Read efik 2 NDIDEM 13 Bible Online

2 NDIDEM 13 - efik bible

2 NDIDEM 13

¹KE ɔyɔhɔ isua Joash eyen Ahaziah edidem Judah edip ye ita, Jehoahaz, eyen Jehu, ada ubɔŋ Israel ke Samaria ke isua efureba.

²Enye ŋko onyuŋ anam idiɔk ke iso Jehovah, onyuŋ etiene idiɔk ido Jeroboam, eyen Nebat, emi akanamde Israel ediɔk; ikabakede ikpɔŋ enye.

³Ndien Jehovah ayat esit ye Israel, onyuŋ ada mmɔ esin ke ubɔk Hazael edidem Syria, ye ke ubɔk Benhadad eyen Hazael, kpukpru ini.

⁴Ekem Jehoahaz ekpe Jehovah ubɔk, ndien Jehovah okop uyo esie; koro enye okutde ufik Israel; koro edidem Syria efikde mmɔ.

⁵(Ndien Jehovah ɔnɔ Israel andinyaŋa, ndien mmɔ ewɔŋɔ ke idak ubɔk Syria: nditɔ Israel enyuŋ eduŋ ke tent mmɔ, nte akpa.

⁶Edi mmɔ ikabakede ikpɔŋ mme idiɔk ido ufɔk Jeroboam, emi akanamde Israel ekabare ediɔk, edi esaŋa ke esit: eto-mkpe onyuŋ osuk ada ke Samaria.)

⁷Koro enye mikɔkpɔŋke owo inɔ Jehoahaz, ke mibɔhɔke mbon horse aba ye duop, ye chariot duop, ye tɔsin mbon-ekɔŋ duop: koro edidem Syria okosobode mmɔ, okonyuŋ anuakde mmɔ onim nte ntɔŋ.

⁸Ndien ama edi ikɔ Jehoahaz emi esuhɔde, ye kpukpru se enye akanamde, ye uko esie, nte ikewetke mmɔ isin ke ŋwed ikɔ eyo ndidem Israel?

⁹Ekem Jehoahaz ɔsuhɔre ana ye mme ete esie ede: ndien mmɔ ebuk enye ke Samaria: ndien Joash eyen esie ada ubɔŋ ke itie esie.

¹⁰Ke ɔyɔhɔ isua Joash edidem Judah edip ye efureba, Jehoash, eyen Jehoahaz, ada ubɔŋ Israel ke Samaria ke isua efurekiet.

¹¹Enye ŋko onyuŋ anam idiɔk ke iso Jehovah; enye ikabakede ikpɔŋ kpukpru mme idiɔk ido Jeroboam, eyen Nebat, emi akanamde Israel ediɔk: edi asaŋa ke esit.

¹²Ndien ama edi ikɔ Joash emi esuhɔde, ye kpukpru se enye akanamde, ye uko esie emi enye akadade aŋwana ekɔŋ ye Amaziah edidem Judah, nte ikewetke mmɔ ke ŋwed ikɔ eyo ndidem Israel?

¹³Ekem Joash ɔsuhɔre ana ye mme ete esie ede; ndien Jeroboam etie ke ebekpo esie: Joash onyuŋ ɔbuhɔ ke Samaria ye ndidem Israel.

¹⁴Ekem Elisha ɔdɔŋɔ udɔŋɔ esie oro enye akpade ke esit. Ndien Joash edidem Isreal ɔsuhɔre aka ke ɔtɔ esie, akatua enye eyet ke iso, onyuŋ ɔdɔhɔ ete, O ete mi, ete mi, chariot Israel, ye mbon horse esie!

¹⁵Ndien Elisha ɔdɔhɔ enye, ete, Da utiga ye idaŋ. Ndien enye ada utiga ye idaŋ ke idem esie.

¹⁶Ndien enye ɔdɔhɔ edidem Israel, ete, Sin ubɔk fo ke utiga. Ndien enye esin ubɔk esiemɔ. Elisha onyuŋ ada ubɔk esie odori edidem ke ubɔk.

¹⁷Ndien enye ete, Berere window ke edem usiaha-utin. Ndien edidem eberere. Ndien Elisha ɔdɔhɔ ete, Top. Ndien enye otop. Ndien enye ɔdɔhɔ ete, Idaŋ erinyaŋa Jehovah, ye idaŋ emi edinyaŋade osio ke ubɔk Syria: koro afo eyesuan mme Syrian ke Aphek, tutu ama mmɔ.

¹⁸Ndien Elisha ɔdɔhɔ enye ete, Men idaŋ: ndien enye emen. Enye onyuŋ ɔdɔhɔ edidem Israel, ete, Tiga isɔŋ. Ndien enye atiga utim ikata, ndien odop.

¹⁹Ndien owo Abasi ayat esit ye enye, onyuŋ ɔdɔhɔ ete, Afo ekpetiga utim ikotion mme ikotiokiet: ndien afo akpasuan Syria tutu ama mmɔ: edi ke emi eyesuan Syria utim ikata kpɔt.

²⁰Ekem Elisha akpa, ndien ebuk enye. Mme udim-ekɔŋ Moab enyuŋ eduk ke isɔŋ ke ukabare isua.

²¹Edikem ke ini mmɔ ebukde owo kiet, sese, mmɔ ekut udim owo; ndien mmɔ etop owo oro esin ke udi Elisha: ndien ke ini owo oro osimde mme ɔkpɔ Elisha, onyuŋ otukde mmɔ, enye eset, onyuŋ adaha ada ke ukot esie.

²²Hazael edidem Syria ŋko onyuŋ efik Israel ke ofuri eyo Jehoahaz.

²³Ndien Jehovah ɔfɔn mfɔn ye mmɔ, onyuŋ atua mmɔ mbɔm, onyuŋ akabare ese mmɔ, abaŋa ediomi esie ye Abraham, ye Isaac, ye Jacob, inyuŋ inyimeke ndisobo mmɔ, inyuŋ imenke mmɔ kaŋa ke iso esie iduɔk.

²⁴Ekem Hazael edidem Syria akpa; ndien Benhadad eyen esie ada ubɔŋ ke itie esie.

²⁵Ndien Jehoash, eyen Jehoahaz, ɔtɔŋɔ ntak ɔbɔ Ben-hadad, eyen Hazael, mme obio oro enye ɔkɔbɔde Jehoahaz ete esie ke ubɔk ke ekɔŋ. Joash akan enye utim ikata, onyuŋ ɔbɔ mme obio Israel.