehovah; enye onyuŋ anam ediomi ŋko ke ufɔt edidem ye mbio-obio.

¹⁸Ekem kpukpru mbio-obio eka ke ufɔk Baal, ekewuri enye; mmɔ etim ebom mme itie-uwa esie ye mbiet esie, enyuŋ ewot Mattan oku Baal ke iso mme itie-uwa esie.

¹⁹Ndien oku odori ndidaha, ete ese ufɔk Jehovah. Ekem enye ada mme etubom mme ikie, ye mme Carite, ye mbon-itɔk, ye kpukpru mbio-obio edi: ndien mmɔ esio edidem ke ufɔk Jehovah esuhɔre, enyuŋ esaŋa ke usuŋ inua-otop mbon-itɔk, eka ke ufɔk edidem.

²⁰Ntre ke enye ɔsuhɔre etie ke ebekpo ndidem. Kpukpru mbio-obio enyuŋ edat esit, obio onyuŋ ana suŋ. Ntre ke mmɔ ewot Athaliah ke ofut, ke edem ufɔk edidem.

²¹Jehoash ekedi owo isua itiaba kini enye ɔtɔŋɔde ndikara nte edidem.