Read efik 2 NDIDEM 3 Bible Online

2 NDIDEM 3 - efik bible

2 NDIDEM 3

¹NDIEN Jehoram eyen Ahab ada ubɔŋ Israel ke Samaria, ke ɔyɔhɔ isua Jehoshaphat edidem Judah efureta, onyuŋ edi edidem ke isua duopeba.

²Ndien enye anam idiɔk ke iso Jehovah; edi inamke nte ete esie ye eka esie: enye onyuŋ emen adaha Baal oro ete esie akanamde, efep.

³Edi enye ɔkɔbɔ ke idiɔk ido Jeroboam eyen Nebat, emi akanamde Israel ediɔk; inyuŋ ikpɔŋke oro.

⁴Ndien Mesha edidem Moab edi andinyene ufene, onyuŋ otomo edidem Israel tɔsin nditɔ-erɔŋ itie ikie, ye tɔsin okukim itie ikie, kpa idet mmɔ,

⁵Edikem, adaŋemi Ahab ama akakpa, edidem Moab ɔsɔŋ ibuot ye edidem Israel.

⁶Ndien ke ini oro edidem Jehoram oto ke Samaria, aka akabat ofuri Israel.

⁷Enye onyuŋ aka ɔkɔdɔŋ ekedɔhɔ Jehoshaphat edidem Judah ete, Edidem Moab ke ɔsɔŋ ibuot ye ami: nte afo edisaŋa ye ami, ikeŋwana ekɔŋ ye Moab? Ndien enye ete, Nyeka: ami ndi nte afo, ikɔt mi nte ikɔt fo, ye mme horse mi nte mme horse fo.

⁸Ndien enye obup ete, Ewe usuŋ ke nnyin idika? Ndien enye ɔdɔhɔ ete, Usuŋ wilderness Edom.

⁹Ndien edidem Israel, ye edidem Judah, ye edidem Edom, eka ekekan ŋkani ke usen itiaba; ekem mmɔŋ eke udim, ye ufene oro esaŋade ye mmɔ, ekpeŋwɔŋde iduhe.

¹⁰Ndien edidem Israel ɔdɔhɔ ete, Ahab! emi Jehovah okotde ndidem ita emi edi, ete ida mmɔ isin Moab ke ubɔk.

¹¹Ndien Jehoshaphat ɔdɔhɔ ete, Nte prophet Jehovah eke nnyin ikpedade ibup Jehovah, iduhe mi? Ndien owo ikɔt edidem Israel kiet ɔbɔrɔ ete, Elisha eyen Shaphat, emi ɔkɔtɔhɔde Elijah mmɔŋ ke ubɔk, odu mi.

¹²Ndien Jehoshaphat ɔdɔhɔ ete, ikɔ Jehovah odu ye enye. Ekem edidem Israel, ye Jehoshaphat, ye edidem Edom, esuhɔre eka ke ɔtɔ esie.

¹³Ndien Elisha ɔdɔhɔ edidem Israel, ete, Nsaŋa nso ye afo? Tiene mme prophet usɔ, ye mme prophet uka. Ndien edidem Israel ɔdɔhɔ enye, ete, Ih ih: koro Jehovah ama okot ndidem ita emi edi, ete ida mmɔ isin ke ubɔk Moab.

¹⁴Ndien Elisha ɔdɔhɔ ete, Ma uwem Jehovah mme udim emi ndade enye ke iso, ke ami ŋkpeteŋeke iso Jehoshaphat edidem Judah, ŋkpakabakede iso nse fi.

¹⁵Mbufo eda ndien ebre harp esɔk mi. Ndien edikem adaŋemi ebre-harp ebrede, ubɔk Jehovah edidoro enye ke idem.

¹⁶Ekem, enye ɔdɔhɔ ete, Ntem ke Jehovah ɔdɔhɔ, ete, Mbufo etibi ebedeŋ emi esin ukpe, ukpe.

¹⁷Koro ntem ke Jehovah ɔdɔhɔ ete, Mbufo idikwe ofum, idinyuŋ ikwe edim: edi mmɔŋ eyeyɔhɔ ke ebedeŋ emi, ndien mbufo eyeŋwɔŋ, ye ufene mbufo, ye mme unam mbiomo.

¹⁸Jehovah onyuŋ abat emi ke ekpri ŋkpɔ: enye eyenyuŋ ada Moab esin mbufo ke ubɔk.

¹⁹Ndien mbufo eyesuan kpukpru obio ibibene, ye kpukpru obio eke eyede, enyuŋ eduɔk kpukpru nti eto, enyuŋ esiri kpukpru obube mmɔŋ, enyuŋ eda itiat ebiat kpukpru nti iŋwaŋ.

²⁰Edikem ke usenubɔk ke ini ewade inuak-udia, sese, mmɔŋ oto ke usuŋ Edom edi, mmɔŋ oro onyuŋ ɔyɔhɔ ke isɔŋ.

²¹Ndien adaŋemi ofuri Moab ekopde, ete ke ndidem oro ekedɔk ndiŋwana ye mmimɔ, mmɔ ewuk kpukpru owo eke ebɔbɔde mbɔbɔ, ye mmɔ eke ebede oro, ete ebono, ndien mmɔ eda ke adaŋa.

²²Ekem mmɔ ebak ke usenubɔk edemere, ndien adaŋemi utin ayamade ke mmɔŋ oro, Moab ekut mmɔŋ nsan-nsan nte oyibede nte iyip.

²³Ndien mmɔ edɔhɔ ete, Emi edi iyip: ndidem oro emesobo, kiet omowot kiet: mbufo Moab eda mbume, ndien.

²⁴Ekem ke ini mmɔ esimde nna Israel, Israel edaha ke enyɔŋ ewot Moab, ndien mmɔ efeŋe ke iso mmɔ: mmɔ enyuŋ eduk ke isɔŋ, ekebiat Moab.

²⁵Mmɔ enyuŋ ewuri mme obio, kpukpru owo kiet kiet enyuŋ emen itiat mmɔ etop esin ke kpukpru nti iŋwaŋ eyɔhɔ; enyuŋ esiri kpukpru obube mmɔŋ, enyuŋ eduɔk kpukpru nti eto: edi ke Kir-hareseth ikpɔŋ-ikpɔŋ ke mme itiat esie esuk ke esit; edi mbon-utop-itiat ekan enye ekuk, enyuŋ etɔŋɔ enye.

²⁶Ekem ke ini edidem Moab okutde ete ke ekɔŋ ɔsɔŋ akan imɔ, enye ada owo ikie itiaba emi esiode ofut, edian idem, ete isiak usuŋ isim edidem Edom; edi ikemeke.

²⁷Ndien enye emen akpan esiemɔ, eke akpadade ubɔŋ ke ibuot esie, awa ke edifɔp uwa ke enyɔŋ ibibene. Ndien akwa iyaresit odoro Israel; mmɔ enyuŋ edaŋa ekpɔŋ enye, enyuŋ enyɔŋɔ ke edem mmɔ.